Read სბს–სტოკჰოლმი 2001 იერემია 46 Bible Online

იერემია 46 - სბს–სტოკჰოლმი 2001 bible

იერემია 46

¹სიტყვა უფლისა, რომელიც იყო წინასწარმეტყველ იერემიას მიმართ ხალხებზე.

²ეგვიპტის მეფის ფარაონ ნექოს ლაშქარზე, რომელიც მდინარე ევფრატზე ქარქემიშში დაამარცხა ბაბილონის მეფე ნაბუქოდონოსორმა იეჰოიაკიმ იოშიას ძის, იუდას მეფის, მეფობის მეოთხე წელს.

³“მოამზადეთ ფარი და აბჯარი და წადით ომში.

⁴შეკაზმეთ ცხენები და ამხედრდით, მხედრებო, და გამოეწყვეთ მუზარადებში, გალესეთ შუბები და ჩაიცვით ჯავშანი.

⁵რას ვხედავ მე? ისინი დაფრთხნენ, უკან იხევენ? მათი მამაცნი კი შეიმუსრნენ და გარბიან უკანმოუხედავად. საშინელებაა ირგვლივ!” - სიტყვა უფლისა. -იერ.47:3.

⁶“ვერც ფეხმარდი გაიქცევა, ვერც მამაცი დააღწევს თავს, ჩრდილოეთით, მდინარე ევფრატთან, წაბორძიკდნენ და დაეცნენ ისინი.

⁷ვინაა ეს ნილოსივით რომ იწევს, ნიაღვრებივით ახმაურებს თავის წყლებს?

⁸ეგვიპტე ნილოსივით იწევს და ნიაღვრებივით ხმაურობენ მისი წყლები. და ამბობს ის: ‘მე წამოვიწევ და დავფარავ ქვეყანას, დავღუპავ ქალაქსა და მასში მცხოვრებთ.

⁹ამხედრდით ცხენებზე და, თქვენ ეტლებო, გაშმაგებით იქროლეთ და გამოდით, მამაცნო - ქუშელნო და ფუთელნო, ფარის დამჭერნო, ლუდელნო, მშვილდის დამჭერნო და მომზიდველნო.

¹⁰ის დღე, უფალი ღმერთის, ცაბაოთის შურისგების დღეა, რათა შური იძიოს თავის შეჭირვებულებზე, და მახვილი შეჭამს და გაძღება და გამოთვრება მათი სისხლით, რადგან მსხვერპლშეწირვა ექნება უფალს, ღმერთს ცაბაოთს ჩრდილო ქვეყანაში მდინარე ევფრატთან.

¹¹ადი გილყადზე და აიღე მალამო, ქალწულო, ეგვიპტის ასულო, ამაოდ ხმარობ წამლებს, კურნება არა გაქვს შენ.

¹²ისმინეს ხალხებმა შენი შერცხვენა და შენმა კივილმა აავსო ქვეყანა, რადგან მამაცი მამაცს შეეჯახა და ორივენი ერთად დაეცნენ.”

¹³სიტყვა, რომელიც უფალმა უთხრა იერემია წინასწარმეტყველს ეგვიპტის ქვეყნის დასამხობად ბაბილონის მეფე ნაბუქოდონოსორის მოსვლაზე:

¹⁴“აუწყეთ ეგვიპტეში და ასმინეთ მიგდოლში, ასმენინეთ ნოფში და თახფანხესში და თქვით: ‘წამოდექი და მოემზადე, რადგან მახვილი შეჭამს შენს ირგვლივ ყველაფერს.’

¹⁵რატომ წაილეკა შენი მამაცი? ვერ გაუძლო, რადგან უფალმა უკუაქცია.

¹⁶მომრავლდნენ უძლურნი, ერთმანეთზე ეცემოდნენ და ამბობდნენ: ‘ადექით და დავუბრუნდეთ ჩვენს ერს და ჩვენს სამშობლო ქვეყანას დამღუპველი მახვილისაგან.

¹⁷გაჰყვიროდნენ იქ: ‘ფარაონი, ეგვიპტის მეფე!’ მაგრამ ამაო ხმაურია, გადააცილა დათქმულ დროს.

¹⁸როგორც ცოცხალი ვარ მე,” ამბობს მეფე, უფალი ცაბაოთია სახელი მისი, “რადგან როგორც თაბორი დგას მთებს შორის და როგორც ქარმელია ზღვასთან, ისე მოვა იგი.

¹⁹გადასახლების ჭურჭელი დაიმზადე, ეგვიპტეში მცხოვრებო ასულო, რადგან ნოფი აოხრდება და გაჩანაგდება, დარჩება მცხოვრების გარეშე.

²⁰უმშვენიერესი დეკეულია ეგვიპტე, მაგრამ ჩრდილოეთიდან მოდის კრაზანა, მოდის.

²¹მისი დაქირავებულნიც მის შიგნით ნასუქალ ხბორებივით არიან, მაგრამ ისინიც უკუიქცნენ, ერთად გარბიან, ვერ დადგნენ, რადგან მათი დაღუპვის დღე მოვიდა მათზე, მათი დასჯის ჟამი.

²²მისი ხმა გველის სისინის მსგავსი იქნება, რადგან ლაშქრით დადიან და ცულებით მოვიდნენ მასზე, ხის მჭრელებივით.

²³აჩეხეთ მისი ტყე,” - სიტყვა უფლისა, - “თუმცა აურაცხელია, რადგან კალიაზე მეტად გამრავლდნენ და სათვალავი არა აქვთ.

²⁴შერცხვენილია ეგვიპტის ასული, ჩრდილოეთის ხალხს გადაეცა ხელში.”

²⁵და თქვა უფალმა ცაბაოთმა, ისრაელის ღმერთმა: “აჰა, მე დავსჯი ამონს თებეში და ფარაონს და ეგვიპტეს და მის ღმერთებს და მის მეფეებს, ფარაონს და მასზე დანდობილებს!

²⁶და გადავცემ მათ მათი სულის მაძიებელთა ხელთ, და ბაბილონის მეფე ნაბუქოდონოსორის ხელთ, და მის მსახურთა ხელთ და ამის შემდეგ დასახლდება ის, როგორც პირვანდელ დღეებში.” - სიტყვა უფლისა. -

²⁷“შენ კი ნუ გეშინია, ჩემო მსახურო იაკობ, და ნუ დაფრთხები, ისრაელ, რადგან მე გიხსნი შენ შორიდან და შენ თესლს მისი ტყვეობის ქვეყნიდან. და დაბრუნდება იაკობი და იცხოვრებს წყნარად და მშვიდად, და არ ეყოლება შემშინებელი.

²⁸ნუ გეშინია, ჩემო მსახურო იაკობ,” - სიტყვა უფლისა, - “რადგან მე შენთანა ვარ. მე მოვსპობ ყველა ხალხს, რომლებთანაც გაგაძევე, შენ კი არ მოგსპობ, მხოლოდ მოგარჯულებ სამართლისამებრ, მაგრამ დაუსჯელს არ დაგტოვებ.”