Read სბს–სტოკჰოლმი 2001 რიცხვნი 28 Bible Online

რიცხვნი 28 - სბს–სტოკჰოლმი 2001 bible

რიცხვნი 28

¹და უთხრა უფალმა მოსეს:

²“უბრძანე ისრაელის ძეთ და უთხარი მათ: ‘ჩემი შესაწირავი, ჩემი პური საცეცხლო მსხვერპლისთვის, ჩემი კეთილსურნელება დაიცავით, რათა შემომწიროთ თავის დროზე’.

³და უთხარი მათ: ‘ესაა საცეცხლო მსხვერპლი, რომელიც უნდა შესწიროთ უფალს: ორი ერთწლიანი კრავი, საღი, ყოველდღიურად, მუდმივ სრულადდასაწველად.

⁴ერთი კრავი მოიტანე დილით და მეორე კრავი მოიტანე საღამოხანს.

⁵და პურეულის ძღვნად მეათედი ნაწილი წმიდა ხორბლის ფქვილისა, ჰინის მეოთხედ გამოხდილ ზეთში აზელილი.

⁶ეს მუდმივი სრულადდასაწველია, სინაის მთაზე რომ სწირავდნენ კეთილსურნელებად, საცეცხლო მსხვერპლი უფლისათვის.

⁷და მისი საღვრელი ჰინის მეოთხედია ერთ კრავზე. წმიდა ადგილზე დაღვარე ღვინის საღვრელი უფლისათვის.

⁸და მეორე კრავი მოიტანე საღამოხანს. დილანდელი პურეულის ძღვნისა და საღვრელის მსგავსად, მოამზადე საცეცხლო მსხვერპლად, კეთილსურნელებად უფლისათვის.

⁹და შაბათ დღეს ორი კრავი, ერთწლიანი, საღი, და პურეულის ძღვენი ორი მეათედი წმიდა ხორბლის ფქვილისა, ზეთში აზელილი და მისი საღვრელი.

¹⁰ეს საშაბათო სრულადდასაწველია ყოველ შაბათს, მუდმივი სრულადდასაწველისა და მისი საღვრელის გარდა.

¹¹და თქვენი ახალმთვარობების დასაწყისში შესწირეთ სრულადდასაწველი უფალს: ორი ნორჩი მოზვერი და ერთი ვერძი, შვიდი ერთწლიანი კრავი, საღი.

¹²და პურეულის საძღვნოდ სამი მეათედი ნაწილი წმიდა ხორბლის ფქვილისა, ზეთში აზელილი, ერთ მოზვერზე, და ორი მეათედი ნაწილი წმიდა ხორბლის ფქვილისა, ზეთში აზელილი, საძღვნოდ ერთ ვერძზე,

¹³და პურეულის საძღვნოდ ერთი მეათედი ნაწილი წმიდა ხორბლის ფქვილისა, ზეთში აზელილი, ერთ კრავზე. ეს სრულადდასაწველი კეთილსურნელება შესაწირავია უფლისა.

¹⁴და მათი საღვრელები: ნახევარი ჰინი ღვინო მოზვერზე, მესამედი ჰინი ვერძზე და მეოთხედი ჰინი კრავზე. ეს სრულადდასაწველია ახალმთვარობისა, წელიწადის თვეებში.

¹⁵და ერთი ვაცი შესწირეთ უფალს ცოდვისთვის; მუდმივ სრულადდასაწველის გარდა უნდა შეიწიროს იგი, მის საღვრელთან ერთად.

¹⁶და პირველ თვეს, თვის მეთოთხმეტე დღეს პასექია უფლისა.

¹⁷და ამ თვის მეთხუთმეტე დღეს დღესასწაულია. შვიდი დღე ხმიადი უნდა იჭამოს.

¹⁸პირველ დღეს წმიდა შეკრებილობაა: არავითარი საქმე არ უნდა აკეთოთ.

¹⁹და შესწირეთ სრულადდასაწველი მსხვერპლი უფალს: ორი ნორჩი მოზვერი, ერთი ვერძი და შვიდი კრავი ერთწლიანები, საღები უნდა იყვნენ ისინი.

²⁰და პურეულის საძღვნო იყოს წმიდა ხორბლის ფქვილი, ზეთში აზელილი, სამი მეათედი მოზვერზე და ორი მეათედი ვერძზე.

²¹ერთი მეათედი მოიტანე თითო კრავზე შვიდი კრავიდან,

²²და ერთი ცოდვის ვაცი თქვენი შენდობისათვის.

²³შესწირეთ ესენი გარდა დილის სრულადდასაწველისა, რომელიც მუდმივი სრულადდასაწველია.

²⁴ასე შესწირეთ ყოველდღე შვიდი დღის განმავლობაში: პური, საცეცხლო მსხვერპლი, კეთილსურნელებად უფლისათვის; მუდმივ სრულადდასაწველის გარდა უნდა შეიწიროს, მის საღვრელთან ერთად.

²⁵და მეშვიდე დღეს წმიდა შეკრებილობა იყოს თქვენთვის, არავითარი საქმე არ აკეთოთ.

²⁶და პირველნაყოფთა დღეს, როცა ახალ პურეულ ძღვენს შესწირავთ უფალს თქვენს შვიდეულებში, წმიდა შეკრებილობა იყოს თქვენთვის. არავითარი საქმე არ აკეთოთ.

²⁷და შესწირეთ სრულადდასაწველი კეთილსურნელებად უფალს: ორი ნორჩი მოზვერი, ერთი ვერძი და შვიდი ერთწლიანი კრავი,

²⁸და მათი პურეულის ძღვენი წმიდა ხორბლის ფქვილისა, ზეთში აზელილი: სამი მეათედი თითო მოზვერზე, ორი მეათედი ვერძზე,

²⁹ერთი მეათედი ნაწილი თითო კრავზე შვიდ კრავთაგან.

³⁰და ერთი ვაცი თქვენი შენდობისათვის.

³¹მუდმივი სრულადდასაწველისა და მისი პურეულის ძღვნის გარდა შესწირეთ ესენი მათ საღვრელებთან ერთად. საღები უნდა იყვნენ ისინი.