Read სბს–სტოკჰოლმი 2001 რიცხვნი 31 Bible Online

რიცხვნი 31 - სბს–სტოკჰოლმი 2001 bible

რიცხვნი 31

²“შური იძიე მიდიანელებზე ისრაელის ძეთათვის და მერე შეეძინები შენს ხალხს.”

³და უთხრა მოსემ ხალხს: “შეაიარაღეთ თქვენგან კაცები საომრად, რათა მათ გაილაშქრონ მიდიანის წინააღმდეგ და აღასრულონ უფლის შურისძიება მიდიანზე.

⁴ათას-ათასი თითო ტომიდან, ისრაელის ყოველი ტომიდან გაგზავნეთ ლაშქარში.”

⁵და გაწვეულ იქნა ათასობით ისრაელისაგან ათას-ათასი, თითოეული ტომიდან, სულ თორმეტი ათასი შეიარაღებული.

⁶და გაგზავნა ისინი მოსემ, ათასეული ყოველი ტომიდან, საომრად, ისინი და ფინხასი, ძე ელეაზარ მღვდლისა. და წმიდა ჭურჭელი და საყიჟინო საყვირები ჰქონდა მას ხელში.

⁷და გაილაშქრეს მიდიანზე, როგორც უბრძანა უფალმა მოსეს, და დახოცეს ყოველი მამაკაცი.

⁸და მეფენი მიდიანისა დახოცეს მათ დახოცილებთან ერთად: ევი და რეკემი, ცური, ხური და რებაყი - მიდიანის ხუთი მეფე, და მოკლეს მახვილით აგრეთვე ბილყამიც, ძე ბეყორისა;

⁹და დაატყვევეს ისრაელის ძეთ მიდიანელი ქალები და მათი ბავშვები. და მთელი მათი საქონელი, მთელი მათი ჯოგი, და მთელი მათი ქონება დაიტაცეს.

¹⁰და ყველა მათი ქალაქი მათი დასახლების ადგილებში და ყველა მათი ბანაკი გადაწვეს ცეცხლით.

¹¹და წამოიღეს მთელი ნადავლი და მთელი ნაძარცვი, ადამიანთაგან პირუტყვამდე,

¹²და მოიყვანეს მოსესთან და ელეაზარ მღვდელთან და ისრაელის ძეთა თემთან ტყვეები და ნაძარცვი, და ნადავლი, ბანაკში, მოაბის ველებზე, რომელიც იორდანეს ნაპირასაა, იერიხოს პირდაპირ.

¹³და გამოვიდნენ მოსე, ელეაზარ მღვდელი და თემის ყველა მთავარი მათ შესახვედრად ბანაკის გარეთ.

¹⁴და განრისხდა მოსე მხედართმთავრებზე, ათასის თავებზე და ასის თავებზე, რომელნიც დაბრუნდნენ საომარი ლაშქრობიდან.

¹⁵და უთხრა მათ მოსემ: “ყველა ქალი ცოცხალი დატოვეთ?

¹⁶აჰა, მათი მიზეზით იყო, რომ ბილყამის რჩევით ისრაელის ძენი განუდგნენ უფალს ფეღორის გამო, და იყო მუსვრა უფლის კრებულში.

¹⁷და ახლა მოკალით ყოველი მამროვანი ბავშვი, და ყოველი ქალი, რომელსაც შეცნობილი ჰყავს მამაკაცი მის საწოლზე.

¹⁸და ყოველი დედროვანი ბავშვი, რომელსაც არ შეუცვნია საწოლი მამაკაცისა, ცოცხალი დატოვეთ თქვენთვის.

¹⁹და თქვენ დაიბანაკეთ ბანაკის გარეთ შვიდი დღე. ყველა, ვინც კაცი მოკლა, და ყველა, ვინც მოკლულს გაეკარა, გასუფთავდეს მესამე დღეს და მეშვიდე დღეს, თქვენ და თქვენი ტყვეები.

²⁰და ყოველი სამოსელი და ტყავის ყოველი საგანი და ყოველი თხისურისგან დამზადებული, და ხის ყოველი ჭურჭელი გაასუფთავეთ.”

²¹და უთხრა ელეაზარ მღვდელმა მეომრებს, ომში ნამყოფებს: “აჰა, წესი რჯულისა, რომელიც უფალმა უბრძანა მოსეს:

²²‘ოქრო და ვერცხლი, სპილენძი, რკინა, კალა და ტყვია,

²³ყოველი საგანი, რომელიც შევა ცეცხლში, გაატარეთ ცეცხლში, და გასუფთავდება, მაგრამ გარდა ამისა გამასუფთავებელი წყლითაც უნდა გასუფთავდეს. და ყველაფერი, რაც ცეცხლს ვერ გაუძლებს, გაავლეთ წყალში.

²⁴და გაირეცხეთ თქვენი სამოსელი მეშვიდე დღეს, და გასუფთავდით და შემდეგ შედით ბანაკში.’”

²⁵და უთხრა უფალმა მოსეს:

²⁶“აღრიცხეთ ტყვედ შეპყრობილნი, ადამიანიდან პირუტყვამდე, შენ და ელეაზარ მღვდელმა და თემის მამისსახლთა მთავრებმა.

²⁷და გაყავით ნადავლი შუაზე ომში ნამყოფ მეომართა შორის, და მთელ თემს შორის.

²⁸და აიღეთ ხარკი უფლისათვის ომში ნამყოფ მეომართაგან: თითო სული ხუთასზე, ადამიანთაგან და მსხვილფეხა საქონლისაგან, სახედართაგან და წვრილფეხა საქონლისაგან.

²⁹მათი ნახევრიდან აიღე ეს და მიეცი ელეაზარ მღვდელს საუფლო შესაწირავად.

³⁰და ისრაელის ძეთა ნახევრიდან აიღე თითო წილი ორმოცდაათზე ადამიანთაგან, მსხვილფეხა საქონლისაგან, სახედართაგან, წვრილფეხა საქონლისაგან, ყოველ პირუტყვთაგან, და მიეცი ისინი ლევიანებს - სავანის მოვალეობის შემსრულებელთ.”

³¹და გააკეთეს მოსემ და ელეაზარ მღვდელმა, როგორც უბრძანა უფალმა მოსეს.

³²და იყო ნადავლი, გარდა მეომართა მიერ დატაცებულისა, წვრილფეხა საქონელი - ექვსას სამოცდათხუთმეტი ათასი,

³³და მსხვილფეხა საქონელი - სამოცდათორმეტი ათასი,

³⁴და სახედრები - სამოცდაერთი ათასი,

³⁵და ადამიანთაგან, ქალები, რომელთაც არ ჰქონდათ შეცნობილი მამაკაცის საწოლი, სულ - ოცდათორმეტი ათასი სული.

³⁶და ომში ნამყოფთა ნახევარი წილი აღრიცხვით იყო: წვრილფეხა საქონელი - სამასოცდაჩვიდმეტი ათას ხუთასი.

³⁷და იყო ხარკი უფლისათვის ამ წვრილფეხა საქონლიდან - ექვსას სამოცდათხუთმეტი.

³⁸ოცდათექვსმეტი ათასი მსხვილფეხა საქონლიდან ხარკი უფლისათვის - სამოცდათორმეტი.

³⁹და სახედრები - ოცდაათი ათას ხუთასი, და მათგან ხარკი უფლისათვის - სამოცდაერთი.

⁴⁰და ადამიანი - თექვსმეტი ათასი და მათგან ხარკი უფლისათვის - ოცდათორმეტი სული.

⁴¹და მისცა მოსემ ხარკი, შესაწირავი უფლისა, ელეაზარ მღვდელს, როგორც უბრძანა უფალმა მოსეს.

⁴²და ისრაელის ძეთა ნახევრისაგან, რომელიც გამოყო მოსემ მეომართაგან,

⁴³ეს ნახევარი იყო თემისათვის: წვრილფეხა საქონელი - სამასოცდაჩვიდმეტი ათას ხუთასი,

⁴⁴და მსხვილფეხა საქონელი - ოცდათექვსმეტი ათასი,

⁴⁵და სახედრები - ოცდაათიათას ხუთასი,

⁴⁶და ადამიანები - თექვსმეტი ათასი.

⁴⁷და აიღო მოსემ ისრაელის ძეთა ნახევრისაგან ერთი ორმოცდამეათედი წილი ადამინთაგან და პირუტყვთაგან, და მისცა ეს ლევიანებს, უფლის სავანის მოვალეობის შემსრულებელთ, როგორც უბრძანა უფალმა მოსეს.

⁴⁸და მივიდნენ მოსესთან, ლაშქრის ათასისთავთა მთავრები, ათასისთავები და ასისთავები,

⁴⁹და უთხრეს მოსეს: “შენმა მსახურებმა აღრიცხეს მეომარნი, რომელნიც ჩვენს ხელქვეით არიან, და არ აკლია მათგან არც ერთი კაცი.

⁵⁰და შევწირავთ შესაწირავს უფალს, ვინც რა იპოვა ოქროს ჭურჭელთაგან - სალტეებს, სამაჯურებს, ბეჭდებს, საყურეებს და ყელსაბამებს, ჩვენი სულების შენდობისათვის უფლის წინაშე.”

⁵¹და აიღეს მოსემ და ელეაზარ მღვდელმა ეს ოქრო მათგან, ყოველი ეს სამკაული, ოსტატურად ნაკეთები.

⁵²და მთელი შემონაწირი ოქრო, რომელიც უფალს შესწირეს იყო თექვსმეტი ათას შვიდას ორმოცდაათი შეკელი - ათასისთავებისაგან და ასისთავებისაგან.

⁵³და მეომრებს, თითოეულს თავისი წილი ჰქონდათ დატაცებული.

⁵⁴და აიღეს მოსემ და ელეაზარ მღვდელმა ოქრო ათასისთავებისაგან და ასისთავებისაგან, და მიიტანეს იგი საკრებულო კარავში უფლის წინაშე ისრაელის ძეთა სამახსოვროდ.