Read სბს–სტოკჰოლმი 2001 რიცხვნი 34 Bible Online

რიცხვნი 34 - სბს–სტოკჰოლმი 2001 bible

რიცხვნი 34

¹და უთხრა უფალმა მოსეს:

²“უბრძანე ისრაელის ძეთ და უთხარი მათ: ‘როცა შეხვალთ ქანაანის ქვეყანაში, აჰა, ესაა ქვეყანა, რომელიც გერგებათ სამკვიდრებლად, ქვეყანა ქანაანისა თავისი საზღვრებით.

³და თქვენი იქნება სამხრეთის მხარე ცინის უდაბნოდან, ედომის მახლობლად, და გექნებათ სამხრეთის საზღვარი მარილოვანი ზღვის ბოლოდან აღმოსავლეთის მიმართულებით.

⁴და გადაუხვევს საზღვარი სამხრეთიდან ყაკრაბიმის მაღლობისაკენ და გაივლის ცინისაკენ, და იქნება მისი გამოსავალი სამხრეთიდან კადეშ-ბარნეაყის მიმართულებით, და იგი გავა ხაცარ-ადარისაკენ, და ჩაუვლის ყაცმონს.

⁵და გადაუხვევს საზღვარი ყაცმონიდან ეგვიპტის ხევისაკენ და გავა ზღვის მიმართულებით.

⁶ხოლო დასავლეთის საზღვრად გექნებათ დიდი ზღვის სანაპირო. ეს იქნება თქვენთვის დასავლეთის საზღვარი.

⁷და ეს იქნება თქვენთვის საზღვარი ჩრდილოეთისა: დიდი ზღვიდან გაატარეთ იგი ჰორის მთის მიმართულებით.

⁸ჰორის მთიდან გაატარეთ იგი ხამათის მისადგომამდე, და იყოს საზღვრის ბოლო ცედადთან.

⁹და გავა საზღვარი ზიფრონისაკენ, და იქნება მისი ბოლო ხაცარ-ყენანთან. ეს გექნებათ ჩრდილოეთის საზღვრად.

¹⁰და გაავლეთ თქვენთვის ხაზი აღმოსავლეთის საზღვრისათვის ხაცარ-ყენანიდან შეფამის მიმართულებით,

¹¹და დაეშვება საზღვარი შეფამიდან რიბლასაკენ, ყაინის აღმოსავლეთით, და დაეშვება საზღვარი და შეეხება ქინერეთის ზღვის სანაპიროს აღმოსავლეთიდან.

¹²და დაეშვება საზღვარი იორდანესაკენ და იქნება მისი ბოლო მარილოვან ზღვასთან. ეს იქნება თქვენი ქვეყანა მისი საზღვრებით ყოველი მხრიდან.’”

¹³და უბრძანა მოსემ ისრაელის ძეთ ასე: “აჰა, ქვეყანა, რომელსაც დაიმკვიდრებთ წილისყრით, რომლის მიცემაც ბრძანა უფალმა ცხრა ტომისათვის და ნახევარი ტომისათვის.

¹⁴რადგან მიიღეს რეუბენის ძეთა ტომმა თავისი მამისსახლის მიხედვით, და გადის ძეთა ტომმა თავისი მამისსახლის მიხედვით, და მენაშეს ნახევარმა ტომმა. მათ მიიღეს თავიანთი წილი.

¹⁵ამ ორმა ტომმა და ნახევარმა ტომმა მიიღეს თავიანთი ნაწილი იორდანეს გაღმა, იერიხოს პირდაპირ, აღმოსავლეთით.”

¹⁶და უთხრა უფალმა მოსეს:

¹⁷“ეს არის იმ კაცთა სახელები, რომელნიც დაანაწილებენ ქვეყანას: ელეაზარ მღვდელი და იესო, ძე ნავესი.

¹⁸და თითო ტომიდან თითო მთავარი მოიყვანეთ ქვეყნის დასანაწილებლად.

¹⁹და ეს არის სახელები ამ კაცებისა: იუდას ტომისათვის: ქალები, იეფუნეს ძე.

²⁰სიმონის ძეთა ტომისათვის სამუელი, ძე ყამიჰუდისა.

²¹ბენიამინის ტომისათვის: ელიდადი, ძე ქისლონისა.

²²დანის ძეთა ტომისათვის: მთავარი ბუკი, ძე იოგლისა.

²³იოსების ძეთათვის: მენაშეანთა ტომისათვის: მთავარი ხანიელი, ძე ეფოდისა.

²⁴ეფრემიანთა ტომისათვის: მთავარი კემუელი, ძე შიფტანისა;

²⁵ზებულუნის ძეთა ტომისათვის: მთავარი ელიცაფანი, ძე ფარნაქისა.

²⁶ისაქარის ძეთა ტომისათვის: მთავარი ფალტიელი, ძე ყაზანისა.

²⁷აშერის ძეთა ტომისათვის მთავარი: ახიჰუდი, ძე შელომისა.

²⁸ნაფთალის ძეთა ტომისათვის: მთავარი ფედაჰელი, ძე ყამიჰუდისა.”

²⁹ესენი არიან ისინი, რომლებსაც უბრძანა უფალმა ისრაელის ძეთა განაწილება ქანაანის ქვეყანაში.