Read სბს–სტოკჰოლმი 2001 დანიელი 8 Bible Online

დანიელი 8 - სბს–სტოკჰოლმი 2001 bible

დანიელი 8

¹მეფე ბელშაცარის მეფობის მესამე წელს ხილვა მეჩვენა მე, დანიელს, მას შემდეგ, რაც პირველად მეჩვენა.

²ვხედავდი ხილვაში და ჩემს ხილვაში სატახტო ქალაქ შუშანში ვიყავი, ყელამის ქვეყანაში რომ არის. დავინახე ხილვაში, რომ მდინარე ულაის პირას ვიდექი.

³თვალები ავახილე და დავინახე: აჰა, მდინარის პირას ერთი ერკემალი დგას, ორი რქა აქვს, ორთავე გრძელი. ერთი რქა მეორეზე გრძელია, და ის გრძელი უფრო გვიან ამოვიდა.

⁴დავინახე, ეს ერკემალი ირქინებოდა დასავლეთისკენ, ჩრდილოეთისკენ, სამხრეთისკენ. წინ ვერცერთი მხეცი ვერ უდგებოდა და ვერც ვერავინ ახერხებდა მისგან თავდახსნას. რასაც უნდოდა, იმას სჩადიოდა და იზრდებოდა.

⁵როდესაც მე ამას ვუკვირდებოდი, აჰა, დასავლეთიდან ერთი ვაცი მოდიოდა, მთელი დედამიწის ზურგზე გამოექანა, მიწას ფეხს არ აკარებდა; ვაცს თვალებს შუა საჩინო რქა ჰქონდა.

⁶მოვიდა იგი იმ ორრქიან ერკემალთან, მდინარის პირას მდგომი რომ ვნახე, და თავისი ძალის მრისხანებით მიეჭრა მას.

⁷დავინახე, იგი მიუახლოვდა ერკემალს, რისხვა აეშალა მასზე, დაეტაკა ერკემალს და ორთავე რქა მოსტეხა. ძალა არ ეყო ერკემალს, რომ წინაღდგომოდა. მან მიწას დაანარცხა იგი და გაქელა, და არავინ იყო ერკემლის მხსნელი მისი ხელიდან.

⁸მაშინ ძალზე განდიდდა ვაცი. როდესაც გაძლიერდა, მაშინ მოსტყდა მას დიდი რქა და მის ადგილზე ოთხი საჩინო რქა ამოუვიდა ზეცის ოთხი ქარის მიმართულებით.

⁹ერთ-ერთი მათგანიდან ერთი მომცრო რქა ამოვიდა, რომელიც მეტისმეტად გაიზარდა სამხრეთის, აღმოსავლეთისა და მშვენიერი ქვეყნის მიმართულებით.

¹⁰იგი ცის მხედრობამდე გაიზარდა, მიწაზე დასცა მხედრობისა და ვარსკვლავების ნაწილი და გაქელა ისინი.

¹¹იგი ამ მხედრობის მთავრამდე გაიზარდა და წაერთვა მთავარს მუდმივი მსხვერპლი და დამხობილ იქნა მისი საწმიდარის ადგილი.

¹²მხედრობა მიცემულ იქნა მუდმივ მსხვერპლთან ერთად დანაშაულის გამო და მან მიწაზე დაამხო ჭეშმარიტება და მოქმედებდა და წარემართებოდა.

¹³გავიგონე, ერთი წმიდა ლაპარაკობდა. უთხრა ამ ერთმა წმიდამ ვიღაცას, რომელიც ლაპარაკობდა: “როდემდე გასტანს ეს ხილვა მუდმივ მსხვერპლზე და გატიალების დანაშაულზე, საწმიდარზე და მხედრობაზე, რომელიც უნდა გაიქელოს?”

¹⁴მითხრა: “ორიათას სამას საღამოსა და დილას გასტანს და ამის შემდეგ აღდგება საწმიდარი.”

¹⁵როცა მე, დანიელმა, ვნახე ეს ხილვა და ვცდილობდი მის გაგებას, აჰა, ჩემს წინ ვიღაც იდგა, კაცის იერის მქონე.

¹⁶და შემომესმა კაცის ხმა შუაგულ ულაიდან. დაიძახა მან და თქვა: “გაბრიელ, აუხსენი მაგას ეგ ხილვა!”

¹⁷და მოვიდა იმ ადგილას, სადაც მე ვიდექი. მისი მოსვლისთანავე თავზარი დამეცა და პირქვე დავემხე. მითხრა: “იცოდე, ადამის ძეო, რომ ეს ხილვა აღსასრულის ჟამს შეეხება.”

¹⁸რომ მელაპარაკებოდა, ძილქუში დამეცა მიწაზე პირქვე გართხმულს. მაშინ ის შემეხო და ჩემს ადგილას დამაყენა.

¹⁹და მითხრა: “აჰა, გამცნებ, რა მოხდება რისხვის დასასრულს, რადგან ეს აღსასრულის დათქმულ ჟამს შეეხება.

²⁰ორრქიანი ერკემალი რომ ნახე, ეს მიდიისა და სპარსეთის მეფეებია,

²¹ხოლო ის ვაცი იავანის მეფეა; თვალებს შუა ამოსული დიდი რქა მისი პირველი მეფეა.

²²ის რქა მოტყდა და მის ნაცვლად ოთხი ამოვიდა - ოთხი სამეფო აღდგება მისი ხალხიდან, მაგრამ მათ მისებრი ძალა არ ექნებათ.

²³მათი სამეფოს აღსასრულისას, როდესაც დამნაშავენი თავისას აღასრულებენ, აღდგება წინდაუხედავი და ორპირობაში გაწაფული.

²⁴განმტკიცდება მისი ძლიერება, ოღონდ არა მისი საკუთარი ძალით. საკვირვლად გაანადგურებს და წარემართება და იმოქმედებს, და გაანადგურებს ძლიერებს და წმიდათა ერს.

²⁵და თავისი მზაკვრობის მეშვეობით სიცრუეს წარმატებას მიაღწევინებს მის ხელში. განდიდდება იგი თავის გულში და მშვიდობიანობაში მრავალს დაღუპავს. წინ აღუდგება მთავართა მთავარს და შეიმუსრება, ოღონდ არა ხელით.

²⁶ხოლო მწუხრისა და დილის ხილვა, რომელზეც ითქვა, ჭეშმარიტია იგი. მაგრამ დამალე ეს ხილვა, რადგან შორეულ დღეებს შეეხება იგი.”

²⁷მე, დანიელი, დავუძლურდი და რამდენიმე დღე ვიავადე. მერე ავდექი და მეფის საქმეებს შევუდექი. გაკვირვებული ვიყავი ამ ხილვით, მაგრამ ვერას მივმხვდარიყავი.