Read სბს–სტოკჰოლმი 2001 იერემია 39 Bible Online

იერემია 39 - სბს–სტოკჰოლმი 2001 bible

იერემია 39

¹ციდკიაჰუს, იუდას მეფის მეფობის მეცხრე წლის მეათე თვეს მოვიდა ბაბილონის მეფე ნაბუქოდონოსორი და მთელი მისი ლაშქარი იერუსალიმთან და ალყა შემოარტყა მას.

²ციდკიაჰუს მეფობის მეთერთმეტე წელს, მეოთხე თვის მეცხრე დღეს, განგრეული იქნა ქალაქის კედელი.

³და მოვიდა ბაბილონის მეფის ყველა მთავარი და დასხდნენ საშუალო კარიბჭეში: ნერგალ-სარეცერი, სამგარ ნებუ-სარსექიმი, საჭურისთა უფროსი, ნერგალ-სარეცერი, გრძნეულთა უფროსი და ბაბილონის მეფის ყველა დანარჩენი მთავარი.

⁴და როდესაც ციდკიაჰუმ, იუდას მეფემ, და ყველა მებრძოლმა დაინახეს ისინი, გაიქცნენ და ღამით გავიდნენ ქალაქიდან ორ გალავანს შორის მდებარე კარიბჭის გზით, რომელიც მეფის ბაღთანაა. და გავიდა იგი ყარაბას გზით.

⁵და უკან დაედევნა მათ ქალდეველთა ლაშქარი და დაეწიენ ციდკიაჰუს იერიხოს ტრამალზე, და აიყვანეს იგი და მიიყვანეს ბაბილონის მეფე ნაბუქოდონოსორთან რიბლაში, ხამათის ქვეყანაში, და გამოუტანეს განაჩენი.

⁶დახოცა ბაბილონის მეფემ რიბლაში ციდკიაჰუს ძენი მის თვალწინ; და ასევე იუდას ყველა წარჩინებული მოაკვლევინა ბაბილონის მეფემ.

⁷ციდკიაჰუს კი დასთხარა თვალები და გაუყარა ბორკილები, რომ წაეყვანათ იგი ბაბილონში.

⁸მეფის სახლი და ხალხის სახლები ცეცხლში დაწვეს ქალდეველებმა, იერუსალიმის კედლები კი დაანგრიეს.

⁹დანარჩენი ხალხი, ვინც ქალაქში დარჩა, და ისინი, ვინც მის მხარეზე გადავიდნენ, და დანარჩენი ხალხი, ვინც დარჩა, ბაბილონში გადაასახლა ნებუზარადანმა, მცველთა უფროსმა.

¹⁰ღარიბი ხალხი, რომელთაც არაფერი გააჩნდათ, დატოვა ნებუზარადანმა, მცველთა უფროსმა, იუდას ქვეყანაში და მისცა მათ იმ დღეს ვენახები და ყანები.

¹¹იერემიაზე კი ასე უბრძანა ბაბილონის მეფემ ნაბუქოდონოსორმა ნებუზარადანს, მცველთა უფროსს:

¹²“აიყვანე იგი და თვალყური ადევნე მას და ცუდს ნურაფერს დაუშავებ, არამედ, როგორც გეტყვის, ისე მოექეცი მას.

¹³და გაგზავნა ნებუზარადანმა, მცველთა უფროსმა, და ნებუშაზბანმა, საჭურისთა უფროსმა და ნერგალ-სარეცერმა, მოგვთა უფროსმა და ბაბილონის მეფის ყველა მთავარმა.”

¹⁴და გაგზავნეს და წამოიყვანეს იერემია საყარაულო ეზოდან და გადასცეს გედელიას, ძეს ახიკამისა, ძისა შაფანისა, რომ წაეყვანა იგი სახლში; და დარჩა იგი ხალხში.

¹⁵და სიტყვა, რომელიც იყო იერემიას მიმართ უფლისაგან საყარაულო ეზოში მისი პატიმრობისას:

¹⁶“წადი და ასე უთხარი ქუშელ ყებედ-მელექს: ასე თქვა უფალმა ცაბაოთმა, ისრაელის ღმერთმა: ‘მოვაწევ ამ ქალაქზე ჩემს სიტყვებს საუბედუროდ და არა სასიკეთოდ, და ახდება შენს წინაშე იმ დღეს.

¹⁷და გადაგარჩენ შენ იმ დღეს!’ - სიტყვა უფლისა, - ‘და არ გადაეცემი იმ კაცთა ხელთ, რომლებისაც გეშინია.

¹⁸რადგან თავს დაგაღწევინებ შენ და მახვილით არ დაეცემი, და ნადავლად გექნება შენი სული, რადგან ჩემზე იყავი დაიმედებული!’” - სიტყვა უფლისა.