Read სბს–სტოკჰოლმი 2001 ზაქარია 4 Bible Online

ზაქარია 4 - სბს–სტოკჰოლმი 2001 bible

ზაქარია 4

¹მობრუნდა ანგელოზი, რომელიც მელაპარაკებოდა, და გამაღვიძა, როგორც ძილისგან აღვიძებენ კაცს.

²მითხრა: “რას ხედავ?” ვუთხარი: “ვხედავ, აჰა, მთლიანი ოქროს სასანთლეა, მის თავზე ჯამია და შვიდი ლამპარი და შვიდი საწრეტი ლამპრებზე, რომლებიც მის თავზეა

³ორი ზეთისხილის ხეა მის გვერდით, ერთი ჯამი მარჯვნივ, მეორე მის მარცხნივ.”

⁴ხმა გავიღე და ვუთხარი ანგელოზს, მე რომ მელაპარაკებოდა: “რა არის ესენი, ჩემო ბატონო?”

⁵მომიგო ანგელოზმა, რომელიც მე მელაპარაკებოდა, და მითხრა: “განა არ იცი, რა არის ესენი?” ვუთხარი: “არა-მეთქი, ჩემო ბატონო.”

⁶მომიგო და მითხრა: “ეს არის უფლის სიტყვა ზერუბაბელის მიმართ ნათქვამი: არა ძალითა და ძლიერებით, არამედ ჩემი სულითო, - ამბობს ცაბაოთ უფალი.-

⁷რა ხარ შენ, დიდო მთაო? ზერუბაბელის წინაშე გასწორდები! გამოიტანს თავკიდურ ლოდს და შესძახებენ: მადლი, მადლი მას!”

⁸იყო უფლის სიტყვა ჩემს მომართ ნათქვამი:

⁹“ზერუბაბელის ხელმა ჩაყარა ამ სახლის საფუძველი და მისივე ხელი დაასრულებს. და მიხვდები, რომ ცაბაოთ უფალმა მომავლინა თქვენთან.

¹⁰რადგან ვინც კნინად შერაცხა ეს დღე, გაიხარებს, როცა დაინახავს შვეულს ზერუბაბელის ხელში. უფლის შვიდი თვალია ესენი, მთელს ქვეყანას რომ ჭვრეტენ.”

¹¹მივუგე და ვუთხარი მას: “რა არის ეს ორი ზეთისხილის ხე სასანთლის მარჯვნივ და მარცხნივ?”

¹²მივუგე მეორედ და ვუთხარი მას: “რა არის ეს ორი აკიდო ზეთისხილისა ორი ოქროს მილაკის გვერდით, საიდანაც ზეითუნის ზეთი იღვრება?”

¹³მითხრა: “არ იცი, რა არის ესენი?” ვუთხარი: “არა-მეთქი, ჩემო ბატონო.”

¹⁴მითხრა: “ორნი ცხებულნი არიან ესენი, მთელი ქვეყნის უფლის წინაშე მდგარნი.”