Read სბს–სტოკჰოლმი 2001 მათეს სახარება 14 Bible Online

მათეს სახარება 14 - სბს–სტოკჰოლმი 2001 bible

მათეს სახარება 14

¹იმ დროს ესმა ჰეროდეს - ტეტრარქს - იესოს ამბავი.

²და უთხრა თავის მსახურებს: "ეს იოანე ნათლისმცემელია, მკვდრეთით აღდგა და ამიტომ სასწაულნი მოქმედებენ მასში."

³ვინაიდან ჰეროდემ შეიპყრო იოანე, შებორკა და საპყრობილეში ჩასვა თავისი ძმის, ფილიპეს ცოლის, ჰეროდიას, გამო.

⁴ვინაიდან იოანე ეუბნებოდა მას: შენთვის ნებადართული არ არის მისი ყოლა.

⁵და უნდოდა მისი მოკვლა, მაგრამ ხალხისა ეშინოდა, რადგან წინასწარმეტყველად მიაჩნდათ იგი.

⁶ჰეროდეს დაბადების დღეს ჰეროდიას ასულმა იცეკვა შეკრებილთა წინაშე და აამა ჰეროდეს.

⁷ამიტომ ფიცით შეჰპირდა მას, მიეცა, რაც არ უნდა ეთხოვა.

⁸ხოლო მან, თავისი დედისაგან დარიგებულმა, უთხრა: “მომეცი აქ ლანგრით იოანე ნათლისმცემლის თავი.”

⁹და შეწუხდა მეფე, მაგრამ, ფიცისა და თანამეინახეთა რიდის გამო, ბრძანა მიცემა.

¹⁰და წარგზავნა და იოანესათვის თავი მოაკვეთინა საპყრობილეში.

¹¹და მოიტანეს მისი თავი ლანგრით და მისცეს ქალიშვილს, მან კი თავის დედას მიართვა.

¹²და მოვიდნენ მისი მოწაფეები, წაიღეს მისი ნეშტი და დამარხეს. მივიდნენ და აუწყეს იესოს.

¹³ეს რომ იესომ მოისმინა, წავიდა იქიდან ნავით და ერთ უდაბურ ადგილას განმარტოვდა. და ეს რომ ხალხმა გაიგო, ფეხით გაედევნა მას ქალაქებიდან.

¹⁴გამოვიდა და, უამრავი ხალხი რომ დაინახა, შეებრალა ისინი და განკურნა მათი სნეულები.

¹⁵როცა მოსაღამოვდა, მივიდნენ მასთან მოწაფეები და უთხრეს: “აქ უდაბნო ადგილია, ჟამიც გვიანია. გაუშვი ეს ხალხი, რომ წავიდნენ სოფლებში და საჭმელი იყიდონ თავისთვის.”

¹⁶იესომ კი უთხრა მათ: “არ არის საჭირო მათი წასვლა. თქვენ მიეცით საჭმელი.”

¹⁷მათ უთხრეს: “ჩვენ აქ მხოლოდ ხუთი პური და ორი თევზი გვაქვს.”

¹⁸მან უთხრა: “აქ მომიტანეთ.”

¹⁹და უბრძანა ხალხს, ბალახზე დამსხდარიყვნენ. აიღო ხუთი პური და ორი თევზი, ზეცას ახედა, აკურთხა, დაამტვრია და დაურიგა პურები მოწაფეებს, მოწაფეებმა კი - ხალხს.

²⁰ყველამ ჭამა და გაძღა. ხოლო დარჩენილი ნატეხებისგან აკრიფეს თორმეტი სავსე გოდორი.

²¹მჭამელი კი ხუთი ათასამდე კაცი იყო, გარდა ქალებისა და ბავშვებისა.

²²და მაშინვე აიძულა იესომ თავისი მოწაფეები, ნავში ჩამსხდარიყვნენ და მასზე ადრე გასულიყვნენ გაღმა, ვიდრე ის ხალხს გაუშვებდა.

²³როცა გაუშვა ხალხი, მთაზე ავიდა, რათა განმარტოებით ელოცა. მოსაღამოვდა და იგი მარტო იყო იქ.

²⁴ნავი უკვე მრავალ სტადიონზე წასულიყო ხმელეთიდან და ტალღები ეხეთქებოდნენ მას, რადგან პირქარი იყო.

²⁵ღამის მეოთხე გუშაგობისას მივიდა მათთან იესო პირდაპირ ზღვაზე სვლით.

²⁶მოწაფეებმა ზღვაზე მავალი რომ დაინახეს, შეძრწუნდნენ და თქვეს: ეს მოჩვენებააო, და შიშისაგან შეჰყვირეს.

²⁷მაგრამ იესო მყისვე გამოელაპარაკა მათ და უთხრა: “გამხნევდით, მე ვარ, ნუ გეშინიათ!”

²⁸მიუგო მას პეტრემ და უთხრა: “უფალო, თუ ეს შენა ხარ, მიბრძანე, მოვიდე შენთან წყალდაწყალ.”

²⁹უთხრა: “მოდი!” პეტრე გადმოვიდა ნავიდან და წყალდაწყალ წავიდა, რათა იესოსთან მისულიყო.

³⁰მაგრამ, ქარი რომ დაინახა, შეეშინდა, ჩაძირვა დაიწყო და იყვირა: “უფალო, მიხსენი მე!”

³¹იესომ იმ წამსვე გაუწოდა ხელი, ამოიყვანა და უთხრა: “რატომ დაეჭვდი, მცირედმორწმუნევ?”

³²როცა ისინი ნავში ავიდნენ, ქარი ჩადგა.

³³ნავში მყოფებმა თაყვანი სცეს მას და უთხრეს: “ჭეშმარიტად ღვთის ძე ხარ შენ.”

³⁴გაღმა გავიდნენ და მივიდნენ გენესარეთის ქვეყანაში.

³⁵იმ ადგილის ხალხმა იცნო იგი, წარგზავნეს მთელს იმ მხარეს და მოჰყავდათ მასთან ყველა ავადმყოფი.

³⁶და ევედრებოდნენ მას, რომ მისი სამოსის კალთას მაინც შეხებოდნენ. და ვინც შეეხო, განიკურნა.