Read სბს–სტოკჰოლმი 2001 დანიელი 12 Bible Online

დანიელი 12 - სბს–სტოკჰოლმი 2001 bible

დანიელი 12

¹იმ დროს აღდგება მიქაელი, დიდი მთავარი, შენი ხალხის შვილთა მფარველად მდგომი. ისეთი ვაების დრო მოვა, ხალხის არსებობიდან ამ დრომდე რომ არ ყოფილა. იმ დროს შენი ხალხიდან ყველა გადარჩება, ვინც კი წიგნში ჩაწერილი აღმოჩნდება.

²და მრავალი მიწის მტვერში მიძინებულთაგანი გამოიღვიძებს, ზოგი საუკუნო სიცოცხლისათვის, ზოგი საუკუნო გმობისთვის და შერცხვენისთვის.

³განბრძნობილნი განათდებიან, როგორც ცის მყარის ნათება და მრავალთა სამართლისკენ მომაქცეველნი - როგორც ვარსკვლავები უკუნითი უკუნისამდე.

⁴შენ კი, დანიელ, დაფარე ეს სიტყვები და დაბეჭდე ეს წიგნი უკანასკნელ ჟამამდე. მრავალი დაიწყებს ძიებას და იმატებს ცოდნა.”

⁵მაშინ მე, დანიელმა, გავიხედე და აჰა, ჩემს წინ ორი სხვა იდგა: ერთი მდინარის გამოღმა ნაპირზე, ერთი გაღმა ნაპირზე.

⁶უთხრა მან სელით შემოსილ კაცს, მდინარის წყლების ზევით რომ იდგა: “როდის იქნება ამ საკვირველებათა ბოლო?”

⁷მოვუსმინე სელით შემოსილ კაცს, მდინარის წყლების ზევით რომ იდგა. ზეცისკენ აღაპყრო მან მარჯვენა და მარცხენა და დაიფიცა მარადცოცხალი, რომ ეს იქნებოდა დათქმული ჟამისა და ჟამის ნახევრისთვის. და როდესაც გათავდება წმიდა ერის ძალის მუსვრა, ყოველივე ეს აღსრულდება.

⁸მოვისმინე, მაგრამ ვერ მივხვდი და ვუთხარი: “უფალო ჩემო, რა იქნება ამის შემდეგ?”

⁹თქვა: “წადი, დანიელ, რადგან ეს სიტყვები დაფარული და დაბეჭდილია ბოლო ჟამამდე.

¹⁰მრავალი გასუფთავდება, განსპეტაკდება და გამოიწრთობა. ხოლო უკეთურნი იუკეთურებენ და ვერც ერთი უკეთური ვერ მიხვდება, ხოლო განბრძნობილნი მიხვდებიან.

¹¹მუდმივი მსხვერპლის გაუქმებისა და გატიალების სიბილწის დადგომიდან ათას ორას ოთხმოცდაათი დღე გავა.

¹²ნეტარია მომლოდინე და მიმღწევი ათას სამას ოცდათხუთმეტი დღისა!

¹³შენ კი გასწიე შენი აღსასრულისაკენ. განისვენებ და აღდგები შენი წილის მისაღებად დღეთა აღსასრულისას.”