Read სბს–სტოკჰოლმი 2001 რიცხვნი 24 Bible Online

რიცხვნი 24 - სბს–სტოკჰოლმი 2001 bible

რიცხვნი 24

¹და იხილა ბილყამმა, რომ სასურველია კურთხევა ისრაელისა უფლის თვალში, და აღარ წავიდა, როგორც უწინ, სამისნოდ, არამედ მიმართა თავისი პირისახე უდაბნოსაკენ.

²და აღაპყრო ბილყამმა თვალები, და იხილა განლაგებული ისრაელი თავისი ტომებით და გადმოვიდა მასზე სული ღვთისა.

³და მან წარმოთქვა თავისი იგავი, და თქვა:

⁴“ნათქვამი ბილყამისა, ბეყორის ძისა, ნათქვამი თვალღია კაცისა, რომელიც ხედავს ყოვლისშემძლის ხილვას. ეცემა მაგრამ თვალები ღია აქვს.

⁵რა მშვენიერია შენი კარვები, იაკობ, შენი სადგომები, ისრაელ!

⁶როგორც გაშლილი მინდორ-ველები, როგორც ბაღები მდინარის პირას, როგორც უფლის დარგული ალვისხეები, როგორც კედარნი წყლის პირას.

⁷იდინებს წყალი მისი კოკებიდან, და მისი თესლი იქნება უხვწყლიანი. აღემატება აგაგს მისი მეფე და აღზევდება სამეფო მისი.

⁸ღმერთმა გამოიყვანა იგი ეგვიპტიდან, მარტორქის ძლიერება აქვს მას, შთანთქავს ხალხებს, თავის მტრებს, და მათ ძვლებს შემუსრავს, და თავისი ისრებით განგმირავს.

⁹ჩაიმუხლა, მიწვა ხვადი ლომივით, და ძუ ლომივით; ვინ წამოაგდებს მას? მაკურთხებელი შენი კურთხეულია, და მაწყევარი შენი დაწყევლილია.”

¹⁰და აღიგზნო რისხვა ბალაკისა ბილყამის მიმართ, და ხელი ხელს შემოკრა, და უთხრა ბალაკმა ბილყამს: “ჩემს მტერთა დასაწყევლად მოგიხმე, შენ კი კურთხევით აკურთხე მესამეჯერ.

¹¹ახლა კი, გაიქეცი შენს ადგილზე. მე ვთქვი პატივს გცემ-მეთქი, და აჰა, უფალმა დაგიკავა პატივი.”

¹²და უთხრა ბილყამმა ბალაკს: “განა არ ვუთხარი შენს მოციქულებსაც, რომელნიც მომიგზავნე,

¹³თუნდაც ოქრო-ვერცხლით ავსებული სახლი მომცე, ვერ გადავალ ჩემი უფლის ბრძანებას. ვერც კარგს გავაკეთებ-მეთქი, ვერც ცუდს ჩემი ნებით. რასაც იტყვის უფალი, იმას ვიტყვი-მეთქი.

¹⁴და ახლა მე მივდივარ ჩემს ხალხთან. მოდი, გაგანდობ, რასაც უზამს ეს ხალხი შენს ხალხს მომავალში.”

¹⁵და წარმოთქვა მან თავისი იგავი: “ნათქვამი ბილყამისა, ბეყორის ძისა, ნათქვამი თვალღია კაცისა;

¹⁶ნათქვამი ღვთის სიტყვების გამგონისა, რომელმაც იცის უზენაესის ცოდნა, რომელიც ხედავს ყოვლისშემძლის ჩვენებას, ეცემა, მაგრამ თვალები ღია აქვს,

¹⁷მას ვხედავ, მაგრამ არა ახლა, მას ვუყურებ, მაგრამ არა ახლოდან: ამობრწყინდება ვარსკვლავი იაკობისგან, და აღიმართება კვერთხი ისრაელისგან, და შემუსრავს მოაბის საზღვრებს, და გაანადგურებს შეთის ყოველ ძეს.

¹⁸და საკუთრება იქნება ედომი, და თავისი მტრების საკუთრება იქნება სეყირი; და ისრაელი იმოქმედებს ძლიერებით.

¹⁹და დაეპატრონება იაკობისაგანი, და დაღუპავს გადარჩენილებს ქალაქიდან.”

²⁰და იხილა მან ყამალეკი და წარმოთქვა თავისი იგავი, და თქვა: “წარმართთა დასაბამია ყამალეკი და დაღუპვაა მისი ბოლო.”

²¹და მან იხილა კენიელნი და წარმოთქვა თავისი იგავი: “ძლიერია შენი სამყოფელი, და კლდეზე დაგიდვია ბუდე.

²²თუ აოხრდება კაენი, როდემდე ეყოლები აშურის ტყვედ?”

²³და წარმოთქვა თავისი იგავი და თქვა: “ჰოი, ვინ იცოცხლებს, როცა ამას მოახდენს ღმერთი?

²⁴გამოვლენ გემები ქითიმიდან და დაიმორჩილებენ აშურს, და დაიმორჩილებენ ყებერს, მაგრამ თავადაც დაიღუპებიან.”

²⁵და ადგა ბილყამი, და წავიდა და დაბრუნდა თავის ადგილას. და წავიდა ბალაკიც თავისი გზით.