Read სბს–სტოკჰოლმი 2001 ეზეკიელი 2 Bible Online

ეზეკიელი 2 - სბს–სტოკჰოლმი 2001 bible

ეზეკიელი 2

¹და მან მითხრა: “ძეო კაცისავ! დადექი ფეხზე და დაგელაპარაკები.”

²და შემოვიდა ჩემში სული, როდესაც ის მელაპარაკებოდა, და დამაყენა ფეხზე, და მე ვუსმენდი ჩემთან მოლაპარაკეს.

³და მითხრა: “ძეო კაცისავ! მე გგზავნი ისრაელის ძეებთან, მეამბოხე ხალხთან, რომლებიც ამბოხდნენ ჩემს წინააღმდეგ. ისინი და მათი მამები სცოდავდნენ ჩემს წინააღმდეგ დღევანდელ დღემდეც კი.

⁴ეს ძენი სახეჯიუტნი და გულსასტიკნი არიან. მე გგზავნი მათთან და უთხარი მათ: ‘ასე თქვა უფალმა ღმერთმა!’

⁵და თუ მოისმენენ ან არა - რადგან მეამბოხე სახლია ისინი, მაინც მიხვდებიან, რომ წინასწარმეტყველი იყო მათ შორის.

⁶შენ კი, ძეო კაცისავ! ნუ შეგეშინდება მათი და მათი ლაპარაკისაც, თუმცა ძეძვები და ეკლები არიან შენთვის, და მორიელებზე ზიხარ. მათი ლაპარაკის ნუ შეგეშინდება და მათ სახეთაგან ნუ შეკრთები, რადგან მეამბოხე სახლია ისინი.

⁷და ეტყვი ჩემს სიტყვებს მათ, მოისმენენ თუ არ მოისმენენ, რადგან მეამბოხენი არიან ისინი.

⁸შენ კი, ძეო კაცისავ! მოისმინე, რასაც მე გეტყვი: ნუ იქნები მეამბოხე, როგორც მეამბოხე სახლი, გააღე შენი პირი და ჭამე, რასაც მე მოგცემ.”

⁹და მე ვიხილე ხელი, გამოწვდილი ჩემსკენ და მასში - გრაგნილი წიგნისა.

¹⁰და მან გაშალა იგი ჩემს წინაშე. და ის გრაგნილი დაწერილი იყო წინა მხრიდან და უკანა მხრიდან. და ეწერა მასზე მოთქმა და კვნესა და ტირილი.