Read სბს–სტოკჰოლმი 2001 ნაუმი 1 Bible Online

ნაუმი 1 - სბს–სტოკჰოლმი 2001 bible

ნაუმი 1

¹ნინევეს განაჩენი. ელკოშელი ნაუმის ხილვის წიგნი.

²იჭვიანი და შურისმგებელი ღმერთია უფალი. შურისმგებელია უფალი და რისხვიანი. შურს მიაგებს უფალი თავის მოწინააღმდეგეთ და ჯავრს არ შეარჩენს თავის მტრებს.

³სულგრძელია უფალი და დიდძალოვანი, დაუსჯელს არავის გაუშვებს. გრიგალშია უფალი და ქარბორბალშია მისი სავალი. ღრუბელი მის ფერხთა მტვერია.

⁴დაემუქრება ზღვას და ამოაშრობს, და დაშრეტს ყველა მდინარეს. გადახმება ბაშანი და ქარმელი, დაჭკნება ლიბანის ყვავილი.

⁵მის ქვეშ იდრიკებიან მთები და ლღვებიან ბორცვები. წამოიმართება მის წინაშე დედამიწა, სამყარო და ყოველი მისი მკვიდრი.

⁶ვინ გაუძლებს მის წყრომას? ვინ აიტანს მის მძვინვარებას? ცეცხლად იღვრება მისი რისხვა, კლდეები ირღვევიან მისგან.

⁷კეთილია უფალი - ციხე-სიმაგრე გასაჭირში, და სცნობს მათ, ვინც მას ესავენ.

⁸მოვარდნილი ღვართქაფივით წალეკავს მის ადგილს, და თავის მტრებს ჩარეკავს წყვდიადში.

⁹რა განუზრახეთ უფალს? ბოლოს მოუღებს ყველაფერს და ვეღარ აღდგება მტერი.

¹⁰რადგან ეკალ-ბარდებივით ჩახლართულნი და მომთვრალეთა მსგავსად დამთვრალნი ერთიანად გადაიბუგებიან ხმელ ჩალასავით.

¹¹შენგან გამოვიდა უფლის წინააღმდეგ ავისმზრახველი, ბელიარის მრჩეველი.

¹²ასე თქვა უფალმა: “თუნდაც ჯანით სავსენი იყვნენ და უამრავნიც, მაინც გაწყდებიან, გადაშენდებიან. ხომ გაგტანჯე, მაგრამ მეტად აღარ გაგტანჯავ.

¹³“ახლა კი დავლეწავ მის უღელს, ქედზე რომ გადგას, და დავწყვეტ შენს ბორკილებს.”

¹⁴ასე ბრძანა შენზე უფალმა: “აღარ მოშენდება შენი სახელი. გავაქრობ კერპსა და ქანდაკს შენი ღმერთის სახლიდან. საფლავს გაგიმზადებ, რადგან არარაობა ხარ.”

¹⁵აჰა, გაისმა მთებზე მახარობლის ფეხის ხმა მშვიდობის მაცნედ! გამართე დღესასწაულები, იუდა, აღთქმები შეასრულე, რადგან აღარ დაგეცემა თავს ბელიარი, საბოლოოდ განადგურდა.