Read სბს–სტოკჰოლმი 2001 ეზეკიელი 10 Bible Online

ეზეკიელი 10 - სბს–სტოკჰოლმი 2001 bible

ეზეკიელი 10

¹დავინახე, აჰა, ცის თაღზე, ქერუბიმების თავზე რომ არის, ვით საფირონის ქვა, ტახტის გამოსახულების მსგავსი ჩანდა მათზე.

²და ეუბნებოდა იმ კაცს, შემოსილს სელით: “მოდი ბორბლებს შორის ქერუბიმის ქვეშ და გაივსე მუჭები ცეცხლის ნაკვერცხლებით, რომლებიც ქერუბიმებს შორისაა, და მოისროლე ქალაქზე,” და შევიდა იგი ჩემს თვალწინ.

³ქერუბიმები იდგნენ სახლის მარჯვნივ იმ კაცის შესვლისას და ღრუბელმა გაავსო შიდა ეზო.

⁴აიწია უფლის დიდება ქერუბიმიდან სახლის ზღურბლზე და გაივსო სახლი ღრუბლით და გაივსო ეზო უფლის დიდების ბრწყინვით.

⁵ხმა ქერუბიმების ფრთებისა ისმოდა გარეთა ეზომდე, როგორც ხმა ყოვლადძლიერი ღმერთისა, როდესაც ის ლაპარაკობს.

⁶და როდესაც მან უბრძანა კაცს, სელით შემოსილს: “აიღე ცეცხლი ბორბლებს შორის, ქერუბიმებს შორის!” შევიდა იგი და დადგა ბორბალთან.

⁷მაშინ გამოიწვდინა ქერუბიმმა ხელი ცეცხლისაკენ, რომელიც ქერუბიმებს შორის იყო, და აიღო და მისცა მუჭში სელით შემოსილს, და აიღო მან და გავიდა.

⁸და უჩანდათ ქერუბიმებს გამოსახულება ადამიანის ხელისა მათ ფრთებქვეშ.

⁹და დავინახე ოთხი ბორბალი ქერუბიმებთან: ერთი ბორბალი ერთ ქერუბიმთან და ერთი ბორბალი მეორე ქერუბიმთან და შესახედაობა თვლებისა მსგავსი იყო ქრიზოლითისა.

¹⁰და გამოსახულება მათი - ერთი შესახედაობა ოთხივეს, როგორც ბორბალია ბორბლის შიგნით.

¹¹სვლისას ოთხი მხრისაკენ მიდიოდნენ, არ ტრიალდებოდნენ სვლისას, რადგან იმ ადგილისაკენ მიდიოდნენ, საითაც თავი იყო მიმართული.

¹²და მთელი მათი ტანი და მათი ზურგი და მათი ხელები და მათი ფრთები და მათი ბორბლები სავსე იყო ირგვლივ თვალებით, მათი ოთხივე ბორბალი.

¹³და ბორბლები იწოდა ქარბორბალად, გავიგონე ჩემი ყურით.

¹⁴და ოთხი სახე თითოეულს, ერთი სახე - ქერუბიმის სახე, მეორე სახე - ადამიანის სახე, მესამე - ლომის სახე და მეოთხე - არწივის სახე.

¹⁵და აიწიენ ქერუბიმები. ეს ის ცხოველი იყო, რომელიც ვიხილე მდინარე ქებარის ნაპირზე.

¹⁶ქერუბიმების სვლისას ურმის ბორბლები მიდიოდნენ მათთან ერთად და, როდესაც ქერუბიმები ასწევდნენ თავიანთ ფრთებს, რომ აწეულიყვნენ მიწიდან. არ ტრიალდებოდნენ ბორბლები, ისინიც მათთან იყვნენ.

¹⁷მათი დადგომისას ისინიც დგებოდნენ და მათი აწევისას ისინიც იწევდნენ მათთან ერთად, რადგან ცოცხალი სული იყო მათში.

¹⁸და გავიდა უფლის დიდება სახლის ზღურბლიდან და დადგა ქერუბიმებზე.

¹⁹და ასწიეს ქერუბიმებმა თავიანთი ფრთები და ამაღლდნენ მიწიდან ჩემს თვალწინ მათი გამოსვლისას და ბორბლებიც მათ კვალობაზე, და დადგა უფლის სახლის აღმოსავლეთის კარიბჭის შესასვლელთან და ისრაელის ღმერთის დიდება იყო მათ ზემოთ.

²⁰ეს ის ცხოველია, რომელიც მე ვნახე ისრაელის ღმერთის ქვეშ მდინარე ქებარის ნაპირზე და მივხვდი, რომ ქერუბიმებია ისინი.

²¹ოთხი სახე თითოეულს და ოთხი ფრთა თითოეულს და გამოსახულება ადამიანის ხელებისა მათი ფრთების ქვეშ.

²²და შესახედაობა მათი სახეებისა - ეს ის სახეებია, რომელიც მე ვნახე მდინარე ქებარის ნაპირზე. მათი გამოსახულებაც და ისინიც - თითოეული თავისი სახის მიმართულებით მიდიოდა.