Read სბს–სტოკჰოლმი 2001 რიცხვნი 20 Bible Online

რიცხვნი 20 - სბს–სტოკჰოლმი 2001 bible

რიცხვნი 20

¹მოვიდნენ ისრაელის ძენი, მთელი თემი, ცინის უდაბნოში პირველ თვეს, და შეჩერდა ხალხი კადეშში, და მოკვდა იქ მირიამი და იქვე დაიმარხა.

²და არ ჰქონდა თემს წყალი, და შეიკრიბნენ მოსესა და აარონის წინააღმდეგ.

³და დრტვინავდა ხალხი მოსეს მიმართ, და ამბობდა ასე: “ნეტავ ჩვენც მაშინ დავხოცილიყავით, როცა ჩვენი ძმები იხოცებოდნენ უფლის წინაშე.

⁴რად მოიყვანეთ უფლის კრებული ამ უდაბნოში, რომ დავიხოცოთ აქ ჩვენ და ჩვენი საქონელი?

⁵რად ამოგვიყვანეთ ეგვიპტიდან, რომ მოგეყვანეთ ამ უვარგის ადგილზე, რომელზედაც არც ითესება, და არც ლეღვია და არც ვაზი, არც ბროწეული და წყალიც კი არაა დასალევად?”

⁶და წავიდნენ მოსე და აარონი კრებულისაგან საკრებულო კარვის შესასვლელისაკენ, და დაეცნენ პირქვე, და გამოეცხადათ დიდება უფლისა.

⁷და უთხრა უფალმა მოსეს:

⁸“აიღე კვერთხი, და შეკრიბეთ თემი შენ და აარონმა, შენმა ძმამ. და უთხარით კლდეს მათ თვალწინ, და მოგცემთ ის თავის წყალს. და ასე გამოუდენ მათ წყალს კლდიდან, და ასვი ამ შენს თემსა და მათ პირუტყვს.”

⁹და აიღო მოსემ კვერთხი, რომელიც იყო უფლის წინაშე, როგორც მან უბრძანა.

¹⁰და შეკრიბეს მოსემ და აარონმა კრებული კლდესთან, და უთხრა მათ: “ისმინეთ, ურჩებო, ამ კლდისაგან ხომ არ გამოგიდინოთ წყალი?”

¹¹და აღმართა მოსემ ხელი, და დაჰკრა კლდეს თავისი კვერთხი ორჯერ. და წამოვიდა უხვად წყალი, და სვა თემმა და მათმა პირუტყვმა.

¹²და უთხრა უფალმა მოსეს და აარონს: “რადგან არ მერწმუნეთ მე, რომ გამომეჩინა ისრაელის ძეთა თვალში ჩემი სიწმიდე, ამიტომ ვერ შეიყვანთ ამ კრებულს იმ ქვეყანაში, რომელიც მათთვის მაქვს მიცემული.

¹³ესაა მერიბას წყალი, სადაც დრტვინავდნენ ისრაელის ძენი უფალთან, და სადაც გამოუჩინა მან მათ თავისი სიწმიდე.”

¹⁴და გაგზავნა მოსემ მოციქულნი კადეშიდან ედომის მეფესთან ამ სიტყვებით: “ასე თქვა შენმა ძმამ, ისრაელმა: შენ იცი ყოველი სიძნელე, რომელიც გადაგვხდა ჩვენ.

¹⁵ჩავიდნენ ჩვენი მამები ეგვიპტეში, და ვცხოვრობდით ეგვიპტეში დიდხანს, და ცუდად გვეპყრობოდნენ ეგვიპტელნი ჩვენ და ჩვენს მამებსაც.

¹⁶და შევღაღადეთ უფალს, და ისმინა მან ჩვენი ხმა, და მოავლინა ანგელოზი და გამოგვიყვანა ჩვენ ეგვიპტიდან. და ჩვენ მოვედით კადეშში, ქალაქში შენი საზღვრის კიდეზე.

¹⁷გავივლით, გთხოვთ, შენს ქვეყანაში. არ გავივლით ყანებზე და ვენახებზე, და არც დავლევთ შენი ჭის წყალს. გავივლით სამეფო გზით, არ გადავუხვევთ მარჯვნივ და მარცხნივ, ვიდრე არ გავცდებით შენს საზღვარს.”

¹⁸და უთხრა მას ედომმა: “არ გაიარო ჩემზე, თორემ მახვილით გამოგეგებები.”

¹⁹და უთხრეს მას ისრაელის ძეთ: “ჩვენ წავალთ გაკაფული გზით, და თუ შენი წყალი დავლიოთ ჩვენ და ჩვენმა საქონელმა, მაშინ ფასს მოგცემთ; არ გთხოვთ არაფერს, მხოლოდ ფეხით გავივლით.”

²⁰მაგრამ მან შეუთვალა: “არ გაიარო!” და გამოვიდა ედომი მის წინააღმდეგ მრავალრიცხოვანი ხალხით და ძლიერი ხელით.

²¹და არ დათანხმდა ედომი, რომ გზა მიეცა ისრაელისთვის, რათა გაევლო მას მის საზღვრებში. და გვერდი აუარა მას ისრაელმა.

²²და დაიძრნენ კადეშიდან ისრაელის ძენი, და მივიდა მთელი თემი ჰორის მთასთან.

²³და უთხრა უფალმა მოსეს და აარონს ჰორის მთაზე, ედომის ქვეყნის საზღვარზე:

²⁴“შეეძინოს აარონი თავის ხალხს, რადგან იგი არ შევა იმ ქვეყანაში, რომელიც მივეცი ისრაელის ძეთ, რადგან არ დაემორჩილეთ ჩემს ბრძანებას მერიბას წყალთან.

²⁵წაიყვანე აარონი და ელეაზარი, მისი ძე, და აიყვანე ისინი ჰორის მთაზე.

²⁶და გახადე აარონს მისი შესამოსელი და შემოსე მით ელეაზარი, მისი ძე, რადგან აარონი შეეძინება თავის ხალხს და მოკვდება იქ.”

²⁷და გააკეთა მოსემ ისე, როგორც ბრძანა უფალმა, და ავიდნენ ჰორის მთაზე მთელი თემის თვალწინ.

²⁸და გახადა მოსემ აარონს მისი შესამოსელი, და შემოსა მით ელეაზარი, ძე მისი. და მოკვდა აარონი იქ მთის მწვერვალზე, და ჩამოვიდნენ მოსე და ელეაზარი მთიდან.

²⁹და იხილა მთელმა თემმა, რომ მოკვდა აარონი, და ტიროდა აარონს ისრაელის მთელი სახლი ოცდაათი დღე.