Read სბს–სტოკჰოლმი 2001 ეზეკიელი 15 Bible Online

ეზეკიელი 15 - სბს–სტოკჰოლმი 2001 bible

ეზეკიელი 15

¹და იყო სიტყვა უფლისა ჩემდამი:

²“ძეო კაცისავ! რა უპირატესობა აქვს ვაზის ხეს რომელიმე ფოთლოვანი ხის წინაშე, ტყის ხეთა შორის რომ არიან?

³იღებენ მისგან მერქანს რაიმე ნაკეთობის გასაკეთებლად? თუ გამოიღებენ მისგან პალოს მასზე რაიმე ჭურჭლის ჩამოსაკიდად?

⁴აჰა, ცეცხლს მიეცა იგი შესაჭმელად, მისი ორივე ბოლო ცეცხლმა შეჭამა და შუაგული გამოეწვა - განა გამოსადეგია ის რაიმე ხელობისათვის?

⁵მაშინაც კი, როდესაც მთელი იყო, არ გამოდგებოდა ხელობისათვის, მით უფრო ახლა, როდესაც ცეცხლმა შეჭამა იგი და გამოიწვა, გამოდგება კიდევ ხელობისათვის?”

⁶ამიტომ ასე ამბობს უფალი ღმერთი: “როგორც ვაზის ხე ტყის ხეთა შორის ცეცხლს მივეცი შესაჭმელად, ასევე მივცემ იერუსალიმის მცხოვრებთაც.

⁷და მივაქცევ ჩემს პირს მათ წინააღმდეგ, ცეცხლიდან გამოვიდნენ და ცეცხლი შეჭამს მათ. მაშინ მიხვდებით, რომ მე ვარ უფალი, როდესაც მივაქცევ ჩემს პირს მათ წინააღმდეგ.

⁸და ავაოხრებ ამ ქვეყანას იმის გამო, რომ მღალატობდნენ!” - სიტყვა უფალი ღმერთისა.