Read სბს–სტოკჰოლმი 2001 იერემია 1 Bible Online

იერემია 1 - სბს–სტოკჰოლმი 2001 bible

იერემია 1

¹სიტყვა იერემიასი, ხილკიაჰუს ძისა, რომელიც ყანათოთელ მღვდელთაგან იყო ბენიამინის ქვეყანაში,

²რომელზეც იყო სიტყვა უფლისა იოშიას, ყამონის ძის, იუდას მეფის დღეებში, მისი მეფობის მეცამეტე წელს.

³და იყო იეჰოიაკიმის, იოშიას ძის, იუდას მეფის დღეებში, ციდკიაჰუს, იუდას მეფის იოშიას ძის, მეთერთმეტე წლის ბოლომდე, იერუსალიმის განდევნამდე მეხუთე თვეს.

⁴იყო სიტყვა უფლისა ჩემდამი:

⁵“სანამ გამოგსახავდი მუცელში, მე გიცნობდი შენ; და სანამ გამოხვიდოდი საშოდან, მე განგწმიდე შენ, ხალხების წინასწარმეტყველად განგაწესე.”

⁶ვთქვი: “უფალო, უფალო, მე არ ვიცი ლაპარაკი, რადგან ყმაწვილი ვარ.”

⁷და მითხრა მე უფალმა: “ნუ იტყვი: ‘ყმაწვილი ვარ,’ რადგან ყველგან, სადაც კი მიგავლენ, წახვალ და ყოველივეს, რასაც გიბრძანებ, ილაპარაკებ.

⁸ნუ შეგეშინდება მათი, რადგან შენთანა ვარ შენს გადასარჩენად!” - სიტყვა უფლისა.

⁹და გამოიწვდინა უფალმა თავისი ხელი და შეეხო ჩემს ბაგეს და მითხრა მე უფალმა: “აჰა, მე ჩაგიდევი ჩემი სიტყვები ბაგეში.

¹⁰ნახე, მე დაგაყენე შენ ამ დღეს ხალხებსა და სამეფოებზე, რათა აღმოფხვრა და შემუსრო, მოსპო და დაანგრიო, ააშენო და დარგო.”

¹¹და იყო სიტყვა უფლისა ჩემდამი: “რას ხედავ შენ, იერემია?” და ვუთხარი მე: “ნუშის ხის კვერთხს ვხედავ მე.”

¹²და მითხრა მე უფალმა: “კარგად ხედავ, რადგან მე ვაჩქარებ ჩემს სიტყვას შესასრულებლად.”

¹³და იყო სიტყვა უფლისა ჩემდამი მეორედ ასე: “რას ხედავ შენ?” და ვუთხარი: “მოთუხთუხე ქვაბს ვხედავ, ჩრდილოეთისაკენ მიმართულს.”

¹⁴და მითხრა მე უფალმა: “ჩრდილოეთიდან დაიწყება უბედურება ქვეყნის ყველა მცხოვრებზე.

¹⁵რადგან მე მოვუხმობ ჩრდილოეთის სამეფოების ყველა ტომს,” - სიტყვა უფლისა, - “და მოვლენ და დადგამს თითოეული თავის ტახტს იერუსალიმის კარიბჭეთა შესასვლელში, და მის ყველა გალავანზე ირგვლივ და იუდას ყველა ქალაქზე.

¹⁶და წარმოვთქვამ მე ჩემს სამართალს მათზე მათი ყველა ბოროტმოქმედების გამო, რადგან დამტოვეს მე და სხვა ღმერთებს უკმევდნენ და თავიანთ ნახელავს სცემდნენ თაყვანს.

¹⁷შენ კი შემოისარტყლე წელი და ადექ და უთხარი მათ ყოველივე, რასაც მე გიბრძანებ, ნუ დაფრთხები მათ წინაშე, რომ მეც არ დაგაფრთხო.

¹⁸და მე გაქციე შენ დღეს გამაგრებულ ქალაქად და რკინის სვეტად და სპილენძის გალავნად მთელს ამ ქვეყანაზე - იუდას მეფეების, მისი მთავრების, მისი მღვდლების და მთელი ქვეყნის ხალხის წინააღმდეგ.

¹⁹და შეგებრძოლებიან ისინი, მაგრამ ვერ დაგძლევენ, რადგან მე შენთანა ვარ შენს გადასარჩენად!” - სიტყვა უფლისა.