Read სბს–სტოკჰოლმი 2001 ამოსი 1 Bible Online

ამოსი 1 - სბს–სტოკჰოლმი 2001 bible

ამოსი 1

¹ამოსის, თეკოაყელი მწყემსის სიტყვები, რომლებიც იხილა მან ისრაელის გამო იუდას მეფის ყუზიას დროს და ისრაელის მეფის იერობყამ იოაშის ძის დროს, მიწისძვრამდე ორი წლით ადრე.

²თქვა: “უფალი იგრგვინებს სიონიდან და ხმას გამოსცემს ისრაელიდან; ატირდებიან მწყემსთა საძოვრები და გახმება ქარმელის მწვერვალი.

³სამ დანაშაულს ვაპატიებ დამასკოს, მეოთხეს აღარ ვაპატიებ, რადგან რკინის უროებით ნაყავდნენ გილყადს.

⁴ცეცხლს შევუნთებ ხაზაელის სახლს და ცეცხლი შეჭამს ბენ-ჰადადის დარბაზებს.

⁵დავლეწავ დამასკოს ურდულებს, ამოვძირკვავ ავენის ხეობის მკვიდრთ და ყედენის სახლის კვერთხის მპყრობელს; გადაიხვეწება არამის ხალხი კირში”, - ამბობს უფალი.

⁶ასე თქვა უფალმა: “სამ დანაშაულს ვაპატიებ ღაზას, მეოთხეს აღარ ვაპატიებ, რადგან დედაბუდიანად გადახვეწეს ისრაელი, რომ ედომს დარჩენოდა ქვეყანა.

⁷ცეცხლს წავუკიდებ ღაზას გალავანს და ცეცხლი შთანთქავს მის დარბაზებს.

⁸ამოვძირკვავ აშდოდის მკვიდრთ და აშკელონელ კვერთხის მპყრობელს; ყეკრონზეც შევმართავ ხელს და საბოლოოდ გაწყდება ფილისტიმელთა ნატამალი,” - ამბობს უფალი.

⁹ასე ამბობს უფალი: “სამ დანაშაულს ვაპატიებ ცორს, მეოთხეს აღარ ვაპატიებ, რადგან ტყვედ ჩაუგდეს მთელი ხალხი ედომს, აღარ გაიხსენეს ძმური აღთქმა.

¹⁰ცეცხლს წავუკიდებ ცორის გალავანს და ცეცხლი შთანთქავს მის დარბაზებს.”

¹¹ასე ამბობს უფალი: “სამ დანაშაულს ვაპატიებ ედომს, მეოთხეს აღარ ვაპატიებ, რადგან მახვილით ხელში დევნიდა თავის ძმას, ჩაიხშო სიბრალული, მუდამ ბრდღვინავს რისხვით და ბრაზს ინახავს გულში.

¹²ცეცხლს წავუკიდებ თემანს და ცეცხლი შთანთქავს ბოცრას დარბაზებს.”

¹³ასე თქვა უფალმა: “სამ დანაშაულს ვაპატიებ ყამონელებს, მეოთხეს აღარ ვაპატიებ, რადგან ფატრავდნენ ორსულ ქალებს გილყადში, რომ გაეფართოვებინათ თავიანთი საზღვრები.

¹⁴ცეცხლს წავუკიდებ რაბას გალავნებს და ცეცხლი შთანთქავს მის დარბაზებს ყიჟინით ბრძოლის დღეს, ქარბორბალათი ქარიშხლიან დღეს.

¹⁵ტყვედ ჩავარდება მათი მეფე დიდებულებთან ერთად”, - ამბობს უფალი.