Read სბს–სტოკჰოლმი 2001 რიცხვნი 29 Bible Online

რიცხვნი 29 - სბს–სტოკჰოლმი 2001 bible

რიცხვნი 29

¹და მეშვიდე თვეს, თვის პირველ დღეს, წმიდა შეკრებილობა იყოს თქვენთვის. არავითარი საქმე არ გააკეთოთ. ეს დღე საყვირით მოწოდებისა იყოს თქვენთვის.

²და შესწირეთ სრულადდასაწველი კეთილსურნელებად უფლისათვის, ერთი ნორჩი მოზვერი, ერთი ვერძი, შვიდი ერთწლიანი კრავი, საღი.

³და მათი პურეულის ძღვენი წმიდა ხორბლის ფქვილისა, ზეთში აზელილი, სამი მეათედი მოზვერზე, ორი მეათედი ვერძზე,

⁴და ერთი მეათედი თითო კრავზე შვიდ კრავთაგან.

⁵და ერთი ვაცი ცოდვისთვის, თქვენი შენდობისათვის.

⁶გარდა ახალმთვარობების სრულადდასაწველისა და მისი პურეულის ძღვენისა, და მათი საღვრელების გარდა, რჯულის მიხედვით კეთილსურნელებად შესწირეთ საცეცხლო მსხვერპლი უფალს.

⁷და მეშვიდე თვის მეათე დღეს წმიდა შეკრებილობა იყოს თქვენთვის. და დაიოკეთ თქვენი სულები, და არავითარი საქმე არ აკეთოთ.

⁸და შესწირეთ სრულადდასაწველი უფალს კეთილსურნელებად: ერთი ნორჩი მოზვერი, ერთი ვერძი, შვიდი ერთწლიანი კრავი, საღნი იყვნენ ისინი თქვენთვის.

⁹და მათი პურეულის ძღვენი, წმიდა ხორბლის ფქვილისა, ზეთში აზელილი, სამი მეათედი მოზვერზე, ორი მეათედი ერთ ვერძზე,

¹⁰და ერთი მეათედი თითოეულ კრავზე შვიდ კრავთაგან.

¹¹ერთი ვაცი ცოდვისთვის, გარდა ცოდვის შესანდობარი შესაწირავისა და მუდმივი სრულადდასაწველისა, და მისი პურეულის ძღვენისა და მათი საღვრელებისა.

¹²და მეშვიდე თვის მეთხუთმეტე დღეს წმიდა შეკრებილობა იყოს თქვენთვის. არავითარი საქმე არ აკეთოთ და იდღესასწაულეთ დღესასწაული უფლისათვის შვიდ დღეს.

¹³და შესწირეთ სრულადდასაწველი, საცეცხლო მსხვერპლი, კეთილსურნელებად უფალს: ცამეტი ნორჩი მოზვერი, ორი ვერძი, თოთხმეტი ერთწლიანი კრავი. საღნი უნდა იყვნენ ისინი,

¹⁴და მათი პურეულის ძღვენი წმიდა ხორბლის ფქვილისა, ზეთში აზელილი, სამი მეათედი თითო მოზვერზე ცამეტ მოზვერთაგან, ორი მეათედი თითო ვერძზე ორ ვერძთაგან.

¹⁵და ერთი მეათედი თითო კრავზე თოთხმეტ კრავთაგან.

¹⁶და ერთი ვაცი ცოდვისთვის, გარდა მუდმივი სრულადდასაწველისა, მისი ძღვენისა და მისი საღვრელისა.

¹⁷და მეორე დღეს: თორმეტი ნორჩი მოზვერი, ორი ვერძი, თოთხმეტი ერთწლიანი კრავი, საღი;

¹⁸და მათი პურეულის ძღვენი, და მათი საღვრელები მოზვერთათვის, ვერძებისათვის, მათი რაოდენობის მიხედვით, წესისამებრ,

¹⁹და ერთი ვაცი ცოდვისთვის, გარდა მუდმივი სრულადდასაწველისა, მისი პურეულის ძღვენისა და მათი საღვრელებისა.

²⁰და მესამე დღეს: თერთმეტი მოზვერი, ორი ვერძი, თოთხმეტი ერთწლიანი კრავი, საღი,

²¹და მათი პურეულის ძღვენი და მათი საღვრელები მოზვრებისათვის, ვერძებისათვის და კრავებისათვის მათი რაოდენობის მიხედვით, წესისამებრ,

²²და ერთი ვაცი ცოდვისთვის, გარდა მუდმივი სრულადდასაწველისა და მისი პურეულის ძღვენისა და მისი საღვრელისა.

²³და მეოთხე დღეს: ათი მოზვერი, ორი ვერძი, თოთხმეტი ერთწლიანი კრავი, საღი,

²⁴და მათი ძღვენი და მათი საღვრელები მოზვრებისათვის, ვერძებისათვის და კრავებისათვის, მათი რაოდენობის მიხედვით, წესისამებრ,

²⁵და ერთი ცოდვისთვის, გარდა მუდმივი სრულადდასაწველისა, მისი პურეულის ძღვენისა და მისი საღვრელისა.

²⁶და მეხუთე დღეს: ცხრა მოზვერი, ორი ვერძი, თოთხმეტი ერთწლიანი კრავი, საღი,

²⁷და მათი პურეულის ძღვენი, და მათი საღვრელები მოზვრებისათვის, ვერძებისათვის და კრავებისათვის, მათი რაოდენობის მიხედვით, წესისამებრ.

²⁸და ერთი ვაცი ცოდვისთვის, გარდა მუდმივი სრულადდასაწველისა, მისი ძღვენისა და მისი საღვრელისა.

²⁹და მეექვსე დღეს: რვა მოზვერი, ორი ვერძი, თოთხმეტი ერთწლიანი კრავი, საღი,

³⁰და მათი პურეულის ძღვენი და მათი საღვრელები მოზვრებისათვის, ვერძებისათვის და კრავებისათვის მათი რაოდენობის მიხედვით, წესისამებრ;

³¹და ერთი ვაცი ცოდვისთვის, გარდა მუდმივი სრულადდასაწველისა, მისი პურეულის ძღვენისა და მისი საღვრელებისა.

³²და მეშვიდე დღეს: შვიდი მოზვერი, ორი ვერძი, თოთხმეტი ერთწლიანი კრავი, საღი.

³³და მათი პურეულის ძღვენი, და მათი საღვრელები მოზვრებისათვის, ვერძებისათვის და კრავებისთვის, მათი რაოდენობის მიხედვით, წესისამებრ,

³⁴და ერთი ვაცი ცოდვისთვის, გარდა მუდმივი სრულადდასაწველისა, მისი პურეულის ძღვენისა და მისი საღვრელისა.

³⁵და მერვე დღეს დღესასწაული იყოს თქვენთვის: არავითარი საქმე არ აკეთოთ.

³⁶და შესწირეთ სრულადდასაწველი, საცეცხლო მსხვერპლი, კეთილსურნელებად უფალს: ერთი მოზვერი, ერთი ვერძი, შვიდი ერთწლიანი კრავი, საღი.

³⁷და მათი პურეულის ძღვენი და მათი საღვრელები მოზვრისათვის, ვერძისათვის და კრავებისათვის, მათი რაოდენობის მიხედვით, წესისამებრ.

³⁸და ერთი ვაცი ცოდვისთვის, გარდა მუდმივი სრულადდასაწველისა და მისი პურეულის ძღვენისა და მისი საღვრელისა.

³⁹ესენი შესწირეთ უფალს თქვენს დღესასწაულებში, გარდა თქვენი აღთქმისა და თქვენი მოწყალებისა: თქვენი სრულადდასაწველები და თქვენი პურეულის ძღვენი და თქვენი საღვრელები და თქვენი სამშვიდობო მსხვერპლები.’”

⁴⁰და უთხრა მოსემ ისრაელის ძეთ ყოველივე, როგორც უფალმა უბრძანა მოსეს.