Read სბს–სტოკჰოლმი 2001 ამოსი 2 Bible Online

ამოსი 2 - სბს–სტოკჰოლმი 2001 bible

ამოსი 2

¹ასე ამბობს უფალი: “სამ დანაშაულს ვაპატიებ მოაბს, მეოთხეს აღარ ვაპატიებ: კირად გამოწვა ედომის მეფის ძვლები.

²ცეცხლს წავუკიდებ მოაბს და შთანთქავს კერიოთის დარბაზებს; მოკვდება მოაბი აურზაურში, საომარ ყიჟინაში და საყვირის ხმაზე.

³ამოვძირკვავ მსაჯულს მისი წიაღიდან და დავხოცავ ყველა მთავარს მასთან ერთად,” - ამბობს უფალი.

⁴ასე ამბობს უფალი: “სამ დანაშაულს ვაპატიებ იუდას, მეოთხეს აღარ ვაპატიებ, რადგან უკუაგდო უფლის რჯული და არ იცავენ მის წესებს; რადგან გზა-კვალი აურიეს მათ ცრუღმერთებმა, რომელთაც მათი მამები მისდევდნენ.

⁵ცეცხლს წავუკიდებ იუდას და შთანთქავს იერუსალიმის დარბაზებს.

⁶ასე ამბობს უფალი: “სამ რამეს ვაპატიებ ისრაელს, მეოთხეს აღარ ვაპატიებ, რადგან ვერცხლზე ჰყიდიან მართალს და ღარიბ-ღატაკს - წყვილი ხომალდისათვის.

⁷მიწის მტვერს ნატრულობენ უმწეოთა თავზე და გზიდან აცდენენ ბეჩავ ხალხს; შვილი და მამა ერთ ქალთან შედიან ჩემი წმინდა სახელის შესალახავად.

⁸გირაოში წამოღებულ სამოსელზე გართხმულან ყოველ სამსხვერპლოსთან, და გამოძალულ ღვინოს სვამენ ღვთის სახლში.

⁹გავანადგურებ ამორეველს მის წინაშე, კედარივით რომ ამაღლდა და მუხასავით გამაგრდა; გავანადგურებ მაღლა მის ნაყოფს და დაბლა მის ფესვებს.

¹⁰იმისთვის გამოგიყვანეთ ეგვიპტის ქვეყნიდან და ორმოცი წელი გატარეთ უდაბნოში, რომ დაგემკვიდრებინათ ამორეველთა ქვეყანა.

¹¹შენს ძეთა შორის აღვძარი წინასწარმეტყველნი, და შენს ყრმათა შორის - მოწმიდარნი. ასე არ იყო, ისრაელიანებო?” - ამბობს უფალი.

¹²“თქვენ კი ღვინოს ასმევდით მოწმიდარებს და უბრძანებდით წინასწარმეტყველთ, ნუ წინასწარმეტყველებთო!

¹³აჰა, გადაგჯეგავთ, როგორც ძნებით სავსე ურემი ჯეგავს.

¹⁴მკვირცხლი დაკარგავს სირბილის უნარს და ძლიერი ძალას ვერ მოიცემს; მამაცი კაცი თავს ვერ დაიხსნის.

¹⁵მშვილდის მპყრობელი ვერ გაუძლებს, ვერც ფეხმარდი ვერ გადარჩება და ვერც მხედარი ვერ იხსნის თავს.

¹⁶გულმაგარიც კი მამაცთა შორის შიშველი გაიქცევა იმ დღეს”, - ამბობს უფალი.