Read სბს–სტოკჰოლმი 2001 ეზეკიელი 30 Bible Online

ეზეკიელი 30 - სბს–სტოკჰოლმი 2001 bible

ეზეკიელი 30

¹და იყო სიტყვა უფლისა ჩემდამი:

²“ძეო კაცისავ! იწინასწარმეტყველე და თქვი: ‘ასე თქვა უფალმა ღმერთმა: იქვითინეთ: ვაი იმ დღეს!

³რადგან ახლოს არის ის დღე და ახლოს არის დღე უფლისა, დღე ღრუბლიანი. დგება ხალხების ჟამი!

⁴და მოვა მახვილი ეგვიპტეზე და იქნება კრუნჩხვა ქუშში, როცა დაეცემიან ეგვიპტეში, წაიღებენ მის ავლა-დიდებას და დაანგრევენ მის საძირკვლებს.

⁵ქუში, ფუტი, ლუდი და მთელი არაბეთი, ლიბია და აღთქმის ქვეყნის ძენი მათთან ერთად, მახვილით დაეცემიან.‘

⁶ასე თქვა უფალმა: ‘დაეცემიან ეგვიპტის მხარდამჭერნი და დამდაბლდება სიამაყე მისი ძლიერებისა, მიგდოლიდან სევენემდე მახვილით დაეცემიან!’ - სიტყვა უფალი ღმერთისა. -

⁷‘და გაუდაბურდება ქვეყნებს შორის და მისი ქალაქები უკაცრიელ ქალაქთა შორის იქნებიან.

⁸და მიხვდებიან, რომ მე ვარ უფალი, როდესაც ცეცხლს მივცემ ეგვიპტეს და დაილეწება ყველა მისი შემწე.

⁹იმ დღეს გამოვლენ ჩემგან წარგზავნილნი ხომალდებით, რათა შეაშინონ უსაფრთხო ქუში. და იქნება მათში შიში ეგვიპტის დღეს, რადგან, აჰა, მოდის იგი.’

¹⁰ასე თქვა უფალმა ღმერთმა: ‘და მე ბოლოსმოვუღებ ეგვიპტის ხალხს ნაბუქოდონოსორის, ბაბილონის მეფის ხელით.

¹¹ის და მისი ხალხი მასთან ერთად, უსასტიკესნი ხალხთაგან, მოყვანილნი იქნებიან ამ ქვეყნის მოსასპობად, და გააშიშვლებენ მახვილებს ეგვიპტეზე, და გაავსებენ ქვეყანას დახოცილებით.

¹²და ამოვაშრობ მდინარეებს, და მივყიდი ამ ქვეყანას ბოროტთა ხელთ, და გავაუდაბურებ ქვეყანას და მის სისავსეს უცხოთა ხელით! მე, უფალმა, ვთქვი.’

¹³ასე თქვა უფალმა ღმერთმა: ‘გავანადგურებ კერპებს და გავწყვეტ ცრუღმერთებს ნოფში, და მთავარი აღარ იქნება ეგვიპტის ქვეყნიდან, და შიშის ზარს დავცემ ეგვიპტის ქვეყანას.

¹⁴და გავაუდაბურებ ფათროსს, და ცეცხლს წავუკიდებ ცოყანს, და სამართალს აღვასრულებ თებეში.

¹⁵და გადმოვღვრი ჩემს რისხვას სინზე, ეგვიპტის სიმაგრეზე, აღმოვფხვრი ხალხმრავლობას თებეში.

¹⁶და ცეცხლს წავუკიდებ ეგვიპტეს, ძრწოლით აწრიალდება ისინი და გაინგრევა თებე. ნოფს კი მტერი მოადგება დღისით.

¹⁷ჭაბუკნი ონისა და ფი-ბესეთისა მახვილით დაეცემიან და ტყვეობაში წავლენ.

¹⁸თახფანხესში დღე დაბნელდება, როცა დავლეწავ იქ ეგვიპტის უღელს. და შეწყდება მასში სიამაყე მისი ძლიერებისა, ღრუბელი დაფარავს მას და ტყვეობაში წავლენ მისი ასულნი.

¹⁹სამართალს აღვასრულებ ეგვიპტეზე და მიხვდებიან, რომ მე ვარ უფალი.”

²⁰მეთერთმეტე წელს, პირველი თვის მეშვიდე დღეს, იყო სიტყვა უფლისა ჩემდამი:

²¹“ძეო კაცისავ! მე გადავტეხე მკლავი ფარაონისა, ეგვიპტის მეფისა, და აჰა, არაა შეხვეული იგი, რათა მიეცეს განკურნება; არ შეკრულა, რომ გამაგრდეს მახვილის დასაჭერად.

²²ამიტომ ასე თქვა უფალმა ღმერთმა: ‘აჰა, ფარაონის, ეგვიპტის მეფის, წინააღმდეგ ვარ და გადავტეხ მის მკლავებს, მრთელსაც და გატეხილსაც, და გავაგდებინებ მახვილს ხელიდან.

²³და გავფანტავ ეგვიპტეს ხალხებში და გავაბნევ ქვეყნებში,

²⁴და გავამაგრებ ბაბილონის მეფის მკლავებს და მივცემ ჩემს მახვილს ხელში, ფარაონს კი გადავუტეხ მკლავებს და იკვნესებს სასიკვდილოდ დაჭრილის კვნესით მის წინაშე.

²⁵და გავამაგრებ ბაბილონის მეფის მკლავებს და ფარაონის მკლავნი დაეშვებიან. და მიხვდებიან, რომ მე ვარ უფალი, როცა მივცემ ჩემს მახვილს ბაბილონის მეფეს ხელში და მოიღერებს მას ეგვიპტის ქვეყანაზე.

²⁶და გავფანტავ ეგვიპტელებს ხალხებში და გავაბნევ მათ ქვეყნებში, და მიხვდებიან, რომ მე ვარ უფალი!’”