Read სბს–სტოკჰოლმი 2001 რიცხვნი 36 Bible Online

რიცხვნი 36 - სბს–სტოკჰოლმი 2001 bible

რიცხვნი 36

¹და მივიდნენ გილყად მაქირის ძის, მენაშეს ძის მამისსახლთა საგვარეულოს მთავარნი იოსების ძეთა საგვარეულოდან და განაცხადეს მოსესა და ისრაელის ძეთა მამამთავრების წინაშე:

²და თქვეს: “ჩვენს ბატონს უბრძანა უფალმა, რათა მისცეს ქვეყანა სამკვიდროდ წილისყრით ისრაელის ძეთ, და ჩვენს ბატონს ებრძანა უფლის მიერ, რათა მიეცა სამკვიდრებელი ცელაფხადისა, ჩვენი ძმისა, მისი ასულებისათვის.

³და თუ ისინი მისთხოვდებიან ისრაელის ძეთა სხვა რომელიმე ტომის ძეებს, მაშინ მათი სამკვიდრებელი მოაკლდება ჩვენი მამების სამკვიდრებელს და მიემატება იმ ტომის სამკვიდრებელს, სადაც იქნებიან ისინი გათხოვილი, ხოლო ჩვენს წილხვედრ სამკვიდრებელს მოაკლდება.

⁴და თუ ექნებათ ვერძობა ისრაელის ძეთ, მაშინ საბოლოოდ მიემატება მათი სამკვიდრო იმ ტომის სამკვიდროს, სადაც იქნებიან ისინი გათხოვილი, და ჩვენი მამების ტომის სამკვიდროს მოაკლდება მათი სამკვიდრებელი.”

⁵და ამცნო მოსემ ისრაელის ძეთ ბრძანება: “მართალს ამბობს იოსების ძეთა ტომი.

⁶ეს არის, რაც ბრძანა უფალმა ცელაფხადის ასულებზე: ‘ვინც მოეწონებათ, იმათ მისთხოვდნენ, ოღონდ მამისეული ტომის საგვარეულოში გათხოვდნენ.

⁷რათა არ გადავიდეს ისრაელის ძეთა სამკვიდრებელი ტომიდან ტომზე. რადგან ისრაელის ძეთაგან თითოეული თავის მამათა ტომის სამკვიდრებელზე უნდა იყოს მიკრული.

⁸ყოველი ასული, სამკვიდრებლის მემკვიდრე ისრაელის ძეთა ტომთაგან, თავისი მამის ტომის საგვარეულოსას უნდა მისთხოვდეს, რათა ისრაელის ძეთაგან დაიმკვიდროს თითოეულმა თავის მამათა სამკვიდრებელი.

⁹არ გადავიდეს სამკვიდრებელი ტომიდან სხვა ტომზე, რადგან ისრაელის ძეთა თითოეული ტომი თავის სამკვიდრებელზე უნდა იყოს მიკრული.”

¹⁰როგორც უბრძანა უფალმა მოსეს, ისე გააკეთეს ცელაფხადის ასულებმა.

¹¹და მისთხოვდნენ: მახლა, თირცა, ხოგლა, მილქა და ნოყა, ასულნი ცელაფხადისა, თავიანთ ბიძაშვილებს ცოლად.

¹²იოსების ძის, მენაშეს ძეთა საგვარეულოებში გათხოვდნენ ისინი. და დარჩა მათი სამკვიდრო თავიანთი მამის ტომის საგვარეულოს.

¹³და ეს არის მცნებანი და წესები, რომელნიც ამცნო უფალმა ისრაელის ძეთ მოსეს ხელით მოაბის ველებზე, იორდანესთან, იერიხოს პირდაპირ.