Read სბს–სტოკჰოლმი 2001 ეზეკიელი 26 Bible Online

ეზეკიელი 26 - სბს–სტოკჰოლმი 2001 bible

ეზეკიელი 26

¹და იყო ეს მეთერთმეტე წელს, პირველ დღეს პირველი თვისა, იყო სიტყვა უფლისა ჩემდამი:

²“ძეო კაცისავ! იმის გამო, რომ ცორი ასე ამბობს იერუსალიმზე: ‘აჰა, დაილეწა კარნი ხალხთა, ჩემკენ მობრუნდა. მე გავივსები მისი აოხრებით;’

³ამიტომ ასე თქვა უფალმა ღმერთმა: ‘აჰა, მე ვარ შენს წინააღმდეგ, ცორო, და აღვძრავ შენზე მრავალ ხალხებს, როგორც ზღვა აღძრავს თავის ტალღებს,

⁴და დაანგრევენ ცორის გალავნებს და დააქცევენ მის კოშკებს, და გამოვგვი მის მტვერს მისგან და გადავაქცევ მას შიშველ კლდეებად.

⁵ბადეების გასაფენი ადგილი იქნება ის ზღვის შუაგულში, რადგან მე ვთქვი ეს!’ - სიტყვა უფალი ღმერთისა, - ‘და იქნება იგი საძარცვავად ხალხებისათვის.

⁶და მისი ასულნი, რომელნიც მინდორში არიან, მახვილით დაიხოცებიან და მიხვდებიან, რომ მე ვარ უფალი!’”

⁷რადგან ასე თქვა უფალმა ღმერთმა: ‘მე მოვიყვან ცორზე ჩრდილოეთიდან ნაბუქოდონოსორს, ბაბილონის მეფეს, მეფეთა მეფეს, ცხენებით, ეტლებითა და მხედრებით, კრებულითა და მრავალი ხალხით.

⁸შენს ასულებს მინდორში დახოცავს და დადგამს შენს წინააღმდეგ სათვალთვალო კოშკს, და დაყრის შენს წინააღმდეგ მიწაყრილს და აღმართავს შენს წინააღმდეგ ფარს.

⁹კედლის სანგრევ მანქანას დადგამს შენს კედლებთან და შენს გოდლებს თავისი მახვილით დალეწავს,

¹⁰მისი მრავალრიცხოვანი ცხენების მტვერი დაგფარავს შენ, მხედრის, ბორბლისა და ეტლის ხმა შეარყევს შენს კედლებს, როდესაც შემოვლენ შენს კარიბჭეში, როგორც შემომსვლელნი ზღუდეგარღვეულ ქალაქში.

¹¹ფლიქვები მისი ცხენისა დაქელავენ შენს ყველა ქუჩას, შენი ხალხი მახვილით იქნება დახოცილი და შენი სიძლიერის ძეგლები მიწაზე დაემხობა.

¹²და გაძარცვავენ შენს დოვლათს, და გაქურდავენ შენს საქონელს, დაანგრევენ შენს კედლებს, შენს მშვენიერ სახლებს გააცამტვერებენ, და შენს ქვებს და შენი ხეების მტვერს წყალში ჩაყრიან.

¹³და შეწყვეტ შენი სიმღერების გუგუნს და ხმას შენი ქნარებისას ვეღარ მოისმენენ.

¹⁴გაქცევ შენ შიშველ კლდედ, ბადეების გასაფენი იქნები, აღარ აშენდები მეტად, რადგან მე, უფალმა, ვთქვი!” - სიტყვა უფალი ღმერთისა.

¹⁵ასე უთხრა უფალმა ღმერთმა ცორს: “ნუთუ შენი დაცემის ხმისაგან, შენს შიგნით ხოცვა-ჟლეტისას დაღუპულთა კვნესისაგან არ შეძრწუნდებიან კუნძულები?

¹⁶ჩამოვლენ თავიანთი ტახტებიდან ზღვის ყველა მთავარნი და მოიხსნიან თავიანთ მოსასხამებს, და თავიანთ ნაქარგ სამოსელს გაიხდიან, შიშით შეიმოსებიან, მიწაზე დასხდებიან და შეძრწუნდებიან შენზე.

¹⁷და დაიწყებენ შენზე მოთქმას და გეტყვიან: ‘როგორ დაიღუპე, ზღვებით დასახლებულო, განთქმულო ქალაქო, რომელიც ძლიერი იყო ზღვაზე - ის და მისი მცხოვრებნი, რომელნიც შიშსა ჰგვრიდნენ ყველა მის მცხოვრებთ.’

¹⁸ახლა, შეძრწუნდებიან ზღის კუნძულები, შენი დაცემის დღეს, და შეკრთებიან ზღის კუნძულები, რომელნიც ზღვაში არიან შენი დევნილობაში წასვლის გამო.

¹⁹რადგან ასე თქვა უფალმა ღმერთმა: როდესაც გაქცევ აოხრებულ ქალაქად, მსგავსად ქალაქებისა, რომელნიც უკაცრიელია, როდესაც წამოიმართება შენზე უფსკრული და დაგფარავს ბევრი წყლები,

²⁰და ჩაგიყვან საფლავში ჩასულებთან, უწინდელ ხალხთან, საფლავში ჩასულებთან, რათა არ დასახლდე, და მშვენებას მივცემ ცოცხალთა ქვეყანას.

²¹თავზარს დაგცემ შენ და აღარ იქნები, ძებნას დაგიწყებენ და ვეღარ გიპოვიან საუკუნოდ!” - სიტყვა უფალი ღმერთისა.