Read სბს–სტოკჰოლმი 2001 მალაქია 1 Bible Online

მალაქია 1 - სბს–სტოკჰოლმი 2001 bible

მალაქია 1

¹განაჩენი. სიტყვა უფლისა ისრაელისადმი მალაქიას პირით:

²“მე შეგიყვარეთ თქვენ”, - ამბობს უფალი. თქვენ კი ამბობთ: “რისთვის შეგვიყვარე”? “განა ესავი იაკობის ძმა არ არის?” - ამბობს უფალი, - “მაგრამ მე იაკობი შევიყვარე,

³ესავი კი შევიძულე და გავაუკაცრიელე მისი მთები და უდაბნოს ტურებს მივეცი მისი სამკვიდრო.”

⁴თუმცა ამბობს ედომი: “დარბეული ვართ, მაგრამ კვლავ ავაშენებთ ნაოხარს”. ცაბაოთ უფალი ასე ამბობს: “ისინი ააშენებენ და მე დავანგრევ. დაარქმევენ მათ ბოროტების მხარეს და ისეთ ხალხს, რომელსაც სამუდამოდ შემოსწყრა უფალი.”

⁵იხილავენ ამას თქვენი თვალები და იტყვით: “იდიდა უფალმა ისრაელის საზღვრებს გარეთ.”

⁶“‘შვილი პატივს სცემს მამას და ყმა - თავის ბატონს. თუ მამა ვარ, სად არის ჩემი პატივისცემა? თუ მათი ბატონი ვარ, სად არის ჩემდამი შიში?’ თქვენ გეუბნებათ ცაბაოთ უფალი, მღვდლებო, ჩემი სახელის შეურაცხმყოფელნო, თქვენ კი ამბობთ: ‘რითი შეურაცხვყავით შენი სახელი?’

⁷მოგაქვთ წაბილწული პური ჩემს სამსხვერპლოზე და ამბობთ: რითი წაგბილწეთო? იმით, რომ ამბობთ: უფლის ტაბლა რა პატივის ღირსიაო.

⁸ბრმას რომ მწირავთ მსხვერპლად, ცუდი არ არის? კოჭლი და სნეული რომ მოგყავთ, ცუდი არ არის? აბა, მიართვი იგი შენს ხელისუფალს, თუ მოგიწონოს ან თუ კეთილად შემოგხედოს? - ამბობს ცაბაოთ უფალი. -

⁹ახლა კი შეევედრეთ ღმერთს, ვინძლო შეგიწყალოთ. როგორ შემოგხედოთ კეთილად, როცა ეს გამოდის თქვენი ხელიდან? - ამბობს ცაბაოთ უფალი. -

¹⁰რომელმა თქვენგანმა დახშა კარი, რომ ფუჭად არ ანთებდეთ ცეცხლს ჩემს სამსხვერპლოზე! არ მეთნევით,- ამბობს ცაბაოთ უფალი,- და არ მეამება თქვენი ხელით მორთმეული ძღვენი.

¹¹რადგან დიდი იქნება ჩემი სახელი ხალხებში მზის აღმოსავალიდან დასავალამდე. ყოველ ადგილს დაუკმევენ საკმეველს ჩემს სახელს და წმიდა ძღვენს შემომწირავენ, რადგან დიდი იქნება ჩემი სახელი ხალხებში, - ამბობს ცაბაოთ უფალი. -

¹²თქვენ კი შელახეთ იგი თქვენი ნათქვამით: უფლის ტაბლა წაბილწულიაო და ნაყოფი მისი შესაზიზღიაო საჭმელად.

¹³ამბობთ: აჰა, რა დამქანცველიაო. და გძულთ იგი, - ამბობს ცაბაოთ უფალი, - და მოგყავთ ნატაცები, კოჭლი და სნეული. ძღვენიც ასეთივე მოგაქვთ - როგორ მეამოს მისი მიღება თქვენი ხელიდან? - ამბობს უფალი. -

¹⁴წყეულიმც იყოს ის თვალთმაქცი, ვისაც მამალი პირუტყვი ჰყავს ფარაში, მაგრამ დასახიჩრებულს აღუთქვამს მსხვერპლად უფალს! რადგან დიდი მეფე ვარ მე, - ამბობს ცაბაოთ უფალი,- და საშინელია ჩემი სახელი ხალხებში.”