Read სბს–სტოკჰოლმი 2001 რიცხვნი 8 Bible Online

რიცხვნი 8 - სბს–სტოკჰოლმი 2001 bible

რიცხვნი 8

¹და უთხრა უფალმა მოსეს: “კანდელებს რომ აანთებ,

²განუცხადე აარონს და უთხარი მას: ‘როდესაც კანდლებს აანთებ, პირდაპირ სასანთლის წინ უნდა ენთებოდეს შვიდივე კანდელი.’”

³და გააკეთა ასე აარონმა: პირდაპირ სასანთლის წინ აანთო მისი კანდელები, როგორც უბრძანა უფალმა მოსეს.

⁴და ნაკეთობა სასანთლისა ნაჭედი ოქროსი იყო. ღეროდან ყვავილებამდე ნაჭედი იყო ის. იმ გამოსახულების მიხედვით, რომელიც უჩვენა უფალმა მოსეს, ისე გააკეთა სასანთლე.

⁵და უთხრა უფალმა მოსეს:

⁶“აიყვანე ლევიანები ისრაელის ძეთაგან და განწმიდე ისინი.

⁷და ასე მოექეცი მათ, რათა განწმიდო ისინი: აპკურე მათ განმწმედი და გაიპარსონ სამართებლით მთელი ტანი, და გაირეცხონ სამოსელი, და განიწმიდებიან.

⁸და აიყვანონ ნორჩი მოზვერი და მასთან ერთად პურეულის ძღვენი, ზეთში აზელილი წმიდა ხორბლის ფქვილი, და მეორე ნორჩი მოზვერი აიყვანონ ცოდვისთვის.

⁹და მიიყვანე ლევიანები საკრებულო კარვის წინაშე, და შეკრიბე მთელი თემი ისრაელის ძეთა.

¹⁰და მოიყვანე ლევიანები უფლის წინაშე, და დაასხან ისრაელის ძეთ ხელები ლევიანებს.

¹¹და წარადგენს აარონი ლევიანებს უფლის წინაშე, როგორც შესარხევ შესაწირავს ისრაელის ძეთაგან, რათა შეასრულონ უფლის მსახურება.

¹²და ლევიანები დაასხამენ ხელებს მოზვრებს თავზე, და შესწირე ერთი ცოდვისათვის, ხოლო მეორე სრულადდასაწველად უფლისათვის, ლევიანთა შესანდობად.

¹³და დააყენე ლევიანები აარონის წინაშე და მის ძეთა წინაშე, და წარადგინე შესარხევი შესაწირავი უფლისათვის.

¹⁴და გამოყავი ლევიანები ისრაელის ძეთაგან, და იქნებიან ლევიანები ჩემთვის.

¹⁵და მას შემდეგ ჩადგებიან ლევიანები საკრებულო კარვის სამსახურში, როცა განწმედ მათ, და შესარხევი შესაწირავივით წარადგენ.

¹⁶რადგან ჩემთვის არიან ისინი მოცემით მოცემულნი ისრაელის ძეთაგან. ყოველი საშოს გამღების, ისრაელის ძეთა ყოველი პირმშოს ნაცვლად ავიყვანე ისინი ჩემთვის.

¹⁷რადგან ჩემია ისრაელის ძეთა ყოველი პირმშო, ადამიანიდან პირუტყვამდე: იმ დღეს, როცა მოვსპე ყოველი პირმშო ეგვიპტის ქვეყანაში, ჩემთვის განვიკუთვნე ისინი,

¹⁸და ავიყვანე ლევიანები ყოველი პირმშოს ნაცვლად ისრაელის ძეთაგან.

¹⁹და საჩუქრად მივეცი ლევიანები აარონს და მის ძეთ ისრაელის ძეთაგან, რათა შეასრულონ ისრაელის ძეთა სამსახური საკრებულო კარავში და შეუნდონ ისრაელის ძეთ, რათა არ იყოს ისრაელის ძეთა შორის მომსრველი სენი, როცა ისრაელის ძენი საწმიდარს მიეკარებიან.”

²⁰და გააკეთეს ასე მოსემ და აარონმა და ისრაელის ძეთა მთელმა თემმა ლევიანთათვის. ყოველივე, როგორც უბრძანა უფალმა მოსეს ლევიანთა შესახებ, ისე გააკეთეს მათთვის ისრაელის ძეთ.

²¹და განიწმიდნენ ცოდვისგან ლევიანები, და გაირეცხეს თავიანთი სამოსელი, და წარადგინა ისინი აარონმა შესარხევი შესაწირავივით უფლის წინაშე, და შეუნდო მათ აარონმა, რათა განეწმიდა ისინი.

²²და ამის შემდეგ შევიდნენ ლევიანები თავიანთი მსახურების შესასრულებლად საკრებულო კარავში აარონის წინაშე და მის ძეთა წინაშე. როგორც უბრძანა უფალმა მოსეს ლევიანთა შესახებ, ისე გაუკეთეს მათ.

²³და უთხრა უფალმა მოსეს:

²⁴“ესაა რჯული ლევიანთათვის: ოცდახუთი წლის ასაკიდან და უფროსნი, თითოეული მათგანი შევა სამსახურისათვის, რათა იმსახუროს საკრებულო კარავში.

²⁵მაგრამ ორმოცდაათი წლის ასაკიდან ისინი თავს დაანებებენ სამსახურს და აღარ ემსახურებიან მეტად.

²⁶მხოლოდ მოეხმარონ თავიანთ ძმებს საკრებულო კარვის დაცვაში, ოღონდ სამსახურს ნუ შეასრულებენ. ასე მოექეცი ლევიანებს მათი მოვალეობის აღსრულებისას.”