Read სბს–სტოკჰოლმი 2001 ზაქარია 6 Bible Online

ზაქარია 6 - სბს–სტოკჰოლმი 2001 bible

ზაქარია 6

¹კვლავ ავახილე თვალი და ვიხილე: აჰა, ოთხი ეტლი, ორ მთას შორის გამომავალი. მთები კი სპილენძისა იყო.

²პირველ ეტლში წითელი ცხენები იყო, მეორე ეტლში შავი ცხენები.

³მესამე ეტლში თეთრი ცხენები, მეოთხე ეტლში ულაყები, ნისლისფერნი.

⁴ხმა გავიღე და ვუთხარი ანგელოზს, რომელიც მელაპარაკებოდა: “რა არის-მეთქი ესენი, ჩემო ბატონო?”

⁵მომიგო ანგელოზმა და მითხრა: “ცის ოთხი სულია ესენი, იმ ადგილიდან გამომავალნი, სადაც მთელი ქვეყნის უფლის წინაშე დგანან.

⁶მათგან შავი ცხენები ჩრდილოეთის ქვეყნისკენ არიან გამოსულნი, თეთრები მათ უკან გამოვიდნენ და ულაყები სამხრეთის ქვეყნისკენ მიდიან.

⁷ნისლისფერნი გამოვიდნენ და ქვეყნის შემოვლა მოინდომეს.” უთხრა: “წადით, მოიარეთ ქვეყანა!” და მოიარეს ქვეყანა.

⁸დამიყვირა და ასე დამელაპარაკა: “შეხედე, ჩრდილოეთის ქვეყნისკენ გასულებმა დააცხრეს ჩემი სული ჩრდილოეთის ქვეყანაში.”

⁹იყო უფლის სიტყვა ჩემს მომართ ნათქვამი:

¹⁰“აიღე ძღვენი გადასახლებულთაგან - ხელდაისგან, ტობიასგან, და იედაყიასაგან და წადი დღესვე და შედი იოშია ცეფანიას ძის სახლში, სადაც ისინი მივიდნენ ბაბილონიდან.

¹¹გამოართვი ვერცხლი და ოქრო, გააკეთე გვირგვინები და დაადგი თავზე იესო იეჰოცადაკის ძეს, მღვდელმთავარს.

¹²უთხარი: “ასე ამბობს-თქო ცაბაოთ უფალი: ‘აჰა, კაცი - მორჩია მისი სახელი, რადგან თავისი ადგილიდან აღმოცენდება და ააშენებს უფლის ტაძარს.

¹³ის ააშენებს უფლის ტაძარს და იტვირთავს დიდებას, დაჯდება და იხელმწიფებს თავის ტახტზე; ის იქნება მღვდელი თავის ტახტზე და თანხმობა იქნება ამ ორთა შორის.’”

¹⁴“გვირგვინი ჰქონდეს ხელემს, ტობიას, იედაყიას და ხენს, ცეფანიას ძეს, სამახსოვროდ უფლის ტაძარში.

¹⁵შორსმყოფნი მოვლენ და ააშენებენ უფლის ტაძარს.” და მიხვდებით, რომ ცაბაოთ უფალმა მომავლინა თქვენთან. ეს მოხდება, თუ გაგონებით გაიგონებთ უფლის, თქვენი ღვთის, ხმას.