Read სბს–სტოკჰოლმი 2001 დანიელი 11 Bible Online

დანიელი 11 - სბს–სტოკჰოლმი 2001 bible

დანიელი 11

¹დარიოს მიდიელის პირველ წელს მე შემწედ და მფარველად დავუდექი მას.

²ახლა ჭეშმარიტებას გეტყვი: აჰა, სპარსეთში კიდევ სამი მეფე დადგება. მეოთხე კი ყველას გადააჭარბებს დიდძალი სიმდიდრით და, როდესაც თავისი სიმდიდრით გაძლიერდება, ყველას იავანის სამეფოს წინააღმდეგ აამხედრებს.

³დადგება იქ ძლიერი მეფე, დიდი ხელმწიფებით იხელმწიფებს და, რასაც მოისურვებს, იმას გააკეთებს.

⁴მისი დადგომისთანავე შეიმუსრება მისი სამეფო და ზეცის ოთხ ქარს გაუნაწილდება და არა მის შთამომავლობას, თუმცა არა იმ ხელმწიფებით, რომლითაც ის ხელმწიფებდა, რადგან წაერთმევა სამეფო და სხვების იქნება, არა მათი.

⁵გაძლიერდება სამხრეთის მეფე, მაგრამ მასზე მეტად გაძლიერდება ერთ-ერთი მისი მთავართაგანი და ხელმწიფებას მოიხვეჭს. მისი ხელმწიფება დიდი ხელმწიფება იქნება.

⁶წლების მერე ისინი კავშირს შეკრავენ. სამხრეთის მეფის ასული ჩრდილოეთის მეფესთან მივა წრფელი პირობის შესაკვრელად, მაგრამ ასული ვერ შეინარჩუნებს თავისი მკლავის ძალას და ვერც მეფე და მისი მოდგმა გაძლებს. გადაცემულ იქნება ასული თავისი ამალით, თავისი შვილებითა და თავისი შემწითურთ იმ ხანებში.

⁷მისი ფესვიდან მორჩი ამოვა მის ადგილზე. გამოილაშქრებს ჯარის წინააღმდეგ და ჩრდილოეთის მეფის ციხე-სიმაგრეში შეიჭრება. გაუსწორდება მათ და გაიმარჯვებს.

⁸თვით მის ღმერთებსაც კი ეგვიპტეში წაასხამს ტყვედ, ჩამოსხმული კერპებითა და ოქრო-ვერცხლის ძვირფასი ჭურჭლეულითურთ, და წლობით ჩამოეხსნება ჩრდილოეთის მეფეს.

⁹ის კი გაილაშქრებს სამხრეთის სამეფოზე, მაგრამ უკან დაბრუნდება თავის ქვეყანაში.

¹⁰მისი ვაჟები იარაღს აისხამენ და დიდ ურდოს შეყრიან. ერთ-ერთი მათგანი წამოვა, წალეკავს და გადაივლის. მერე შემობრუნდება და მის ციხე-სიმაგრემდე იომებს.

¹¹გამძვინვარდება სამხრეთის მეფე და გამოვა და შეებრძოლება მას, ჩრდილოეთის მეფეს, იგი დიდ ურდოს გამოიყვანს, მაგრამ ეს ურდო მის ხელში ჩავარდება.

¹²როდესაც ურდო წარიხვეტება, გადიდგულდება და ათი ათასებს დასცემს, მაგრამ ვერ გაძლიერდება.

¹³რადგან ჩრდილოეთის მეფე პირვანდელზე დიდ ურდოს შეჰყრის და რამდენიმე წლის დასასრულს მოვა დიდი ურდოთი და დიდძალი სიმდიდრით.

¹⁴იმ ხანებში მრავალნი აღუდგებიან სამხრეთის მეფეს და მეამბოხენი წამოიმართებიან შენი ხალხიდან ხილვის აღსასრულებლად, მაგრამ წაიფორხილებენ ისინი.

¹⁵მოვა ჩრდილოეთის მეფე, მიწაყრილებს მოაწყობს და ციხე-ქალაქს დაიპყრობს. სამხრეთის ძალები ვერ გაუწევენ წინააღმდეგობას და ვერც რჩეული ხალხი. აღარ იქნება ძალა წინააღმდეგობის გასაწევად.

¹⁶თავის ნებაზე მოიქცევა მის წინააღმდეგ გამოსული და წინ ვერავინ აღუდგება. იგი მშვენიერ ქვეყანაში დადგება და მის ხელში იქნება დაღუპვა.

¹⁷განიზრახავს, რომ გაილაშქროს მთელი თავისი სამეფოს ძლიერებით და თავისი მთავრებითურთ, და შეასრულებს კიდეც. და თავის ასულს ცოლად მისცემს მას, რათა დაღუპოს, მაგრამ არ მოხდება ეს და არც მისი იქნება.

¹⁸პირს კუნძულებისკენ იბრუნებს და მრავალს დაიპყრობს, მაგრამ ვინმე მთავარი აღკვეთს მის შერცხვენას, მაგრამ მისი შერცხვენა დაუბრუნდება მას.

¹⁹ამის შემდეგ თავისი ქვეყნის ციხე-სიმაგრეებისკენ იბრუნებს პირს, მაგრამ წაიფორხილებს, დაეცემა და ვეღარ იპოვნიან.

²⁰მის ნაცვლად ვიღაც დადგება, რომელიც გზირებს გაგზავნის მეფური ბრწყინვალებით, მაგრამ რამდენიმე დღეში დაიღუპება, თუმცა არც მრისხანებაში, არც ომში.

²¹მის ნაცვლად ათვალწუნებული კაცი დადგება, რომელსაც სამეფო პატივი არ ექნება მიღებული. იგი მშვიდობიანობაში მოვა და მზაკვრობით დაეუფლება სამეფოს.

²²წამლეკავი ურდოები წაილეკება მის წინაშე და შეიმუსრება. ასევე თვით ღთქმის მთავარიც.

²³რადგან მასთან კავშირის შეკვრის შემდეგ, მზაკვრულად იმოქმედებს, აღზევდება და გაძლიერდება ერთი მუჭა ხალხის შემწეობით.

²⁴მშვიდობიანობისას შეიჭრება ქვეყნის ნაყოფიერ მხარეებში და ისეთ რამეს ჩაიდენს, რაც არც მის მამებს და არც მის მამის მამებს არ ჩაუდენიათ. ნაალაფარს, ნაძარცვ ქონებასა და დოვლათს გაუნაწილებს თავისიანებს, ციხე-სიმაგრეებისკენ ექნება ზრახვები, მაგრამ დრომდე.

²⁵აღძრავს თავის ძალასა და გულს სამხრეთის მეფის წინააღმდეგ დიდძალი ლაშქრით. სამხრეთის მეფეც დიდძალი და მეტისმეტად ძლიერი ლაშქრით გამოვა საომრად, მაგრამ მას ვერ გაუძლებს, რადგან ზრახვები იქნება განზრახული მის წინააღმდეგ.

²⁶მისი თანამეინახენი შემუსრავენ მას. წაილეკება მისი ლაშქარი და მრავალი მოკლული დაეცემა.

²⁷ორთავე მეფეს გულში მზაკვრობა ექნება. სიცრუეს ილაპარაკებენ ერთ სუფრაზე, მაგრამ ვერ წარემართებათ, რადგან აღსასრული კვლავ მოსასვლელია დათქმულ ჟამს.

²⁸დიდძალი დოვლათით გაბრუნდება ის თავის ქვეყანაში, მაგრამ მისი გული წმიდა აღთქმის წინააღმდეგ ექნება მიმართული. შეასრულებს მას და თავის ქვეყანაში დაბრუნდება.

²⁹დათქმულ ჟამს დაბრუნდება და მოვა სამხრეთში, მაგრამ პირვანდელივით არ იქნება ეს უკანასკნელი.

³⁰ქითიმის ხომალდები წამოვლენ მის წინააღმდეგ და დაფრთხება იგი, დაბრუნდება და გაშმაგდება წმიდა აღთქმაზე და იმოქმედებს. დაბრუნდება და მიხედავს წმიდა აღთქმის მიმტოვებელთ.

³¹წამოდგებიან მისგან ურდოები და შებილწავენ საწმიდარს, ციხე-სიმაგრეს და გააუქმებენ მუდმივ მსხვერპლს, და გატიალების სიბილწეს დაამყარებენ.

³²აღთქმის მიმართ უკეთურად მოქმედთ მზაკვრობით აცდუნებს, თავისი ღმერთის მცოდნე ხალხი კი მტკიცედ დადგება და იმოქმედებს.

³³ჩემი ხალხიდან განბრძნობილნი კი მრავალთ შთააგონებენ, თუმცა კი ერთხანს ევნებიან მახვილით, ცეცხლით, ტყვეობითა და ძარცვით.

³⁴დაცემისას მცირეოდენ შეწევნას მიიღებენ და მრავალი მიემხრობა მათ თვალთმაქცურად.

³⁵ზოგიერთი განბრძნობილთაგანი დაეცემა, რათა გამოიბრძმედოს, გასუფთავდეს და განსპეტაკდეს უკანასკნელ ჟამამდე, რადგან ჯერ კიდევ მოსასვლელია დათქმული დრო.

³⁶თავის ნებაზე მოიქცევა მეფე: თავს აღიზევებს და განიდიდებს ყველა ღმერთზე და საკვირველებებს ილაპარაკებს ღმერთთა ღმერთის წინააღმდეგ, და წარმატებული იქნება გულისწყრომის დასრულებამდე, რადგან ნაბრძანები აღსრულდება.

³⁷იგი არც მამების ღმერთებს ჩააგდებს რამედ, არც ქალთა სანუკვარს და არც ყველა სხვა ღმერთს ჩააგდებს რამედ, რადგან ყველაზე განიდიდებს თავს.

³⁸სამაგიეროდ ციხე-სიმაგრეთა ღმერთს განადიდებს, ღმერთს, რომელსაც მისი მამები არ იცნობდნენ, ოქრო-ვერცხლით, ძვირფასი ქვებითა და სხვა ძვირფასეულობით განადიდებს.

³⁹ისინი მოქმედებენ უმტკიცესი ციხე-სიმაგრეების წინააღმდეგ უცხო ღვთის შეწევნით, ვინც მას აღიარებს, დიდებას გაუმრავლებს, მრავალზე ახელმწიფებს და მიწებს დაურიგებს საზღაურად.

⁴⁰აღსასრულის ჟამს სამხრეთის მეფე შეებმება მას და ქარტეხილივით ეკვეთება ჩრდილოეთის მეფე ეტლებით, მხედრებითა და უამრავი ხომალდით. შეიჭრება ქვეყნებში, წალეკავს და გადაივლის.

⁴¹მივა მშვენიერ ქვეყანაში, და მრავალი მხარე დაეცემა. ესენი გადაურჩებიან მის ხელს: ედომი, მოაბი და ყამონის ძეთა დასაბამი.

⁴²ხელს მოუღერებს ქვეყნებს და ეგვიპტის ქვეყანაც კი ვერ გადარჩება.

⁴³დაეპატრონება იგი ოქრო-ვერცხლის საგანძურებსა და ეგვიპტის ყველა ძვირფასეულობას. და ფეხდაფეხ მიჰყვებიან ლიბიელნი და ნუბიელნი.

⁴⁴მაგრამ აღმოსავლეთიდან და ჩრდილოეთიდან მოსული ხმები შეაწუხებს მას და დიდი რისხვით გამოვა მრავალთა გასაწყვეტად და გასაჟლეტად.

⁴⁵დასცემს თავის სეფე-კარვებს ზღვასა და მშვენიერ წმიდა მთას შორის. მერე მიატანს თავის ბოლომდე და ვეღარავინ უშველის მას.