Read სბს–სტოკჰოლმი 2001 რიცხვნი 30 Bible Online

რიცხვნი 30 - სბს–სტოკჰოლმი 2001 bible

რიცხვნი 30

¹და უთხრა მოსემ ისრაელის ტომთა მეთაურებს: “ეს ბრძანა უფალმა:

²‘კაცმა რომ აღუთქვას აღთქმა უფალს, ან დაიფიცოს ფიცით, ან რაიმე აღუკვეთოს თავის თავს, რომ არ დაარღვევს თავის სიტყვას, ყოველივე, რაც მისი პირიდან გამოვიდა, უნდა ასრულდეს.

³ქალმა რომ აღუთქვას აღთქმა უფალს და რამე აღიკვეთოს თავისი მამის სახლში, თავისი ყმაწვილქალობისას,

⁴და მამამისმაც გაიგოს მისი აღთქმა და მისი აღკვეთა, რომელიც აღუკვეთა თავის თავს, და არას იტყვის მის შესახებ მამამისი, მაშინ უნდა ასრულდეს ყოველი მისი აღთქმა და ყოველი აღკვეთა, რომელიც აღუკვეთა თავის სულს.

⁵და თუ დაუშლის მამამისი მას იმ დღეს, როცა გაიგებს, მაშინ ყოველი მისი აღთქმა და მისი აღკვეთა, რომელიც აღუკვეთა თავის თავს, არ ასრულდება და უფალი აპატიებს მას, რადგან მამამისმა დაუშალა მას.

⁶და თუ იგი გათხოვდება, და მასზე მისი აღთქმანი დარჩება, ანდა მის ბაგეს დაცდენილი სიტყვა, რითაც რაიმე აღუკვეთა თავის თავს,

⁷და გაიგებს მისი ქმარი, რომელ დღესაც გაიგებს და არას იტყვის მის შესახებ, მაშინ მისი აღთქმა უნდა ასრულდეს, და მისი აღკვეთანი, რაც აღუკვეთა თავის თავს, უნდა ასრულდეს.

⁸და თუ მისი ქმარი იმ დღეს, როცა გაიგებს, დაუშლის მას, მაშინ მან უნდა გააუქმოს მისი აღთქმა, რომელიც მასზეა, და მის ბაგეებს დაცდენილი სიტყვა, რითაც რაიმე აღუკვეთა თავის თავს, და უფალი აპატიებს მას.

⁹ქვრივისა და ქმარგაყრილის აღთქმა და ყოველი, რაც აღკვეთილი აქვს თავისი თავისთვის, უნდა ასრულდეს მასზე.

¹⁰და თუ თავისი ქმრის სახლში დადებს აღთქმას, ან რასმე აღუკვეთს თავის თავს ფიცით,

¹¹და გაიგებს მისი ქმარი და არას ეტყვის და არ დაუშლის, მაშინ უნდა ასრულდეს ყოველი მისი აღთქმა და ყოველი აღკვეთა, რაც აღუკვეთა თავის თავს.

¹²და თუ გააუქმებს მათ მისი ქმარი იმ დღეს, როცა გაიგებს, მაშინ მის ბაგეთაგან გამოთქმული ყოველი მისი აღთქმა და ფიცი მისი არ ასრულდება. მისმა ქმარმა გააუქმა ისინი და უფალი აპატიებს მას.

¹³ყოველ აღთქმას და ყოველ ფიცით აღკვეთას თავის დასაოკებლად მისი ქმარი დაამტკიცებს და მისი ქმარი გააუქმებს.

¹⁴და თუ ქმარი არას იტყვის დღითი დღე, ამით დაუმტკიცებს ყოველ მის აღთქმას, ან ყოველ მის აღკვეთას, რაც მასზეა. მან დაამტკიცა ისინი, რაკი არაფერი თქვა იმ დღეს, როცა გაიგო.

¹⁵და თუ ქმარი გააუქმებს მათ მას შემდეგ, რაც გაიგებს, მაშინ მასზე იქნება ქალის ცოდვა.’”

¹⁶ეს წესებია, რომლებიც უფალმა ბრძანებით დაუდო მოსეს, ქმარსა და მის ცოლს შორის, მამასა და მის ასულს შორის, მის ყმაწვილქალობისას, მამამისის სახლში.