Read სბს–სტოკჰოლმი 2001 რიცხვნი 13 Bible Online

რიცხვნი 13 - სბს–სტოკჰოლმი 2001 bible

რიცხვნი 13

¹და შემდეგ აიყარა ხალხი ხაცეროთიდან და დაბანაკდა ფარანის უდაბნოში.

²და უთხრა უფალმა მოსეს, ასე:

³“გაგზავნე კაცები და დაზვერონ ქანაანის ქვეყანა, რომელსაც მე ვაძლევ ისრაელის ძეთ. თითო კაცი თავისი მამის ტომიდან გაგზავნეთ, ყოველი მთავარი მათ შორის.”

⁴და გაგზავნა ისინი მოსემ ფარანის უდაბნოდან უფლის სიტყვისამებრ. ესენი იყვნენ კაცნი, ისრაელის ძეთა მთავარნი.

⁵და აჰა, მათი სახელები: რეუბენის ტომიდან შამუაყი, ძე ზაქურისა.

⁶სიმონის ტომიდან შაფატი, ძე ხორისა.

⁷იუდას ტომიდან ქალები, ძე იეფუნესი.

⁸ისაქარის ტომიდან იგალი, ძე იოსებისა.

⁹ეფრემის ტომიდან ოსია, ძე ნავესი.

¹⁰ბენიამინის ტომიდან ფალტი, ძე რაფუსი.

¹¹ზებულუნის ტომიდან გადიელი, ძე სოდისა.

¹²იოსების ტომიდან, გადი, ძე სუსისა, მენაშეს მხრიდან.

¹³დანის ტომიდან ყამიელი, ძე გემალისა,

¹⁴აშერის ტომიდან სეთური, ძე მიქაელისა.

¹⁵ნაფთალის ტომიდან ნახბი, ძე ვოფსისა.

¹⁶გადის ტომიდან გეუელი, ძე მაქისა.

¹⁷აჰა, სახელები კაცებისა, რომელნიც გაგზავნა მოსემ ქვეყნის დასაზვერად. და უწოდა მოსემ ოსიას, ნავეს ძეს, იესო.

¹⁸და გაგზავნა ისინი მოსემ ქანაანის ქვეყნის დასაზვერად, და უთხრა მათ: “წადით ნეგებისაკენ და ადით მთაზე,

¹⁹და იხილეთ ქვეყანა, როგორია იგი, და ხალხი, რომელიც ცხოვრობს მასში, ძლიერია თუ უძლური, მცირერიცხოვანია თუ მრავალრიცხოვანი?

²⁰და როგორია ქვეყანა, რომელშიც იგი ცხოვრობს, კარგია თუ ცუდი? და როგორია ქალაქები, რომლებშიც ცხოვრობს, ბანაკებში მკვიდრობს თუ ციხე-სიმაგრეებში?

²¹და როგორია ნიადაგი, პოხიერია თუ ხრიოკი? არის მასზე ხე, თუ არა? იყავით გულადნი და წამოიღეთ ქვეყნის ნაყოფთაგან.” და იყო მაშინ დრო ყურძნის მწიფობისა.

²²და ავიდნენ ისინი და დაზვერეს ქვეყანა ცინის უდაბნოდან რეხობამდე, ხამათის შესასვლელამდე.

²³და წავიდნენ ნეგებისაკენ, და მივიდნენ ხებრონამდე. და იყვნენ იქ ახიმანი, შეშაი და თალმაი, ყენაკის ძენი. (და ხებრონი ეგვიპტის ქალაქ ცოყანზე შვიდი წლით ადრე აშენდა).

²⁴და მივიდნენ ეშქოლის ხევამდე, და იქ მოჭრეს ვაზის რტო და ყურძნის ერთი მტევანი და წამოიღო იგი ორმა კაცმა ლატნით. ასევე წამოიღეს ბროწეული და ლეღვი.

²⁵იმ ადგილს უწოდეს ნახალ-ეშქოლი, იმ მტევნის გამო, რომელიც მოჭრეს იქ ისრაელის ძეთ.

²⁶და დაბრუნდნენ ქვეყნის დაზვერვიდან ორმოცი დღის შემდეგ.

²⁷და წამოვიდნენ, მივიდნენ მოსესთან და აარონთან, და ისრაელის ძეთა მთელ თემთან ფარანის უდაბნოში, კადეშში, და მოუთხრეს მათ ამბავი მთელ თემს, და აჩვენეს მათ იმ ქვეყნის ნაყოფი.

²⁸და მოუთხრეს მას და უთხრეს: “მივედით ჩვენ იმ ქვეყანაში, სადაც შენ მიგვავლინე, და ნამდვილად მოედინება იქ რძე და თაფლი, და აჰა, ნაყოფი მისი.

²⁹მაგრამ ძლიერია ხალხი, რომელიც ცხოვრობს იმ ქვეყანაში, და ქალაქები გამაგრებულია, დიდია ფრიად. და აგრეთვე ყენაკის ძენი ვიხილეთ იქ.

³⁰ყამალეკი მკვიდრობს ნეგების ქვეყანაში, ხეთელნი, იებუსეველნი და ამორეველნი მკვიდრობენ მთაზე, ხოლო ქანაანელნი მკვიდრობენ ზღვის კიდეზე და იორდანეს სანაპიროზე.”

³¹ქალებმა დაამშვიდა ხალხი მოსეს წინაშე და თქვა: “ასვლით ავიდეთ და დავიმკვიდროთ იგი, რადგან ჩვენ შეგვიძლია მათი ძლევა.”

³²და კაცებმა, რომლებიც მასთან ერთად იყვნენ ასულნი, თქვეს: “ვერ შევძლებთ გასვლას იმ ხალხის წინააღმდეგ, რადგან იგი ჩვენზე ძლიერია.”

³³და ცუდი ხმები დაყარეს ისრაელის ძეთა შორის იმ ქვეყანაზე, რომელიც დაზვერეს, და თქვეს: “ქვეყანა, რომელიც დასაზვერად მოვიარეთ, არის ქვეყანა, რომელიც ჭამს მასზე მცხოვრებთ. და მთელი ხალხი, რომელიც ვიხილეთ იქ, ახოვანი ადამიანები არიან.

³⁴და იქ ვიხილეთ გოლიათებიც, ყენაკის ძენი, გოლიათთაგანნი. და ჩვენ გამოვჩნდით ჩვენს თვალში კალიებივით, და ასეთნაირად ვჩანდით მათ თვალშიც.”