Read სბს–სტოკჰოლმი 2001 ანგია 1 Bible Online

ანგია 1 - სბს–სტოკჰოლმი 2001 bible

ანგია 1

¹დარიოს მეფის მეორე წელს, მეექვსე თვის პირველ დღეს იყო უფლის სიტყვა ანგია წინასწარმეტყველის ხელით იუდას განმგებელ ზერუბაბელ შეალთიელის ძის და მღვდელმთავარ იესო იეჰოცადაკის ძის მიმართ:

²"ასე თქვა ცაბაოთ უფალმა: 'ეს ხალხი ამბობს: ჯერ არ დამდგარაო ჟამი, უფლის სახლის აშენების ჟამი."

³იყო უფლის სიტყვა ანგია წინასწარმეტყველის ხელით:

⁴"იმის ჟამი კი არის, რომ გადახურულ სახლებში ისხდეთ, ეს სახლი კი მიგდებული იყოს?”

⁵ახლა ასე ამბობს ცაბაოთ უფალი: "დაუკვირდით თქვენს საქციელს.

⁶ბევრს თესავთ, მაგრამ ცოტას იმკით; ჭამთ, მაგრამ ვერ ძღებით; სვამთ, მაგრამ ვერ იკლავთ წყურვილს; იცვამთ, მაგრამ ვერ თბებით. გახვრეტილი ქისისთვის იღებს მშრომელი შრომის საზღაურს.”

⁷ასე ამბობს ცაბაოთ უფალი: "დაუკვირდით თქვენს საქციელს.

⁸ადით მთაზე, აიტანეთ ხე-ტყე და ტაძარი ააშენეთ. მოვიწონებ ამას და დიდებით გამოვჩნდები” - ამბობს უფალი, -

⁹"ბევრის მოლოდინი გაქვთ, მაგრამ მცირედი გისრულდებათ. რაც სახლში მიგაქვთ, იმასაც ვანიავებ. რატომ?” - ამბობს ცაბაოთ უფალი. - "იმიტომ, რომ მიგდებულია ჩემი სახლი, თქვენ კი ყველანი თქვენს სახლებზე ზრუნავთ.

¹⁰ამიტომ არის, რომ დაგიკავათ ცამ ცვარი და მიწამ დაგიკავათ მოსავალი.

¹¹გამოვიხმე გვალვა მიწაზე, მთებზე, პურზე, ღვინოზე, ზეთისხილზე და ყველაფერზე, რასაც მიწა აღმოაცენებს, ადამიანზე, პირუტყვზე და ყოველივე ნაჭირნახულევზე.”

¹²ისმინეს ზერუბაბელ შეალთიელის ძემ, იესო იეჰოცადაკის ძემ, მღვდელმთავარმა, და მთელმა დანარჩენმა ხალხმა უფლის, მათი ღვთის, ხმა და ანგია წინასწარმეტყველის სიტყვები, რამდენადაც იგი უფლის, მათი ღვთის, მოვლინებული იყო, და შეეშინდა ხალხს უფლისა.

¹³უთხრა ანგიამ, უფლის მოციქულმა, ხალხს უფლის მოციქულობის ძალით: "მე თქვენთანა ვარ”, - ამბობს უფალი.

¹⁴გააღვიძა უფალმა იუდას განმგებელ, ზერუბაბელ შეალთიელის ძის სული, მღვდელმთავარ იესო იეჰოცადაკის ძის სული და მთელი დანარჩენი ხალხის სული. მივიდნენ და დაიწყეს მუშაობა ცაბაოთ უფლის, მათი ღვთის, სახლში.

¹⁵მეექვსე თვის ოცდამეოთხე დღეს, დარიოს მეფის მეორე წელს.