Read სბს–სტოკჰოლმი 2001 ეზეკიელი 4 Bible Online

ეზეკიელი 4 - სბს–სტოკჰოლმი 2001 bible

ეზეკიელი 4

¹“და შენ, ძეო კაცისავ, აიღე შენთვის აგური და დაიდე წინ და დახაზე მასზე ქალაქი იერუსალიმი.

²და გამოხატე მისი ალყა, ააშენე მის წინააღმდეგ სიმაგრე და აღმართე მის წინააღმდეგ მიწაყრილი, და განალაგე მის წინააღმდეგ ბანაკები, და შემოაწყვე მის წინააღმდეგ ირგვლივ კედლის სანგრევი მანქანები.

³შენ კი, აიღე შენთვის რკინის ტაფა და დადგი იგი რკინის კედლად შენსა და ქალაქს შორის, და მიმართე შენი პირი მისკენ და ალყაში იქნება, და შემოარტყი ალყა. ეს იქნება ნიშანი ისრაელის სახლისათვის.

⁴და დაწექი მარცხენა გვერდზე და დადე ისრაელის სახლის ურჯულოება მასზე. და რამდენ დღესაც იწვები მასზე, იმდენ ხანს ატარებ მათ ურჯულოებას.

⁵და მე დაგიწესე მათი ურჯულოების წლები დღეების რიცხვის მიხედვით: სამას ოთხმოცდაათი დღე. და ატარებ ურჯულოებას ისრაელის სახლისა.

⁶და შეასრულე ეს და დაწექი მეორედ შენს მარჯვენა გვერდზე და ატარე ურჯულოება იუდას სახლისა ორმოც დღეს. ერთი დღე ერთი წლისთვის მოგეცი მე.

⁷იერუსალიმის ალყისაკენ მიმართე შენი პირი და შიშველი მკლავი და იწინასწარმეტყველე მასზე.

⁸და მე დაგადებ შენ ბორკილებს და ვერ გადატრიალდები ერთი გვერდიდან მეორე გვერდზე შენი ალყის დღეების დასრულებამდე.

⁹შენ კი, აიღე შენთვის ხორბალი და ქერი, ცერცვი და ოსპი, ფეტვი და ასლი და ჩაყარე ერთ ჭურჭულში და გაიკეთე ისინი შენ პურად. იმ დღეთა რიცხვის მიხედვით, რამდენსაც შენ იწვები შენს გვერდზე, სამას ოთხმოცდაათ დღეს, ჭამე იგი.

¹⁰საჭმელი, რომელსაც შენ შეჭამ, წონით ოც შეკელს დღეში, ჟამიდან ჟამზე ჭამე.

¹¹და წყალი წყვით სვი, მეექვსედი ჰინი, ჟამიდან ჟამზე სვი.

¹²და ქერის კვერად ჭამე იგი და ადამიანის განავალში გამოაცხვე მათ თვალწინ.”

¹³და თქვა უფალმა: “ასე შეჭამენ ისრაელის ძენი თავიანთ უწმიდურ პურს იმ ხალხებში, რომლებთანაც განვდევნი მათ.”

¹⁴და ვთქვი: “ოჰ, უფალო, ღმერთო! აჰა, ჩემი სული არ შებილწულა და მძორი და ნამხეცავი არ მიჭამია ჩემი სიჭაბუკიდან დღემდე და ჩემს პირში არ ჩასულა ბინძური ხორცი.”

¹⁵და მან მითხრა: “ნახე! მე მოგეცი შენ ძროხის სკორე ადამიანის განავალის ნაცვლად და მათზე მოამზადე შენი პური.”

¹⁶და კიდევ მითხრა: “ძეო კაცისავ! აჰა, მე დავლეწავ პურის არგანს იერუსალიმში და ისინი შეჭამენ პურს წონით და დარდით, და წყალს წყვითა და სასოწარკვეთილებით შესვამენ.

¹⁷რათა მოაკლდეთ მათ პური და წყალი, და შეძრწუნდნენ კაცი და მისი მახლობელი და დალპნენ თავიანთ ურჯულოებაში.”