Read სბს–სტოკჰოლმი 2001 რიცხვნი 35 Bible Online

რიცხვნი 35 - სბს–სტოკჰოლმი 2001 bible

რიცხვნი 35

¹და უთხრა უფალმა მოსეს მოაბის ველებზე, იორდანესთან, იერიხოს პირდაპირ:

²“უბრძანე ისრაელის ძეთ, რომ მისცენ ლევიანებს თავიანთი სამკვიდრო სამფლობელოდან ქალაქები საცხოვრებლად, და აგრეთვე საძოვრები ქალაქების ირგვლივ მიეცით ლევიანებს.

³და იქნება ქალაქები მათთვის საცხოვრებლად, ხოლო მათი საძოვრები იქნება მათი საქონლისათვის და მათი ქონებისათვის, და ყველა მათი სარჩოსათვის.

⁴და ქალაქების საძოვრები, რომლებსაც მისცემთ ლევიანებს, ქალაქის გარე კედლიდან ათას წყრთაზე გადიოდეს ირგვლივ.

⁵და გაზომეთ ქალაქგარეთ აღმოსავლეთ მხარეს ორიათასი წყრთა, და სამხრეთ მხარეს ორი ათასი წყრთა და დასავლეთ მხარეს ორი ათასი წყრთა, და ჩრდილოეთ მხარეს ორი ათასი წყრთა, ხოლო ქალაქი იყოს შუაში: ეს იქნება მათთვის ქალაქთა საძოვრები.

⁶ქალაქიდან, რომლებსაც თქვენ მისცემთ ლევიანებს, ექვსი ქალაქი იყოს თავშესაფრად, რომლებსაც გამოყოფთ მკვლელისთვის იქ გასაქცევად. და მათ გარდა მიეცით ორმოცდაორი ქალაქი.

⁷ყველა ქალაქი, რომელიც თქვენ უნდა მისცეთ ლევიანებს, ორმოცდარვა ქალაქია თავისი საძოვრებიანად.

⁸და ქალაქებს, რომლებსაც მისცემთ ისრაელის ძეთა სამფლობელოდან, მრავალრიცხოვანთაგან აიღეთ მეტი, ხოლო მცირერიცხოვანთაგან - ნაკლები. ყოველმა ტომმა თავისი სამკვიდრებლის მიხედვით უნდა მისცეს ლევიანებს თავიანთი ქალაქებიდან, რასაც დაიმკვიდრებენ.”

⁹და უთხრა უფალმა მოსეს:

¹⁰“განუცხადე ისრაელის ძეთ და უთხარი მათ: ‘როცა გადახვალთ იორდანეს გადაღმა, ქანაანის ქვეყანაში,

¹¹მაშინ დანიშნეთ თქვენთვის ქალაქები, რომლებიც თავშესაფარი ქალაქები იქნება თქვენთვის. და გაიქცევა იქ მკვლელი, რომელსაც უნებლიედ შემოაკვდება კაცი.

¹²ეს ქალაქები იქნება თქვენთვის თავშესაფრად შურის მაძიებლისაგან, რომ არ მოკვდეს მკვლელი, ვიდრე წარსდგებოდეს თემის წინაშე სამსჯავროზე.

¹³და ქალაქებიდან, რომლებსაც თქვენ მისცემთ, ექვსი ქალაქი თავშესაფრად იყოს თქვენთვის.

¹⁴სამი ქალაქი მიეცით იორდანეს გამოღმა მხარეს და სამი ქალაქი მიეცით ქანაანის ქვეყანაში. თავშესაფარ ქალაქებად იქნება ისინი.

¹⁵ისრაელის ძეთათვის და ხიზნისთვის და ახალ მოსახლისათვის, მათ შორის იყოს ეს ექვსი ქალაქი თავშესაფრად, რათა გაიქცეს იქ ყველა, ვისაც უნებლიედ შემოაკვდება კაცი.

¹⁶ხოლო თუ ვინმე რკინის იარაღს დაარტყამს ვინმეს და მოკვდება იგი, მაშინ ის მკვლელია. სიკვდილით უნდა მოკვდეს მკვლელი

¹⁷და თუ ვინმე ხელით ქვას დაარტყამს ვინმეს, რომლითაც შეიძლება მოკვდეს, და იგი მოკვდება, მაშინ ის მკვლელია. სიკვდილით უნდა მოკვდეს მკვლელი.

¹⁸ან, თუ ხის იარაღს დაარტყამს ხელით, რომლითაც შეიძლება მოკვდეს, და იგი მოკვდება, მაშინ ის მკვლელია. სიკვდილით უნდა მოკვდეს მკვლელი.

¹⁹მესისხლეს თვით შეუძლია მოკლას მკვლელი. როცა შეხვდება მას, თვით შეუძლია მისი მოკვლა.

²⁰და თუ ვინმე სიძულვილით ხელს ჰკრავს ვინმეს, ან მას განზრახ სტყორცნის და იგი მოკვდება,

²¹ან თუ მტრობით დაარტყამს ხელს, და იგი მოკვდება, სიკვდილით უნდა მოკვდეს ის, რომელმაც დაარტყა მას, რადგან მკვლელია იგი; მესისხლეს შეუძლია მოკლას ეს მკვლელი, როცა შეხვდება მას.

²²მაგრამ თუ უცაბედად, მტრობის გარეშე, ჰკრა ხელი, ან ესროლა მას რაიმე საგანი განუზრახველად,

²³ან რაიმე ქვა, რომლითაც შეიძლება მოკვდეს, დაუნახავად მოახვედრებს მას და ის მოკვდება, და იგი არ ყოფილა მისი მტერი და არც მისთვის ავი მოუსურვებია,

²⁴მაშინ უნდა განსაჯოს თემმა მკვლელსა და მესისხლეს შორის ამ წესის მიხედვით.

²⁵და უნდა იხსნას თემმა მკვლელი მესისხლის ხელიდან, და უნდა დააბრუნოს იგი თემმა მის თავშესაფარ ქალაქში, სადაც გაიქცა, რათა დამკვიდრდეს იქ, ვიდრე მოკვდებოდეს მღვდელმთავარი, ცხებული წმიდა ზეთით.

²⁶ხოლო თუ მკვლელი გასვლით გავა თავშესაფარი საზღვრიდან, სადაც იგი გაიქცა,

²⁷და მას ნახავს მესისხლე მისი თავშესაფარი ქალაქის საზღვრის გარეთ, სადაც იგი გაიქცა, და მოკლავს მესისხლე მკვლელს, მაშინ არაა მესისხლეზე სისხლი,

²⁸რადგან თავის თავშესაფარ ქალაქში უნდა დამკვიდრდეს იგი, ვიდრე მღვდელმთავარი მოკვდებოდეს. ხოლო მღვდელმთავრის სიკვდილის შემდეგ დაუბრუნდეს მკვლელი თავის სამფლობელოს.

²⁹ეს იყოს თქვენთვის რჯულის წესად თქვენს თაობებში, ყველა თქვენს საცხოვრებელ ადგილებში.

³⁰ყველა, ვინც კაცს მოკლავს, მკვლელი მოწმეთა ჩვენებით უნდა მოიკლას. მარტო ერთი მოწმის მხილებით არავინ არ უნდა მოკვდეს სიკვდილით.

³¹არ აიღოთ გამოსასყიდი მკვლელის სულისათვის, რომელიც სასიკვდილო დამნაშავეა, არამედ სიკვდილით უნდა მოკვდეს.

³²და არ აიღოთ გამოსასყიდი თავშესაფარ ქალაქში გაქცეულისაგან მის დასაბრუნებლად ქვეყანაში საცხოვრებლად, ვიდრე მღვდელმთავარი მოკვდებოდეს.

³³არ წაბილწოთ ქვეყანა, რომელშიც თქვენ იმყოფებით, რადგან სისხლი ბილწავს ქვეყანას, და ქვეყანა ვერ გამოისყიდის მასზე დაღვრილ სისხლს, თუ არა მისი დამღვრელის სისხლით.

³⁴და არ წაბილწოთ ქვეყანა, რომელშიც ცხოვრობთ, რომელშიც მე ვმკვიდრდები, რადგან მე, უფალი, ვმკვიდრდები ისრაელის ძეთა შორის.”