Read სბს–სტოკჰოლმი 2001 ეზეკიელი 18 Bible Online

ეზეკიელი 18 - სბს–სტოკჰოლმი 2001 bible

ეზეკიელი 18

¹და იყო სიტყვა უფლისა ჩემდამი:

²“რა გაქვთ, როდესაც ყვებით ამ იგავს ისრაელის მიწაზე: ‘მამებმა მკვახე ხილი ჭამეს და შვილებს კბილები მოჰკვეთაო?’

³ცოცხალი ვარ მე,” - სიტყვა უფლისა, - “თუღა გქონდეთ თქვენ სათქმელად ეს იგავი ისრაელში!

⁴ყველა სული ჩემია, როგორც სული მამისა, ისევე სული ძისა. შემცოდავი სული კი მოკვდება.

⁵და თუ კაცი მართალი იქნება და იქმს სამართალსა და სიმართლეს,

⁶მთებზე შეწირულისაგან არა ჭამს და თვალი ისრაელის სახლის კერპებისაკენ არა აქვს მიპყრობილი, და მოყვასის ცოლს არ ბილწავს და წიდოვან ქალთან არ წვება,

⁷არავის არ ჩაგრავს და თავის მევალეს ვალს უბრუნებს, ძარცვით არ ძარცვავს, თავის პურს მშიერს აძლევს და შიშველს სამოსით მოსავს.

⁸ვახშით არ აძლევს და სარგებელს არ იღებს, უსამართლობისგან ხელს იკავებს და კაცსა და კაცს შორის სწორ სამართალს აჩენს,

⁹ჩემი წესებით დადის და ჩემს სამართალს იცავს, რომ ქმნას ჭეშმარიტება - ის არის მართალი, სიცოცხლით იცოცხლებს,” - სიტყვა უფალი ღმერთისა. -

¹⁰“მაგრამ თუ შობს ავაზაკ ძეს, სისხლისმღვრელს, რომელიც ძმას გაუკეთებს ერთს ამათგან,

¹¹და არც ერთი ამ კარგთაგანი არ გაუკეთებია, რადგან მთებზეც ჭამდა და მოყვასის ცოლსაც ბილწავდა,

¹²ღარიბსა და ღატავს ჩაგრავდა, ძარცვით ძარცვავდა, ვალს არ უბრუნებდა და კერპებისაკენ ჰქონდა მიპყრობილი თვალი, სისაძაგლეს სჩადიოდა,

¹³ვახშით აძლევდა და სარგებელს იღებდა - იცოცხლებს კი? არ იცოცხლებს, რაკი ყოველივე ამ სისაძაგლეს სჩადიოდა - სიკვდილით მოკვდება და მისი სისხლი მასზე იქნება.

¹⁴და აჰა, შვა ძე, რომელიც ხედავდა მამამისის ყოველ ცოდვას, რაც გაუკეთებია, ხედავდა და არ აკეთებდა მათ მსგავსს,

¹⁵მთებზე არ ჭამდა და თვალი ისრაელის სახლის კერპებისაკენ არ ჰქონდა მიპყრობილი, მოყვასის ცოლს არ ბილწავდა,

¹⁶არავინ დაუჩაგრავს, გირაოს არ იღებდა და ძარცვით არ ძარცვავდა, თავის პურს მშიერს აძლევდა და შიშველს სამოსით მოსავდა,

¹⁷ღარიბის ჩაგვრისაგან ხელს იკავებდა, ვახშსა და სარგებელს არ იღებდა, ჩემს სამართალს აკეთებდა და ჩემი წესებით დადიოდა - ის არ მოკვდება მამამისის ურჯულოების გამო, ის სიცოცხლით იცოცხლებს.

¹⁸მამამისი კი, რადგან ჩაგვრით ჩაგრავდა, ძარცვით ძარცვავდა ძმას და ბოროტებას სჩადიოდა თავის ხალხში, მოკვდება თავის ურჯულოებაში.

¹⁹თქვენ ამბობთ: რატომ არ ატარებს ძე მამამისის ურჯულოებას? ძე კი სამართალსა და სიმართლეს იქმოდა, ჩემს ყველა წესს იცავდა და ასრულებდა მათ - ის სიცოცხლით იცოცხლებს.

²⁰ცოდვილი სული კი, მოკვდება. ძემ არ უნდა ატაროს თავისი მამის დანაშაული და მამამ - ძის ურჯულოება. მართლის სიმართლე მასზევე იქნება და ბოროტმოქმედის ბოროტმოქმედება - მასზე.

²¹ბოროტმოქმედი კი, თუ მოიქცევა ყველა თავისი ცოდვისგან, რომელიც ჩაიდინა, და დაიცავს ყველა ჩემს წესს და იქმს სამართალსა და სიმართლეს, სიცოცხლით იცოცხლებს, არ მოკვდება.

²²ყველა მის დანაშაულს, რაც კი ჩაუდენია, არ გაუხსენებენ მას. თავისი სიმართლით, რომელსაც აკეთებდა, იცოცხლებს ის.

²³განა მე ვისურვებ ბოროტმოქმედის სიკვდილს?” - სიტყვა უფალი ღმერთისა, - “განა არ მინდა, რომ მოიქცეს თავისი გზიდან და იცოცხლოს?

²⁴მართალი კი, თუ მიიქცა თავისი სიმართლიდან და სჩადის უსამართლობას, მსგავსს ყველა იმ სისაძაგლისა, რომელსაც ბოროტმოქმედი სჩადის - იცოცხლებს კი? ყოველ მის სიმართლეს, რომელიც გააკეთა, არ გაუხსენებენ. თავისი მუხთლობით, რომლითაც მუხთლობდა, და თავისი ცოდვით რომლითაც სცოდავდა, მოკვდება.

²⁵და თქვენ ამბობთ: არ არის სწორი უფლის გზაო. მომისმინეთ, სახლო ისრაელისა, ჩემი გზა არ არის სწორი? ეს თქვენი გზებია, სწორი რომ არ არის!

²⁶თუ მართალი თავისი სიმართლიდან მიიქცევა და ჩაიდენს უსამართლობას და მოკვდება მათ გამო, თავის უსამართლობის გამო, რომელიც ჩაიდინა, მოკვდება იგი.

²⁷და თუ ბოროტი თავისი ბოროტმოქმედებიდან, რომელიც ჩაიდინა, მოიქცა, და იქმს სამართალსა და სიმართლეს, ის თავის სულს აცოცხლებს.

²⁸დაინახა და მოიქცა თავისი დანაშაულებებიდან, რომელნიც ჩაიდინა, ის სიცოცხლით იცოცხლებს, არ მოკვდება.

²⁹ამბობს სახლი ისრაელისა: არ არის სწორი უფლის გზაო. ჩემი გზა არ არის სწორი, სახლო ისრაელისა? განა თქვენი გზები არის სწორი?

³⁰ამიტომ თითოეულს თავისი გზის მიხედვით განგსჯით, ისრაელის სახლო.” - სიტყვა უფალი ღმერთისა, - “მოინანიეთ და მოიქეცით თქვენი ყველა დანაშაულიდან და არ გექნებათ ურჯულოება დაბრკოლებად.

³¹განაგდეთ თქვენგან ყველა თქვენი დანაშაულება, რომლითაც თქვენ სჩადიოდით დანაშაულს, და შეიქმენით ახალი გული და ახალი სული, და რატომღა მოკვდებით, ისრაელის სახლო?

³²რადგან მე არ მსურს მოკვდავის სიკვდილი,” - სიტყვა უფალი ღმერთისა,- “აბა, მოიქეცით და იცოცხლებთ!”