Read სბს–სტოკჰოლმი 2001 ეზეკიელი 38 Bible Online

ეზეკიელი 38 - სბს–სტოკჰოლმი 2001 bible

ეზეკიელი 38

¹და იყო სიტყვა უფლისა ჩემდამი:

²“ძეო კაცისავ! მიმართე შენი პირი გოგისკენ, მაგოგის ქვეყანაში, როშის, მეშექისა და თუბალის უმაღლესი მთავრისკენ და იწინასწარმეტყველე მასზე.

³და უთხარი: ‘ასე თქვა უფალმა ღმერთმა: აჰა, შენს წინააღმდეგ ვარ, გოგ, როშის, მეშექისა და თუბალის უმაღლესო მთავარო!

⁴და მოგატრიალებ შენ და გაგიყრი ჩანგლებს ყბებში და გამოგიყვან შენ და მთელ შენს ლაშქარს, ცხენებს და მხედრებს, ბრწყინვალედ შემოსილთ, ყველას, დიდ ბრბოს აბჯრითა და ფარით, ყველა მათ, მახვილის დამჭერთ,

⁵სპარსეთს, ქუშსა და ფუტს მათთან ერთად, ყველას ფარითა და მუზარადით,

⁶გომერს და მთელ მის რაზმს, თოგარმას სახლს ჩრდილოეთის კიდეგანიდან და მის ყველა რაზმს, მრავალ ხალხს შენთან ერთად.

⁷მზად იყავი და გაემზადე შენ და მთელი შენი კრებული, შენთან შემოკრებილი, და იყავი მათი გუშაგი.

⁸მრავალი დღის შემდეგ იქნები გახსენებული, უკანასკნელ წლებში მოხვალ შენ მახვილისაგან თავდახსნილ, მრავალი ხალხით შეკრებილ ქვეყანაში, ისრაელის მთებზე, რომლებიც აოხრებულნი იყვნენ მუდამ, ის კი ხალხებიდან იქნა გამოყვანილი და უსაფრთხოდ ცხოვრობენ ყველანი.

⁹აღიმართები, მოხვალ როგორც ქარიშხალი, ღრუბელივით დაფარავთ ქვეყანას შენ და შენი ურდო და უამრავი ხალხები შენთან ერთად.”

¹⁰ასე თქვა უფალმა ღმერთმა: ‘და იმ დღეს აღგეძვრება ფიქრები გულში და განიზრახავ ბოროტ განზრახვას,

¹¹და იტყვი: ‘გავილაშქრებ გაუმაგრებელ ქვეყანაზე, დავეცემი მშვიდად, უსაფრთხოდ მცხოვრებთ, რომლებიც უკედლებოდ ცხოვრობენ ყველანი და ურდულები და კარებები არა აქვთ,

¹²რათა გავძარცვო და მოვიხვეჭო, ვიალაფო და ჩემი ხელი მოვაქციო ახლად დასახლებულ ნანგრევებზე და ხალხებიდან შეგროვილ ერზე, რომელმაც შეიძინა ფარა და დოვლათი, რომლებიც ცხოვრობენ ქვეყნის ჭიპში.”

¹³შება და დედანი და ვაჭარნი თარშიშისა და მისი ლომის ბოკვერნი გეტყვიან შენ: ‘ჩვენ გასაძარცვავად მოხვედი? ნადავლის მოსაპოვებლად შეკრიბე შენი კრებული, წასაღებად ვერცხლისა და ოქროსი, წასაყვანად ფარისა და დოვლათისა, დიდი ძარცვით საძარცვავად?’”

¹⁴ამოტომ იწინასწარმეტყველე, ძეო კაცისავ, და უთხარი გოგს: ‘თქვა უფალმა ღმერთმა: განა იმ დღეს, როდესაც ჩემი ერი, ისრაელი, უსაფრთხოდ იცხოვრებს, არ გეცოდინება ეს?

¹⁵და მოხვალ შენი ადგილიდან, ჩრდილოეთის კიდეგანიდან, შენ და ბევრი ხალხები შენთან ერთად, ყველანი ცხენებზე ამხედრებულნი, დიდი კრებული და დიდძალი ლაშქარი.

¹⁶და აღიმართები ჩემს ერზე, ისრაელზე, როგორც ღრუბელი, რათა დაფარო ეს ქვეყანა. უკანასკნელ დღეებში მოხდება ეს და მე მოგიყვან შენ ჩემი ქვეყნის წინააღმდეგ, რათა გამიცნონ მე ხალხებმა, როდესაც წმიდად გამოვცხადდები შენში მათ თვალწინ, გოგ!’

¹⁷ასე თქვა უფალმა ღმერთმა: ‘განა შენ ის არა ხარ, რომელზეც ვამბობდი მე პირვანდელ დღეებში ჩემს მსახურთა, ისრაელის წინასწარმეტყველთა ხელით, რომელნიც წინასწარმეტყველებდნენ იმ დღეებში, რომ მიგიყვანდი მათ წინააღმდეგ.

¹⁸და იქნება იმ დღეს, გოგის მოსვლის დღეს ისრაელის მიწაზე,’ სიტყვა უფალი ღმერთისა, ‘აღიძვრება ჩემი რისხვა ჩემს გულისწყრომაში,

¹⁹და ჩემი შურით, ჩემი მძვინვარების ცეცხლით ვამბობ მე: ‘მართლაც იმ დღეს იქნება დიდი ძვრა ისრაელის მიწაზე.

²⁰და შეირყევიან ჩემს წინაშე ზღვის თევზნი და ცის ფრინველნი, და მინდვრის ცხოველნი და ყველა ქვეწარმავალი, მცოცავნი მიწაზე, და ყოველი ადამიანი, რომელიც მიწის პირზეა. და ჩამოინგრევა მთები და ჩამოიქცევა ბილიკები და ყველა ზღუდე დაეცემა ქვეყანაზე.

²¹და მოვუხმობ მის წინააღმდეგ ჩემს ყველა მთაზე მახვილს,” - სიტყვა უფალი ღმერთისა, - ‘ერთმანეთის წინააღმდეგ იქნება მახვილი.

²²და განვსჯი მას შავი ჭირით და სისხლით, წარმღვნელი წვიმით და ქვის სეტყვით. ცეცხლსა და გოგირდს ვაწვიმებ მასზე და მის რაზმებზე და მრავალ ხალხზე, რომელნიც მასთან არიან.

²³და გამოვცხადდები დიდებით და სიწმიდით, და განვითქვები მრავალი ხალხის თვალწინ და მიხვდებიან, რომ მე ვარ უფალი.’”