Read სბს–სტოკჰოლმი 2001 ამოსი 4 Bible Online

ამოსი 4 - სბს–სტოკჰოლმი 2001 bible

ამოსი 4

¹ისმინეთ ეს სიტყვა, ბაშანის ფურებო, სამარიის მთებზე რომ ხართ, რომ ავიწროებთ ბეჩავთ, ღარიბ-ღატაკთ, რომ ეუბნებით თქვენს პატრონებს; “მოგვიტანე, რომ დავლიოთ!”

²დაიფიცა უფალმა ღმერთმა თავისი სიწმიდე: “და აჰა, დაგიდგებათ დღე და თქვენ კაუჭებით წაგათრევენ და თქვენს შთამომავლებს თევზების ანკესებით.

³ერთმანეთის მიყოლებით გახვალთ კედლის განანგრევში და დააგდებთ სასახლეს,”- ამბობს უფალი. -

⁴“წადით ბეთლემში და შესცოდეთ; გილგალში ამრავლეთ ცოდვები, ყოველ დილას მიიტანეთ თქვენი მსხვერპლი და ყოველ მესამე დღეს - თქვენი მეათედები.

⁵შესწირეთ მადლი უფუარიდან, გაახმაურეთ თქვენი ნებაყოფლობითი შესაწირი და ქვეყანას გააგებინეთ; რადგან ეს გიყვართ, ისრაელიანებო”, - ამბობს უფალი ღმერთი.

⁶“აკაწკაწებული კბილები მოგეცით ყველა თქვენს ქალაქში, და უპურობა - ყველა თქვენს ადგილზე, მაინც არ მოქცეულხართ ჩემსკენ,” - ამბობს უფალი. -

⁷“წვიმაც კი შეგიწყვიტე მკამდე სამი თვით ადრე; ვაწვიმებდი ერთ ქალაქზე და მეორე ქალაქზე არ ვაწვიმებდი; ერთი ყანა წვიმით ირწყვებოდა, მეორე ყანა კი უწვიმარი ხმებოდა.

⁸მიეხეტებოდა ორი-სამი ქალაქი ერთ ქალაქში წყლის სასმელად და ვერ იკლავდნენ წყურვილს; მაინც არ მოქცეულხართ ჩემსკენ,” - ამბობს უფალი.

⁹“მუსრი გაგავლეთ ჟანგით და სიყვითლით; თქვენი უამრავი ბაღები და ვენახები, ლეღვები და ზეთისხილი კალიამ გადაჭამა, და მაინც არ მოქცეულხართ ჩემსკენ”, - ამბობს უფალი. -

¹⁰“შეგყარეთ ჭირი ეგვიპტის გზაზე, ვხოცავდი მახვილით თქვენს ყრმებს თქვენს ნაალაფარ ცხენებთან ერთად, და თქვენი ბანაკების სიმყრალე თქვენს ნესტოებს მივაწვდინე; მაინც არ მოქცეულხართ ჩემსკენ” - ამბობს უფალი.-

¹¹“დაგაქციეთ, როგორც ღმერთმა სოდომი და გომორა, და მაინც არ მოქცეულხართ ჩემსკენ,” - ამბობს უფალი. -

¹²“ამიტომ ასე მოგექცევი, ისრაელო, და რაკი ამას დაგმართებ, გაემზადე შენი ღვთის შესახვედრად, ისრაელო!”

¹³რადგან, აჰა, მთათა გამომსახველი და ქარის შემქმნელი, კაცისთვის მისი ფიქრის გამომცხადებელი, ნათლის ბნელად გარდამქცეველი და ქვეყნის სიმაღლეთა გამთელავი, უფალი ცაბაოთ ღმერთია მისი სახელი!