Read სბს–სტოკჰოლმი 2001 აბდია 1 Bible Online

აბდია 1 - სბს–სტოკჰოლმი 2001 bible

აბდია 1

¹ხილვა აბდიასი. ასე ბრძანა უფალმა ედომზე - ხმა მოგვწვდა უფლისგან, მაცნეები დაეგზავნათ ხალხებს, “ადექით, გავიდეთ მათთან საბრძოლველად!

²აჰა, დაგამცირე ხალხთა შორის, აბუჩად ხარ აგდებული!

³შენმა მზვაობრობამ შეგაცდინა, კლდის ნაპრალებში დასახლებულხარ, მაღალზეა შენი სადგომი. გულში ამბობ: “ვინ ჩამომაგდებს ძირს?’

⁴არწივივით მაღლაც რომ აიჭრა, ვარსკვლავთა შორისაც რომ დაიბუდო, იქიდანაც ჩამოგაგდებ”, - ამბობს უფალი.-

⁵“ქურდებიც რომ დაგცემოდნენ თავს, ღამის ყაჩაღები - ასე არ გაჩანაგდებოდი. მხოლოდ თავის სამყოფს მოიპარავდნენ ისინი. ყურძნის მკრეფავნიც რომ შემოგსეოდნენ, ორიოდე კუფხალი მათაც გადაურჩებოდათ.

⁶როგორ გაძარცულა ესავი, როგორ გაუხვეტიათ მისი საგანძურები!

⁷საზღვრამდე მიგრეკავენ შენი მოკავშირენი, გიმუხთლებენ და დაგძალავენ შენი მოზავენი, შენს პურზე გამოზრდილნი მახეს დაგიგებენ (გონიერება არ არის მასში).

⁸განა ეს იმავე დღეს მოხდება, - ამბობს უფალი, - როცა ბრძენკაცებს მოვსპობ ედომში და გონიერებას - ესავის მთაზე?

⁹შედრკებიან შენი ვაჟკაცები, თემანო, რადგან ამოვარდება კაცის სახსენებელი ესავის მთაზე ხოცვა-ჟლეტის შემდეგ.

¹⁰იმის გამო, რომ უსამართლოდ ექცეოდი შენს ძმას, იაკობს, სირცხვილი დაგფარავს და სამუდამოდ გადაშენდები.

¹¹იმ დღეს, როცა მის წინაშე იდექი, როცა ურჯულოებმა ტყვედ წაასხეს მისი ერი, როცა უცხო თესლი შემოვიდა მის კარიბჭეში და წილი ჰყარა იერუსალიმზე - შენც ერთი იმათგანი იყავი!

¹²არ უნდა გეცქირა შენი ძმის დღისთვის, მისი შავი დღისთვის; არ უნდა გეხარა იუდაელებზე მათი დაღუპვის დღეს, ჭირის დღეს არ უნდა გეტრაბახა.

¹³არ უნდა შესულიყავი ჩემი ერის კარიბჭეში მისი დაღუპვის დღეს. არ უნდა გეცქირა მისი დაღუპვის დღეს, ხელი არ უნდა გეხლო მისი ქონებისათვის მისი დაღუპვის დღეს.

¹⁴არ უნდა მდგარიყავი გზაჯვარედინზე მისი ლტოლვილების გასაწყვეტად, არ უნდა გაგეცა მისი ნატამალი ჭირის დღეს.

¹⁵რადგან ახლოა უფლის დღე ყველა ხალხისათვის, როგორც იქცეოდი, ისე მოგექცევიან, სამაგიერო მოგეზღვება.

¹⁶როგორც თქვენ გისვამთ ჩემს წმიდა მთაზე, ისევე შესვამს ყოველი ხალხი გამუდმებით; შესვამს და ამოხვრეპს, თითქოს არც არაფერი ყოფილიყოს.

¹⁷სიონის მთაზე მოვა ნატამალი და წმიდა იქნება იგი. თავის სამკვიდრებელს დაიმკვიდრებს იაკობის სახლი.

¹⁸იაკობის სახლი ცეცხლი იქნება და იოსების სახლი - ალი, ხოლო ესავის სახლი - ნამჯა. მოედება და შთანთქავს მას. ვერავინ გადარჩება ესავის სახლიდან, რადგან უფალმა ბრძანა.

¹⁹სამხრეთი დაიმკვიდრებს ესავის მთას და ბარი - ფილისტიმელთა ქვეყანას. დაიმკვიდრებენ ეფრემის მხარეს და სამარიის მხარეს, ბენიამინი კი - გილყადს.

²⁰ისრაელიანთა განთესილი ერი ცარფათამდე დაიმკვიდრებს ქანაანს, სეფარადში განთესილი იერუსალიმი სამხრეთის ქალაქებს დაიმკვიდრებს.

²¹ავლენ გამარჯვებულნი სიონის მთაზე ესავის მთის განსაკითხავად და უფლისა იქნება სამეფო.