Read სბს–სტოკჰოლმი 2001 ეზეკიელი 3 Bible Online

ეზეკიელი 3 - სბს–სტოკჰოლმი 2001 bible

ეზეკიელი 3

¹და მან მითხრა მე: “ძეო კაცისავ, რასაც იპოვი, ჭამე, ჭამე ეს გრაგნილი და წადი, ელაპარაკე ისრაელის სახლს.”

²და გავაღე მე პირი და მან შემაჭამა ეს გრაგნილი.

³და მითხრა მე: “ძეო კაცისავ! გამოკვებე შენი მუცელი და გაავსე შენი შიგნეული ამ გრაგნილით, რომელსაც მე გაძლევ შენ.” და მე შევჭამე ის და მეტკბო პირში, როგორც თაფლი.

⁴და მითხრა მე: “ძეო კაცისავ! წადი, მიდი ისრაელის სახლში და ელაპარაკე მათ ჩემი სიტყვებით,

⁵რადგან არა გაურკვეველი მეტყველებისა და მძიმე ენის ხალხთან ხარ გაგზავნილი, არამედ ისრაელის სახლთან.

⁶არა მრავალ გაურკვეველი მეტყველებისა და მძიმე ენის ხალხებთან, რომელთა ლაპარაკსაც ვერ გაიგებ. იმათთან რომ გამეგზავნე, ისინიც კი მოგისმენდნენ შენ,

⁷მაგრამ ისრაელის სახლი არ ისურვებს მოგისმინოს, რადგან მათ არ სურთ ჩემი მოსმენა, რადგან მთელი ისრაელის სახლი შუბლსასტიკი და გულჯიუტია.

⁸აჰა, მე გავხადე შენი სახე მაგარი მათი სახეების პირისპირ, შენი შუბლი - მაგარი მათი შუბლების პირისპირ.

⁹ალმასივით, რომელიც ქვაზე მაგარია, გავხადე შენი შუბლი. ნუ შეგეშინდება მათი და ნუ შეკრთები მათ სახეთაგან, რადგან მეამბოხე სახლია ისინი.”

¹⁰და მითხრა მე: “ძეო კაცისავ! ყოველი ჩემი სიტყვა, რომელსაც მე გეტყვი, შენს გულში მიიღე და შენი ყურით მოისმინე.

¹¹და წადი, მიდი გადასახლებულებთან, შენი ხალხის შვილებთან, და ელაპარაკე მათ და უთხარი: ‘ასე თქვა უფალმა ღმერთმა - მოისმენენ თუ არ მოისმენენ.’”

¹²და წამიყვანა მე სულმა და მომესმა ჩემს უკან ხმა, ძლიერი ხმაური: “კურთხეულია უფლის დიდება მისი ადგილიდან,”

¹³და ხმა ცხოველთა ფრთებისა, რომლებიც ერთმანეთს ეხლებოდნენ, და ხმა ბორბლებისა მათ გვერდით და ხმა ძლიერი ხმაურისა.

¹⁴და სულმა ამიტაცა მე და წამიყვანა, და წავედი მე გამწარებული და გაჯავრებული სულით, და უფლის ხელი მტკიცედ იყო ჩემზე.

¹⁵და მოვედი გადასახლებულებთან თელ-აბიბში, მსხდომებთან მდინარე ქებართან, და სადაც ისინი ისხდნენ, იქ დავჯექი შვიდ დღეს მათ შორის გაოგნებული.

¹⁶და შვიდი დღის ბოლოს იყო სიტყვა უფლისა ჩემს მიმართ:

¹⁷“ძეო კაცისავ! ისრაელის სახლის გუშაგად დაგაყენე და ჩემი პირიდან მოისმენ სიტყვას და გააფრთხილებ მათ ჩემგან.

¹⁸როდესაც მე ვეტყვი ბოროტმოქმედს: ‘მოკვდები!’ და შენ არ გააფრთხილებ მას მისი ბოროტი გზების გამო, რათა გადარჩეს, ის ბოროტმოქმედი თავის ურჯულოებაში მოკვდება, მის სისხლს კი შენი ხელიდან მოვიკითხავ.

¹⁹მაგრამ თუ გააფრთხილე ბოროტმოქმედი და ის არ მოიქცა თავისი ბოროტმოქმედებიდან და თავისი ბოროტი გზიდან, ის თავის ურჯულოებაში მოკვდება, შენ კი შენს სულს იხსნი.

²⁰და თუ მართალი განდგება თავისი სიმართლიდან და იქმს უსამართლობას, მაშინ მე დავდებ მის წინაშე დაბრკოლებას და მოკვდება იგი, რადგან არ გააფრთხილე. ის თავის ცოდვაში მოკვდება და არ მოიხსენება მისი მართალი საქმენი, რომელნიც გაუკეთებია. მის სისხლს კი შენი ხელიდან მოვიკითხავ.

²¹შენ კი, თუ გააფრთხილებ მართალს, რომ არ შესცოდოს, და არ შესცოდავს, გადარჩება, რადგან გაფრთხილდა. შენ კი იხსნი შენს სულს.”

²²და იყო ჩემზე იქ ხელი უფლისა და მითხრა: “ადექი, გადი ხეობისაკენ და იქ დაგელაპარაკები.”

²³ავდექი და გავედი ხეობისაკენ და აჰა, უფლის დიდება იდგა იქ, მსგავსი დიდებისა, რომელიც ვიხილე მდინარე ქებარის ნაპირზე. და პირქვე დავემხე.

²⁴და შემოვიდა ჩემში სული და დამაყენა ფეხზე, და მელაპარაკა და მითხრა: “წადი, ჩაიკეტე შენს სახლში.

²⁵და შენ, ძეო კაცისავ! აჰა, დაგადებენ ბორკილებს და შეგკრავენ ამით, და ვერ დააღწევ მათ თავს.

²⁶და შენს ენას მივაკრავ შენს სასას და დამუნჯდები, და აღარ ეყოლები მათ მამხილებელ კაცად, რადგან მეამბოხე სახლია ისინი.

²⁷და როცა დაგელაპარაკები, გავხსნი შენს პირს და ეტყვი მათ: ‘ასე თქვა უფალმა ღმერთმა: მსმენელმა ისმინოს! ვისაც არ სურს, ნუ მოისმენს, რადგან მეამბოხე სახლია ისინი!’”