Read სბს–სტოკჰოლმი 2001 რიცხვნი 17 Bible Online

რიცხვნი 17 - სბს–სტოკჰოლმი 2001 bible

რიცხვნი 17

¹და უთხრა უფალმა მოსეს:

²“უთხარი ისრაელის ძეთ, და აიღე მათგან თითო კვერთხი თითო ტომიდან, მათი ტომების ყოველი მთავრისაგან, თორმეტი კვერთხი და თითოეულის სახელი წააწერე მის კვერთხზე.

³ხოლო სახელი აარონისა წააწერე ლევის კვერთხს, რადგან ერთი კვერთხია მათი მამისსახლის მეთაურისათვის.

⁴და დააწყვე ისინი საკრებულო კარავში გამოცხადების კიდობნის წინ, სადაც მე გამოგეცხადები თქვენ.

⁵და რომელსაც მე ამოვირჩევ, კვერთხი აუყვავდება; და ასე დავაცხრობ ჩემს წინაშე ისრაელის ძეთა დრტვინვას”.

⁶და უთხრა მოსემ ყოველივე ეს ისრაელის ძეთ, და მისცა მას ყოველმა მათმა მთავარმა თითო კვერთხი თითოეული მთავრისაგან, მათი ტომების მიხედვით, სულ თორმეტი კვერთხი, და კვერთხი აარონისა იყო მათ კვერთხებს შორის.

⁷და დააწყო მოსემ კვერთხები უფლის წინაშე მოწმობის კარავში.

⁸და მეორე დღეს შევიდა მოსე მოწმობის კარავში, და აჰა, აყვავდა აარონის კვერთხი - ლევის სახლიდან, აყვავდა, გაიფურჩქნა ყვავილი და გამოიბა ნუში.

⁹და გამოუტანა მოსემ ყველა კვერთხი უფლის პირისაგან ყოველ ისრაელის ძეს. და მათ იხილეს და აიღო თითოეულმა თავისი კვერთხი.

¹⁰და უთხრა უფალმა მოსეს: “დააბრუნე აარონის კვერთხი მოწმობის კარვის წინ შესანახავად, ნიშნად ჭირვეულ ძეთათვის, და შეწყდება მათი დრტვინვა ჩემზე, და აღარ გაწყდებიან.”

¹¹და გააკეთა მოსემ, როგორც უბრძანა უფალმა მას.

¹²და უთხრეს ისრაელის ძეთ მოსეს: “აჰა, ვიხოცებით, იღუპება ყველა ჩვენგანი!

¹³ყოველი, რომელიც მიუახლოვდება უფლის სავანეს, კვდება. ნუთუ ჩვენ ყველანი დასაღუპავად ვართ განწირული?”