Read სბს–სტოკჰოლმი 2001 ეზეკიელი 41 Bible Online

ეზეკიელი 41 - სბს–სტოკჰოლმი 2001 bible

ეზეკიელი 41

¹და მიმიყვანა მან ტაძარში და გაზომა სვეტები: ექვსი წყრთა სიგანე ერთი მხრიდან და ექვსი წყრთა სიგანე მეორე მხრიდან. ეს იყო სიგანე იმ კარვისა,

²სიგანე შესასვლელისა - ათი წყრთა და გვერდები შესასვლელისა - ხუთი წყრთა ერთი მხრიდან და ხუთი წყრთა მეორე მხრიდან. გაზომა მისი სიგრძე - ორმოცი წყრთა და სიგანე - ოცი წყრთა.

³და შევიდა ის შიგნით და გაზომა შესასვლელის სვეტები - ორი წყრთა და შესასვლელი - ექვსი წყრთა, და შესასვლელის სიგრძე - შვიდი წყრთა.

⁴და გაზომა მისი სიგრძე, რომელიც იყო ოცი წყრთა და სიგანე ოცი წყრთა, ტაძრის პირდაპირ. და მითხრა: ‘ეს წმიდათა წმიდაა.’

⁵და გაზომა სახლის კედელი - ექვსი წყრთა და სიგანე გვერდითი ოთახისა - ოთხი წყრთა გარშემო, სახლის ირგვლივ.

⁶და გვერდითი ოთახები - გვერდი-გვერდ - ოცდაცამეტი და აღწევდნენ კედლამდე, რომელიც სახლს ჰქონდა ოთახებისათვის გარშემო, რათა ყოფილიყვნენ ერთმანეთს მიყრდნობილი, მაგრამ არ იყვნენ მიყრდნობილი სახლის კედელს.

⁷და ფართოვდებოდა და იხვეოდა მაღლა მიმავალი საფეხურები გვერდითა ოთახებისაკენ, რადგან დახვეული საფეხურები სახლისა მიიწევდნენ მაღლა-მაღლა, სახლის ირგვლივ, ამიტომ განიერდებოდა სახლის სიმაღლის კვალობაზე და, ამგვარად, ქვედა სართულიდან ზედაზე ადიოდნენ შუას საშუალებით.

⁸ვნახე, რომ სახლს ირგვლივ ჰქონდა შვერილი, საფუძველი გვერდითი ოთახებისა - მთელი ლერწამი, ექვსი წყრთა.

⁹გვერდითი ოთახების გარეთა კედლის სისქე იყო ხუთი წყრთა.

¹⁰ხოლო ხანი სახლის გვერდით ოთახებსა და სენაკებს შორის იყო ოცი წყრთა ირგვლივ.

¹¹შესასვლელი გვერდითი ოთახისა გადიოდა დატოვებულ ადგილზე: ერთი შესასვლელი ჩრდილოეთით იყო და მეორე შესასვლელი - სამხრეთით. დატოვებული ადგილის სიგანე - ხუთი წყრთა ირგვლივ.

¹²ტაძრის დარბაზისაკენ მიქცეული შენობა, სამხრეთის მხარეს მდებარე: სიგანე იყო სამოცდაათი წყრთა. და შენობის კედელი - ხუთი წყრთა სიგანისა და მისი სიგრძე - ოთხმოცდაათი წყრთა.

¹³და მან გაზომა ეს სახლი: სიგრძე ასი წყრთა, და ტაძრის დარბაზი და მისი შენობა და მისი კედლები, სიგრძით ასი წყრთა.

¹⁴სიგანე სახლის წინა ნაწილისა და ტაძრის დარბაზისა აღმოსავლეთით - ასი წყრთა.

¹⁵გაზომა მან სიგრძე შენობისა ტაძრის დარბაზის პირდაპირ, რომელიც მის უკან იყო, და მისი დერეფნები ორივე მხრიდან - ასი წყრთა. და შიგნითა ტაძარი და ეზოს დარბაზები,

¹⁶ზღურბლები და დახშული სარკმელები და დერეფნები ირგვლივ, სამივე ზღურბლის საპირისპიროდ, ხის დაფები ირგვლივ და მიწიდან სარკმელებამდე. სარკმელები კი დახურული იყო.

¹⁷შესასვლელის ზემოდან და შიგნითა სახლამდე და გარეთ და ყველა კედლების ირგვლივ და გარეთ ყველაფერი თანაზომიერი იყო.

¹⁸და გამოხატული იყო ეს ქერუბიმები და პალმები. და პალმა იყო ქერუბიმსა და ქერუბიმს შორის და ორი სახე ჰქონდა ქერუბიმს:

¹⁹ადამიანის სახე იყო მიმართული პალმისაკენ ერთი მხრიდან და ლომის ბოკვერის სახე პალმისაკენ მეორე მხრიდან. ასე იყო გაკეთებული მთელ სახლში, ირგვლივ.

²⁰მიწიდან შესასვლელის ზედა ნაწილამდე ქერუბიმები და პალმები გაკეთებული იყო ტაძრის კედლებზეც.

²¹ტაძრის კარის წირთხლი ოთხკუთხედი იყო. და წმიდის წინამო იმავე შესახედაობისა იყო.

²²ხის სამსხვერპლო იყო სამი წყრთა სიმაღლით და მისი სიგრძე იყო ორი წყრთა. მისი კუთხეები, მისი საფუძველი და მისი კედლები ხისა იყო; და მითხრა მან: “ეს არის მაგიდა, რომელიც უფლის წინაშეა.”

²³ორი კარი ჰქონდათ ტაძარსაც და წმიდასაც.

²⁴თითოეულ კარს ორი ფრთა ჰქონდა, ორივე ტრიალდებოდა. ორი ფრთა ერთ კარს და ორი ფრთა მეორე კარს.

²⁵ტაძრის კარებზე ქერუბიმები და პალმები იყო გამოხატული, როგორც კედლებზე. ძელი დარბაზის წინ იყო, გარედან.

²⁶და ცხაურიანი სარკმელნი და პალმები ორივე მხრიდან დარბაზის გვერდებზე და სახლის მონაშენები და ძელები.