Read სბს–სტოკჰოლმი 2001 ეზეკიელი 34 Bible Online

ეზეკიელი 34 - სბს–სტოკჰოლმი 2001 bible

ეზეკიელი 34

¹და იყო სიტყვა უფლისა ჩემდამი:

²“ძეო კაცისავ! იწინასწამეტყველე ისრაელის მწყემსებზე, იწინასწამეტყველე და უთხარი მათ: ‘ასე თქვა უფალმა ღმერთმა: ვაი ისრაელის მწყემსებს, რომელნიც თავიანთ თავს მწყემსავენ. განა მწყემსებმა ცხვარი არ უნდა მწყემსონ?

³ქონს თქვენ ჭამთ, მატყლს იცვამთ და ჯანსაღ ცხვარს კლავთ, ცხვრის ფარას კი არ მწყემსავთ.

⁴სუსტებს არ ამაგრებთ და ავადმყოფს არ კურნავთ, მოტეხილს არ უხვევთ და გზააბნეულს არ აბრუნებთ, დაკარგულს არ კითხულობთ და ძალადობითა და სისასტიკით განაგებთ მათ.

⁵და დაიფანტნენ ისინი უმწყემსოდ და გახდნენ ველის ყველა მხეცის შესაჭმელნი.

⁶გზააბნეულია ჩემი ცხვარი ყველა მთაზე და ყველა მაღალ ბორცვზე და მთელი ქვეყნის პირზე დაიფანტა ჩემი ცხვარი და არ არის მომკითხავი და არც მძებნელი.’

⁷ამიტომ, მწყემსებო, ისმინეთ სიტყვა უფლისა:

⁸‘ცოცხალი ვარ მე!’ - სიტყვა უფალი ღმერთისა, - ‘იმის გამო, რომ ჩემი ცხვარი იყო გასაძარცვავად და ჩემი ცხვარი იყო ველის ყველა მხეცის შესაჭმელად უმწყემსოდ ყოფნის გამო და არ მოიკითხეს მწყემსებმა ჩემი ცხვარი, და მწყემსეს ამ მწყემსებმა თავიანთი თავი და ჩემი ცხვარი არ მწყემსეს,

⁹ამიტომ, მწყემსებო,’ ისმინეთ სიტყვა უფლისა!

¹⁰ასე თქვა უფალმა ღმერთმა: ‘აჰა, მწყემსების წინააღმდეგ ვარ და მოვიკითხავ ჩემს ცხვრებს მათი ხელიდან, და გადავაყენებ მათ ცხვრის მწყემსობიდან და აღარ დამწყემსავენ ის მწყემსები თავიანთ თავს, და ვიხსნი ჩემს ცხვრებს მათი პირიდან და აღარ იქნებიან მათ შესაჭმელად!’”

¹¹რადგან ასე თქვა უფალმა ღმერთმა: ‘თავად მე მოვიკითხავ ჩემს ცხვარს და მოვძებნი მას.

¹²როგორც ეძებს მწყემსი თავის ფარას თავის გაფანტულ ცხვარში ყოფნისას, ისე მოვძებნი ჩემს ცხვარს და ვიხსნი მათ ყველა ადგილიდან, სადაც გაიფანტნენ ღრუბლიან და ნისლიან დღეს.

¹³და გამოვიყვან მათ სხვადასხვა ხალხებიდან და შევაგროვებ ქვეყნებიდან და მოვიყვან თავიანთ მიწაზე, და დავმწყემსავ მათ ისრაელის მთებზე და ნაკადულებთან და ქვეყნის ყველა დასახლებაში.

¹⁴კარგ სამწყემსურში დავმწყემსავ მათ და ისრაელის მაღალ მთებში იქნება მათი საძოვარი. იქ დაწვებიან კარგ საძოვარზე და ნოყიერ სამწყემსურში დაიმწყემსებიან ისრაელის მთებზე.

¹⁵მე დავმწყემსავ ჩემს ცხვარს და დავაწვენ მათ საძოვრებზე!’” - სიტყვა უფალი ღმერთისა. -

¹⁶‘დაკარგულს მოვიკითხავ და გაბნეულს დავაბრუნებ, მოტეხილს შევუხვევ და ავადმყოფს გავამაგრებ, მსუქანსა და მაგარს გავანადგურებ. მე დავმწყემსავ მათ სამართლიანად.

¹⁷თქვენ კი, ჩემო ცხვარნო!’ - ასე თქვა უფალმა ღმერთმა, - ‘მე განმკითხავი ვარ კრავსა და კრავს შორის, ვერძებსა და ვაცებს შორის.

¹⁸განა ცოტაა თქვენთვის კარგ სამწყემსურზე მწყემსვა, რომ დანარჩენს თქვენს სამწყემსურზე ჰქელავთ ფეხებით, და დალექილ წყალს სვამთ და დარჩენილს ფეხებით ამღვრევთ?

¹⁹ჩემმა ცხვრებმა კი თქვენი ფეხებით გაქელილი უნდა ჭამონ და თქვენი ფეხებით ამღვრეული უნდა სვან?”

²⁰ამიტომ ასე უთხრა მათ უფალმა ღმერთმა: ‘აჰა, მე განვიკითხავ ჯანსაღ კრავსა და გამხდარ კრავს შორის.

²¹ვინაიდან გვერდსა და მხარს ჰკრავთ თქვენ და რქებით რქენთ ყველა სუსტს, სანამ არ გარეკავთ მათ გარეთ,

²²მე კი ვიხსნი ჩემს ცხვრებს და აღარ იქნებიან მეტად ნადავლად, და განვიკითხავ კრავსა და კრავს შორის.

²³და დავაყენებ მათზე ერთ მწყემსს - ჩემს მსახურს, დავითს, და ის დამწყემსავს მათ და ის იქნება მათი მწყემსი.

²⁴და მე, უფალი, ვიქნები მათთვის ღმერთი და ჩემი მსახური დავითი - მთავარი მათ შორის. მე, უფალმა, ვთქვი.

²⁵და მე დავდებ მათთან მშვიდობის აღთქმას და მოვსპობ ბოროტ ცხოველს ამ ქვეყნიდან. და იცხოვრებენ უდაბნოში უსაფრთხოდ და ტყეებში დაიძინებენ.

²⁶და მე ვაქცევ მათ და ჩემი ბორცვის შემოგარენს კურთხევად, და დავუშვებ წვიმას თავის დროზე და კურთხეული წვიმები იქნება ისინი.

²⁷და გამოიღებს მინდვრის ხე თავის ნაყოფს და მიწა გამოიღებს მოსავალს. და იქნებიან თავიანთ მიწაზე უსაფრთხოდ და მიხვდებიან, რომ მე ვარ უფალი, როდესაც დავლეწავ მათი უღლის ბორკილებს და ვიხსნი მათ მათი დამმონებლების ხელიდან.

²⁸და აღარ იქნებიან ხალხების ნადავლად და ქვეყნის მხეცები არ შეჭამენ მათ. იცხოვრებენ უსაფრთხოდ და არავინ იქნება მათი შემშინებელი.

²⁹და აღვუდგენ მათ ახალ ნერგს სახელისათვის და აღარ იქნებიან შიმშილისაგან წარტაცებულნი ამ ქვეყანაში და აღარ დაითმენენ ხალხთაგან შეურაცხყოფას.

³⁰და მიხვდებიან, რომ მე, მათი უფალი ღმერთი ვარ მათთან: ისინი კი, სახლი ისრაელისა ჩემი ხალხია!’ - სიტყვა უფალი ღმერთისა. -

³¹‘და თქვენ ჩემი ცხვარი ხართ, ცხვარი ჩემი სამწყსოსი - ადამიანები ხართ თქვენ, მე კი თქვენი ღმერთი!’” - სიტყვა უფალი ღმერთისა.