Read სბს–სტოკჰოლმი 2001 ამოსი 5 Bible Online

ამოსი 5 - სბს–სტოკჰოლმი 2001 bible

ამოსი 5

¹ისმინეთ ეს სიტყვა, თქვენზე რომ ვამბობ, როგორც საგოდებელს, ისრაელის სახლო!

²დაეცა, ვეღარ დგება ისრაელის ქალწული; მიწაზე გართხმულა, არავინაა მისი წამომყენებელი!

³რადგან ასე ამბობს უფალი ღმერთი: “ქალაქს, ათასის გამომყვანს, ასიღა შერჩა და ასის გამომყვანს ათიღა შერჩა ისრაელის სახლიდან.”

⁴რადგან ასე ეუბნება უფალი ღმერთი ისრაელის სახლს: “მეძებეთ და ცოცხალი დარჩებით!

⁵ნუ ეძებთ ბეთელს და გილგალში ნუ მიდიხართ, ბეერ-შებაყში ნუ დაიარებით; რადგან დატყვევდება გილგალი და ბეთელი გაცამტვერდება.

⁶ეძებეთ უფალი და ცოცხალი დარჩებით, რომ ცეცხლივით არ წაეკიდოს იოსების სახლს შთასანთქმელად, რადგან არავინ იქნება ჩამქრობი ბეთელში.

⁷სამართალს აბზინდად რომ აქცევთ და სიმართლეს მიწად რომ თელავთ!”

⁸რომელმაც შექმნა ხომლი და ორიონი, რომელიც წყვდიადს დილად გადააქცევს და დღეს ღამესავით აბნელებს, რომელიც უხმობს ზღვის წყლებს და მიწის პირზე მოაქცევს, უფალია მისი სახელი.

⁹დაქცევით დაატყდება თავს ძლიერს და ეწევა დაქცევა ციხე-სიმაგრეს.

¹⁰შეიძულეს სამსჯავროში მამხილებელი და წრფელად მოუბარი შეიძაგეს.

¹¹ამიტომ, რაკი თრგუნავთ ბეჩავ ხალხს და უკანასკნელ ლუკმას აცლით, თლილი ქვებით ააგებთ სახლებს, მაგრამ იქ ვერ იცხოვრებთ; საუცხოო ვენახებს გააშენებთ, მაგრამ ვერ შესვამთ მათ ღვინოს.

¹²რადგან ვუწყი უამრავი შენი დანაშაული და მძიმე ცოდვები: მართალს ავიწროებთ, ქრთამს იღებთ და სამსჯავროდან დევნით ღარიბ-ღატაკთ.

¹³ამიტომაც დუმს ბრძენი კაცი ასეთ დროში, რადგან ეს ცუდი დროებაა.

¹⁴ეძიეთ სიკეთე და არა ბოროტება, რათა ცოცხალი დარჩეთ; ცაბაოთ უფალიც თქვენთან იქნება, როგორც თქვენ ამბობთ.

¹⁵შეიძულეთ ბოროტი და კეთილი შეიყვარეთ; დაამკვიდრეთ სამსჯავროში სამართალი, ვინძლო შეიწყალოს უფალმა, ცაბაოთ ღმერთმა, იოსების ნატამალი!

¹⁶რადგან ასე ამბობს უფალი, ცაბაოთ ღმერთი: “ყველა ქუჩაზე გლოვა იქნება, და იტყვიან ყველა შუკაში: ‘ვაი, ვაი!’ მოუხმობენ მიწის მუშაკს საგოდებლად და საგლოვად - მოტირალებს.

¹⁷ყველა ვენახში გლოვა იქნება, როცა მე გავივლი შენს წიაღში,” - ამბობს უფალი.

¹⁸ვაი, უფლის დღის მონატრულთ! რისთვის გინდათ უფლის დღე? ბნელია ის და არა ნათელი.

¹⁹როგორც ლომისგან გაქცეულ კაცს დახვდება დათვი, ან სახლში მისული მიეყუდება კედელს და გველი უკბენს.

²⁰განა ბნელი არ არის უფლის დღე და არა ნათელი? წყვდიადია და შუქის ნატამალი არ არის მასში.

²¹“მძულს, მეზიზღება თქვენი დღესასწაული და ვეღარ ვისუნთქავ თქვენს ზეიმებზე!

²²აღარ ვიღებ თქვენს აღსავლენებს და ძღვენს, ზედაც არ ვუყურებ ნასუქალ ხარებს, სამადლობელ მსხვერპლად რომ მწირავთ.

²³გამარიდეთ თქვენი სიმღერების ხმაური, თქვენი ქნარის ხმის მოსმენა აღარ მსურს.

²⁴წყალივით იდინოს სამართალმა და იყოს სიმართლე დაუწყვეტელ ნაკადულივით.

²⁵განა მოგქონდათ ჩემთან მსხვერპლი და ძღვენი ორმოცი წლის მანძილზე უდაბნოში, ისრაელის სახლო?

²⁶დაატარებდით თქვენი მოლოქის და ქიუნის კარავს, თქვენს კერპებს და თქვენი ღმერთების ვარსკვლავს, თქვენსავე ნაკეთებს.

²⁷ამიტომაც დამასკოს იქით გადაგასახლებთ,” - ამბობს უფალი, ცაბაოთ ღმერთია მისი სახელი.