Read სბს–სტოკჰოლმი 2001 რიცხვნი 27 Bible Online

რიცხვნი 27 - სბს–სტოკჰოლმი 2001 bible

რიცხვნი 27

¹და მივიდნენ ასულნი ცელაფხადისა, ხეფერის ძისა, ძისა გილყადისა, ძისა მაქორისა, ძისა მენაშესი, იოსების ძის საგვარეულოდან. და სახელები მისი ასულებისა: მახლა, ნოყა, ხოგლა, მილქა და თირცა.

²და წარდგნენ მოსეს წინაშე და ელეაზარ მღვდლის წინაშე, მთავართა და მთელი თემის წინაშე კარვის შესასვლელთან ამ სიტყვებით:

³“მამაჩვენი უდაბნოში მოკვდა და არ ყოფილა უფლის წინააღმდეგ ამბოხებულთა დასში, კორახის დასში, არამედ თავისი ცოდვით მოკვდა. და ძენი არ ჰყოლია მას.

⁴რატომ უნდა ამოირიცხოს მამაჩვენის სახელი თავისი საგვარეულოდან იმის გამო, რომ ვაჟი არ ჰყავს? მოგვეცი ჩვენ სამკვიდრებელი მამაჩვენის ძმებს შორის.”

⁵და წარადგინა მოსემ მათი საქმე უფლის წინაშე.

⁶და უთხრა უფალმა მოსეს:

⁷“მართალს ამბობენ ასულნი ცელაფხადისა, მიეცი მათ სამკვიდრებელი სამფლობელო მათი მამის ძმათა შორის და გადაიტანე მათი მამის სამკვიდრებელი მათზე.

⁸და ისრაელის ძეთ განუცხადე: ‘კაცი რომ მოკვდეს და ვაჟი არ ჰყავდეს მას, მაშინ გადაიტანეთ მისი სამკვიდრებელი მის ასულზე.

⁹და თუ არ ჰყავს ასული, მაშინ გადაეცით მისი სამკვიდრებელი მის ძმებს.

¹⁰და თუ არ ჰყავს მას ძმები, მაშინ გადაეცით მისი სამკვიდრებელი მისი მამის ძმებს.

¹¹და თუ არ ჰყავს ძმები მის მამას, მაშინ გადაეცით მისი სამკვიდრებელი მის უახლოეს ნათესავს მისი საგვარეულოდან, და დაიმკვიდროს იგი. და ეს იყოს ისრაელის ძეთათვის სამართლის დადგენილებად, როგორც უბრძანა უფალმა მოსეს.”

¹²და უთხრა უფალმა მოსეს: “ადი ამ ყაბარიმის მთაზე და გადახედე ქვეყანას, რომელიც მე მივეცი ისრაელის ძეთ.

¹³და როცა იხილავ მას, შეეძინები შენს ხალხს შენც, როგორც შეეძინა აარონი, შენი ძმა.

¹⁴რადგან ეურჩეთ ჩემს ბრძანებას ცინის უდაბნოში თემის დრტვინვის დროს, რათა ჩემი სიწმიდე გამოცხადებულიყო წყალთან, მათ თვალწინ.”

¹⁵და უთხრა მოსემ უფალს:

¹⁶“დანიშნოს უფალმა, ყოველი ხორციელის სულთა ღმერთმა, კაცი ამ თემზე,

¹⁷რომელიც გამოვა მათ წინაშე და რომელიც შევა მათ წინაშე. რომელიც გაიყვანს და რომელიც მოიყვანს, რათა არ იყოს თემი უფლისა, როგორც ცხვარი, რომელსაც არა ჰყავს მწყემსი.”

¹⁸და უთხრა უფალმა მოსეს: “მოიყვანე იესო, ძე ნავესი, კაცი, რომელშიც არის სული, და დაადე ხელი,

¹⁹და დააყენე იგი ელეაზარ მღვდლის წინაშე და მთელი თემის წინაშე, და დანიშნე იგი მათ თვალწინ.

²⁰და უწილადე შენი დიდება, რათა უსმინოს მას ისრაელის ძეთა მთელმა თემმა.

²¹და დადგეს ელეაზარ მღვდლის წინაშე, და გამოკითხავს მას ურიმის სამართალს უფლის წინაშე; მისი ბრძანებით გავა და მისი ბრძანებით შემოვა თვითონ და ყოველი ისრაელის ძე მასთან, და მთელი თემი.”

²²და გააკეთა მოსემ, როგორც უბრძანა მას უფალმა. და მოიყვანა იესო და წარადგინა იგი ელეაზარ მღვდლის წინაშე და მთელი თემის წინაშე,

²³და მას დაასხა ხელები და დანიშნა იგი, როგორც ბრძანა უფალმა მოსეს მიერ.