Read სბს–სტოკჰოლმი 2001 ეზეკიელი 28 Bible Online

ეზეკიელი 28 - სბს–სტოკჰოლმი 2001 bible

ეზეკიელი 28

¹და იყო სიტყვა უფლისა ჩემდამი:

²“ძეო კაცისავ! უთხარი ცორის მთავარს: ‘ასე თქვა უფალმა ღმერთმა: რადგან აღზევდა შენი გული და ამბობდი: “მე ვარ ღმერთი, ღმერთის სამყოფელში ვზივარ, ზღვების გულში!” შენ კი ადამიანი ხარ და არა ღმერთი და გული ღმერთის გულს გაუთანაბრე.

³აჰა, შენ დანიელზე ბრძენი ხარ, არავითარი საიდუმლო არაა დაფარული შენგან,

⁴შენი სიბრძნით და შენი გონებით მოიხვეჭე ქონება, მოიხვეჭე ოქრო-ვერცხლი შენი საგანძურებისთვის,

⁵შენი დიდი სიბრძნით, ვაჭრობით გაამრავლე შენი დოვლათი და აღზევდა შენი გული შენი დოვლათით.’

⁶ამიტომ ასე თქვა უფალმა ღმერთმა: ‘რადგან შენი გული ღმერთის გულს გაუთანაბრე,

⁷ამიტომ აჰა, მე მოგისევ შენ უცხოებს, უსასტიკესთ ხალხთა შორის და იშიშვლებენ თავიანთ მახვილებს შენი სიბრძნის მშვენებაზე და შებღალავენ თქვენს ბრწყინვალებას.

⁸საფლავში ჩაგიყვანენ და მოკვდები დახოცილთა სიკვდილით ზღვების გულში.

⁹აბა, თუ იტყვი: “ღმერთი ვარ მე!” შენი მკვლელის წინაშე? შენ კი ადამიანი ხარ და არა ღმერთი შენი მკვლელის ხელში.

¹⁰წინადაუცვეთელთა სიკვდილით მოკვდები უცხოთა ხელით, რადგან მე ვთქვი’, - სიტყვა უფალი ღმერთისა.”

¹¹და იყო სიტყვა უფლისა ჩემდამი:

¹²“ძეო კაცისავ! აამაღლე მოთქმა ცორის მეფეზე და უთხარი მას: ‘ასე თქვა უფალმა ღმერთმა: შენ ბეჭედი ხარ სრულყოფისა, სავსე სიბრძნე და სრული მშვენება.

¹³ედემში, ღმერთის ბაღში იმყოფებოდი, ყოველი პატიოსანი ქვა იყო შენი შესამოსელი. ლალით, ტოპაზით და ალმასით, ქრიზოლითით, ონიქსით, იასპის ქვით, საფირონით, ზურმუხტით და ბივრილით და ოქროთი; იყო მოოჭვილი შენი დაირები და შენი სალამურები შენში, შენი შექმნის დღეს იქნენ ისინი დამზადებულნი.

¹⁴შენ ქერუბიმი ხარ, ცხებული, დამცველი. მე მიგიყვანე შენ ღმერთის წმიდა მთაზე, სადაც იყავი და ცეცხლის ქვებს შორის დადიოდი.

¹⁵უნაკლო იყავი შენს გზაზე შენი შექმნის დღიდან, სანამ არ აღმოჩნდა შენში უსამართლობა.

¹⁶შენს სავაჭროთა სიმრავლის გამო აივსო შენი შიგნეულობა ძალადობით და შესცოდე, და მე გადაგაგდე ღმერთის მთიდან და დაგღუპე შენ, მფარველო ქერუბიმო, ცეცხლის ქვებს შორის.

¹⁷აღზევდა შენი გული შენი მშვენების გამო, მოსპე შენი სიბრძნე შენი ბრწყინვალების გამო, მიწაზე დაგანარცხე, მეფეთა წინაშე დაგსვი სანახაობად.

¹⁸შენი მრავალი ურჯულოების გამო, შენი ვაჭრობის უსამართლობით შებღალე შენი საწმიდარნი, და ამოვიღე ცეცხლი შენი შუაგულიდან, მან შეგჭამა შენ. და მე გაქციე შენ ფერფლად მიწაზე ყველა შენი დამნახველის თვალწინ.

¹⁹ყველა შენი მცნობელი ხალხებში შეძრწუნდება შენს გამო, საშინელებად იქეცი და აღარ იქნები უკუნისამდე.’”

²⁰და იყო სიტყვა უფლისა ჩემდამი:

²¹“ძეო კაცისავ! მიმართე შენი პირი ციდონის მიმართ და იწინასწარმეტყველე მასზე.

²²და უთხარი: ‘ასე თქვა უფალმა ღმერთმა: აჰა, შენს წინააღმდეგ ვარ, ციდონო, და გამოვაცხადებ ჩემს დიდებას შენს შორის და მიხვდებიან, რომ მე ვარ უფალი, როდესაც აღვასრულებ მასში სამართალს და გამოვაცხადებ ჩემს სიწმიდეს მასში.

²³და მოვუვლენ მას შავ ჭირს და სისხლს მის ქუჩებში, და დაეცემიან მის შიგნით დახოცილნი მასზე მიმართული მახვილით ყოველი მხრიდან. და მიხვდებიან, რომ მე ვარ უფალი.

²⁴და აღარ ექნება ისრაელის სახლს მჩხვლეტავი ეკალი და მტკივნეული ხიწვი, ყველა მათ მოძულეთა შორის მათ ირგვლივ. და მიხვდებიან, რომ მე ვარ უფალი ღმერთი!’”

²⁵ასე თქვა უფალმა ღმერთმა: “ოდესაც მე შევკრებ ისრაელის სახლს ხალხებიდან, რომლებშიც არიან გაფანტულნი, გამოვაცხადებ ჩემს სიწმიდეს მათში ხალხების თვალში და დასახლდებიან თავიანთ მიწაზე, რომელიც მე მივეცი ჩემს მსახურს, იაკობს.

²⁶და დასახლდებიან მასზე უსაფრთხოდ, და ააშენებენ სახლებს, და ჩაყრიან ვენახებს და იცხოვრებენ უსაფრთხოდ, როდესაც მე აღვასრულებ სამართალს ყველა მათ მოძულეზე მათ ირგვლივ, მაშინ მიხვდებიან, რომ მე ვარ უფალი, მათი ღმერთი.”