Read სბს–სტოკჰოლმი 2001 ლევიანნი 6 Bible Online

ლევიანნი 6 - სბს–სტოკჰოლმი 2001 bible

ლევიანნი 6

¹და უთხრა უფალმა მოსეს:

²“თუ ვინმე შესცოდავს და მუხთლობით იმუხთლებს უფლის წინაშე, და უარს ეტყვის თავის მოყვასს შესანახად ან გირაოდ მიცემულ ნივთზე ან გატაცებულზე, ან გამოსძალავს თავის მოყვასს

³ან იპოვის დაკარგულს და უარყოფს ამას, და დაიფიცებს ცრუდ რამეზე, რასაც სჩადის ადამიანი, სცოდავს რა ამით,

⁴შესცოდავს, და დამნაშავე გახდება. დააბრუნოს მოტაცებული, რომელიც მოიტაცა, ან გამოძალული, რაც გამოსძალა, ან ანაბარი, რომელიც მას მიაბარეს, ან დაკარგული, რომელიც იპოვა.

⁵ან ყველაფრისათვის, რისთვისაც ცრუდ დაიფიცებს, ის გადაიხდის სრულად და მეხუთედს დაუმატებს; ვისაც ეკუთვნის, იმას მისცემს დანაშაულის მსხვერპლის შეწირვის დღეს.

⁶და თავისი დანაშაულის მსხვერპლად მიიტანოს უფალთან ვერძი, უმანკო, წვრილფეხა საქონლიდან მისი შეფასებით, როგორც დანაშაულის მსხვერპლი მღვდლისადმი.

⁷და შეუნდობს მას მღვდელი უფლის წინაშე, და მიეტევება მას ერთი მათგანი, რომლითაც იგი დადანაშაულდა.”

⁸და უთხრა უფალმა მოსეს:

⁹“ამცნე აარონს და მის ძეთ: ‘ესაა რჯული სრულადდასაწველისა: სრულადდასაწველი იყოს კოცონზე, სამსხვერპლოზე, მთელი ღამე, ვიდრე დილამდე, და ცეცხლი სამსხვერპლოსი გიზგიზებდეს მასზე.

¹⁰და შეიმოსოს მღვდელმა შესამოსელი სელისა და ქვედა საცვალი სელისავე შეიმოსოს ტანზე, და აიღოს ფერფლი სრულადდასაწველისგან, რომელიც დაწვა ცეცხლმა სამსხვერპლოზე, და დადვას იგი სამსხვერპლოსთან.

¹¹და გაიხადოს თავისი შესამოსელი და შეიმოსოს სხვა შესამოსელი, და გამოიტანოს ფერფლი ბანაკის გარეთ, წმიდა ადგილზე.

¹²და ცეცხლი სამსხვერპლოზე გიზგიზებდეს, არ ჩაქრეს. და მოუკიდოს მასზე მღვდელმა შეშებს დილაობით და განალაგოს მასზე სრულადდასაწველი, და დააკმიოს მასზე ქონი სამშვიდობო მსხვერპლისა.

¹³ცეცხლი მარადის გიზგიზებდეს სამსხვერპლოზე, არ ჩაქრეს.

¹⁴“‘და ესაა რჯული პურეული ძღვენისა: მიიტანონ იგი აარონის ძეთ უფლის წინაშე სამსხვერპლოზე.

¹⁵და აიღოს მისგან პეშვით წმიდა პურის ფქვილის ძღვენისგან და მისი ზეთისგან, და მთელი გუნდრუკი, რომელიც პურეულის ძღვენზეა, და დააკმიოს სამსხვერპლოზე კეთილსურნელებად მის მოსაგონრად უფლის წინაშე.

¹⁶და დანარჩენი მისგან შეჭამონ აარონმა და მისმა ძეებმა; ხმიადი იჭამოს წმიდა ადგილზე, საკრებულო კარვის ეზოში შეჭამონ.

¹⁷არ გამოცხვეს გაფუებული. ეს მივეცი მათ წილად ჩემი საცეცხლო შესაწირავებისაგან. წმიდათაწმიდაა იგი, როგორც ცოდვის მსხვერპლი და დანაშაულის მსხვერპლი.

¹⁸ყოველი მამრობითი სქესისა აარონის ძეთაგან ჭამდეს მას, მარადიული წესია ეს თქვენს თაობებში, უფლის საცეცხლო შესაწირავთაგან. ყოველი, რომელიც მათ შეეხება, განიწმიდება.’”

¹⁹და უთხრა უფალმა მოსეს:

²⁰“ესაა აარონისა და მის ძეთა მსხვერპლი, რომელსაც შესწირავენ უფალს მათი ცხების დღეს - ეფის მეათედი წმიდა ფქვილი მუდმივ შესაწირავად, ნახევარი დილით და ნახევარი საღამოს.

²¹ტაფაზე ზეთში უნდა იყოს დამზადებული, შეკაზმული მიიტანე იგი, კარგად გამომცხვარი, როგორც ძღვენი პურეულისა. შესწირე იგი კეთილსურნელებად უფლისათვის.

²²და მღვდელმა, მის ადგილზე ცხებულმა, მის ძეთაგან, უნდა შეასრულოს იგი. ეს მარადიული წესია. მთლიანად უფლისათვის დაიკმევა იგი.

²³და ყოველი პურეული ძღვენი მღვდლისგან შეწირული მთლიანად უნდა დაიწვას, არ შეიჭამოს.”

²⁴და უთხრა უფალმა მოსეს:

²⁵“უთხარი აარონსა და მის ძეთ: ‘ესაა რჯული ცოდვის მსხვერპლისა: იმ ადგილზე, სადაც დაიკვლის სრულადდასაწველი, დაიკლას ცოდვის მსხვერპლიც უფლის წინაშე. წმიდათა წმიდაა იგი.

²⁶მღვდელმა, რომელმაც ცოდვის მსხვერპლი შესწირა, შეიძლება შეჭამოს იგი. წმიდა ადგილზე იჭამოს, საკრებულო კარვის ეზოში.

²⁷ყოველი, რომელიც შეეხება მის ხორცს, განიწმიდება. და თუ მოესხურება მისი სისხლიდან სამოსელს, წმიდა ადგილზე გარეცხოს ის, რასაც მიესხურება.

²⁸ჭურჭელი თიხისა, რომელშიც იგი იხარშებოდა, დაიმსხვრეს. და თუ სპილენძის ჭურჭელში იხარშებოდა, მაშინ იგი გამოირეცხოს და გამოევლოს წყალი.

²⁹ყოველ მამროვანს მღვდელთაგან შეუძლია ჭამოს იგი. წმიდათა წმიდაა იგი.

³⁰და ყოველი ცოდვის მსხვერპლი, რომლის სისხლი საკრებულო კარავში იქნება შეტანილი საწმიდარში შენდობისათვის, არ იჭამოს: ცეცხლზე დაიწვას.