Read სბს–სტოკჰოლმი 2001 ეზეკიელი 36 Bible Online

ეზეკიელი 36 - სბს–სტოკჰოლმი 2001 bible

ეზეკიელი 36

¹“და შენ, ძეო კაცისავ! იწინასწარმეტყველე ისრაელის მთებზე და თქვი: ‘მთანო ისრაელისა, ისმინეთ უფლის სიტყვა.

²ასე თქვა უფალმა ღმერთმა: იმის გამო, რომ მტერმა თქვა თქვენს წინააღმდეგ: “აჰა”, და ‘მარადიული მაღლობები ჩვენი გახდნენ,’”

³ამიტომ იწინასწარმეტყველე და თქვი: ‘ასე თქვა უფალმა ღმერთმა: იმიტომ აგაოხრეს და ისწრაფვიან თქვენს გადაყლაპვას ყოველი მხრიდან, რათა გახდეთ მემკვიდრეობა ხალხის ნატამალისა და მიეცეთ სალაპარაკოდ და საჭორაოდ.’

⁴ამიტომ, ისრაელის მთებო, ისმინეთ სიტყვა უფალი ღმერთისა: ‘ასე უთხრა უფალმა ღმერთმა მთებსა და ბორცვებს, კალაპოტებსა და ხეობებს, აოხრებულ ნანგრევებსა და მიტოვებულ ქალაქებს, რომელნიც იყვნენ ნადავლად და დასაცინად იმ ხალხთა ნატამალისა, რომელნიც ირგვლივ არიან.’

⁵ამიტომ ასე თქვა უფალმა ღმერთმა: ‘ხომ ჩემი რისხვის ცეცხლში ვამბობდი ამ ხალხების ნატამალზე და მთელ ედომზე, რომელთაც მიითვისეს ჩემი ქვეყანა მემკვიდრეობად მთელი გულის სიხარულით, სულის ზიზღით, რათა მისი სანახები გაძარცულიყო.’

⁶ამიტომ იწინასწარმეტყველე ისრაელის მიწაზე და უთხარი მთებსა და ბორცვებს, კალაპოტებსა და ხეობებს: ‘ასე თქვა უფალმა ღმერთმა: აჰა, ჩემი შურით და რისხვით ვამბობდი, რადგან ხალხთაგან შეურაცხყოფას ითმენდით!’

⁷ამიტომ ასე თქვა უფალმა ღმერთმა: ‘მე ავწიე ჩემი ხელი, რომ ხალხები, რომელნიც თქვენს ირგვლივ არიან, ითმენენ თავიანთ შეურაცხყოფას.

⁸თქვენ კი, მთანო ისრაელისა, გაშლით თქვენს ტოტებს და თქვენს ნაყოფს მოუტანთ ჩემს ერს, ისრაელს, რადგან მალე მოვლენ.

⁹რადგან, აჰა, მე თქვენსკენ ვარ და მოგმართავთ თქვენ, და დამუშავდებით და დაითესებით.

¹⁰და გავამრავლებ თქვენზე ადამიანს, მთელ ისრაელის სახლს, მთლიანად, და დასახლდება ქალაქები და ნანგრევები აშენდება.

¹¹და გავამრავლებ თქვენზე ადამიანსა და საქონელს და გამრავლდებიან და ინაყოფიერებენ. და დაგასახლებთ წინანდებურად და უკეთესად მოგექცევით, ვიდრე თქვენს დასაბამში, და მიხვდებით, რომ მე ვარ უფალი.

¹²და გავატარებ თქვენზე ადამიანს, ჩემს ერს, ისრაელს და დაგიმკვიდრებენ და იქნები მათი წილი და მეტად აღარ იქნები უშვილო.’

¹³და თქვა უფალმა ღმერთმა: ‘რადგან გეუბნებიან თქვენ: “ადამიანის მჭამელი ხარ შენ და შენი ერი უშვილო ჰყავი!”

¹⁴ამიტომ ადამიანებს აღარ შეჭამ მეტად და შენს ერს აღარ დასტოვებ უშვილოდ!’ სიტყვა უფალი ღმერთისა.

¹⁵‘და აღარ მოვასმენინებ შენზე ხალხთაგან ლანძღვას, და ხალხთაგან შეურაცხყოფას აღარ მოითმენ და შენს ერს აღარ დააბრკოლებ!’ - სიტყვა უფალი ღმერთისა.

¹⁶და იყო სიტყვა უფლისა ჩემდამი:

¹⁷“ძეო კაცისავ! ისრაელის სახლმა, მცხოვრებმა თავის მიწაზე, შებილწა იგი თავისი მოქმედებით. როგორც უწმიდურება წიდოვანისა, ისეთი იყო მათი გზა ჩემს წინაშე.

¹⁸და გადმოვაღვარე ჩემი რისხვა მათ იმ სისხლის გამო, რომელიც დაღვარეს ქვეყანაზე და თავიანთი კერპებით შებილწეს იგი.

¹⁹და გავფანტე ისინი ხალხებში და განვაბნიე ქვეყნებში. მათი გზისამებრ და მათი მოქმედებისამებრ განვსაჯე ისინი.

²⁰და მივიდნენ ისინი ხალხებთან, სადაც მოვიდნენ, და შებღალეს ჩემი წმიდა სახელი, რადგან ეუბნებოდნენ მათ: უფლის ერია ესენი და მისი ქვეყნიდან გამოვიდნენ.

²¹და შევიბრალე სახელი ჩემი წმიდასი, რომელიც შებღალა ისრაელის სახლმა ხალხებში, რომლებთანაც მივიდნენ.

²²ამიტომ უთხარი ისრაელის სახლს: ‘ასე თქვა უფალმა ღმერთმა: თქვენი გულისთვის არ ვაკეთებ ამას, სახლო ისრაელისა, არამედ ჩემი წმიდა სახელისათვის, რომელიც შებღალეთ ხალხებში, რომლებთანაც მიხვედით.

²³და მე გავწმედ ჩემს დიდებულ სახელს, შებღალულს ხალხებში, რომელიც შებღალეთ თქვენ მათ შორის. და მიხვდებიან ხალხები, რომ მე ვარ უფალი!’ - სიტყვა უფალი ღმერთისა, - ‘როდესაც წმიდად გამოვცხადდები თქვენში მათ თვალწინ.

²⁴და აგიყვანთ ხალხებიდან და შეგაგროვებთ ყველა ქვეყნიდან და მოგიყვანთ თქვენს მიწაზე.

²⁵და გასხურებს წმიდა წყალს, და განიწმიდებით მთელი თქვენი სიბილწისაგან და ყველა თქვენი კერპისაგან განგწმედთ თქვენ.

²⁶და მოგცემთ თქვენ ახალ გულს და ახალ სულს ჩავდებ თქვენში, ამოგარიდებთ ქვის გულს თქვენი ხორციდან და მოგცემთ ხორცის გულს.

²⁷ჩემს სულს ჩავდებ თქვენში და გავაკეთებ ისე, რომ ჩემი წესებით ივლით და ჩემს სამართალს დაიცავთ და შეასრულებთ.

²⁸და დასახლდებით ქვეყანაში, რომელიც თქვენს მამებს მივეცი და იქნებით ჩემს ერად და მე ვიქნები თქვენს ღმერთად.

²⁹მე გიხსნით თქვენ ყველა თქვენი სიბილწისაგან. მოვუხმობ ხორბალს და გავამრავლებ მას და არ მოვავლენ თქვენზე შიმშილს.

³⁰გავამრავლებ ხის ნაყოფს და მინდვრის მოსავალს, რათა აღარ ითმინოთ შიმშილის სირცხვილი ხალხებში.

³¹და გაიხსენებთ თქვენს ბოროტ გზებს და თქვენს მოქმედებას, რომელიც უკეთურია, და შეგძაგდებათ თქვენი თავი თქვენი ურჯულოებისა და თქვენს სისაძაგლეთა გამო.

³²თქვენი გულისთვის არ ვაკეთებ ამას,’ - სიტყვა უფალი ღმერთისა, - ‘იცოდეთ თქვენ! შერცხვით და გაწბილდით თქვენი გზების გამო, ისრაელის სახლო.’

³³ასე თქვა უფალმა ღმერთმა: ‘იმ დღეს, როდესაც მე განგწმედთ თქვენი ყველა ურჯულოებისაგან და დავასახლებ თქვენს ქალაქებს და აშენდება ნანგრევები

³⁴და ეს გაუდაბურებული მიწა დამუშავდება იმის ნაცვლად, რომ უდაბნო იყო ყოველი გამვლელის თვალში,

³⁵და იტყვიან: ‘ეს გაუდაბურებული ქვეყანა ედემის ბაღად იქცა, და აოხრებული, გაუდაბურებული და დანგრეული ქალაქები გამაგრდა და აშენდა.

³⁶და მიხვდებიან ხალხები, რომლებიც თქვენს ირგვლივ დარჩებიან, რომ მე, უფალმა, აღვადგინე დანგრეული, გავაშენე გაუდაბურებული! მე, უფალმა, ვთქვი და გავაკეთე!’

³⁷ასე თქვა უფალმა ღმერთმა: ‘კიდევ ამ სათხოვარს ავუსრულებ ისრაელის სახლს, რომ ცხვრის ფარასავით ვუმრავლებ მათ ადამიანებს.

³⁸როგორც საღვთო ცხვარი, როგორც იერუსალიმის ცხვარი მის დღესასწაულებში, ისე იქნებიან გაუდაბურებული ქალაქები სავსე ადამიანთა სამწყსოთი, და მიხვდებიან, რომ მე ვარ უფალი.’”