Read სბს–სტოკჰოლმი 2001 მათეს სახარება 26 Bible Online

მათეს სახარება 26 - სბს–სტოკჰოლმი 2001 bible

მათეს სახარება 26

¹ყველა ეს სიტყვა რომ დაასრულა, იესომ უთხრა თავის მოწაფეებს:

²“თქვენ იცით, რომ ორი დღის შემდეგ პასექი დადგება და კაცის ძე მიეცემა ჯვარზე საცმელად.”

³მაშინ შეიკრიბნენ მღვდელმთავარნი და ხალხის უხუცესნი კაიაფად წოდებული მღვდელმთავრის ეზოში.

⁴მოითათბირეს, მზაკვრულად შეეპყროთ იესო და მოეკლათ.

⁵მაგრამ ამბობდნენ: დღესასწაულზე არა, ხალხში შფოთი არ ატყდესო.

⁶როცა იესო ბეთანიაში იყო, სიმონ კეთროვნის სახლში,

⁷მივიდა მასთან ერთი დედაკაცი, მოიტანა ძვირფასი ნელსაცხებელი ალებასტრონის ჭურჭლით და ინახად მჯდომს თავზე დაასხა.

⁸მოწაფეებმა რომ დაინახეს, გაბრაზდნენ და თქვეს: ასე ფუჭად რატომ დახარჯაო?

⁹ვინაიდან შეიძლებოდა ამ ნელსაცხებლის გაყიდვა კარგ ფასად და ღარიბებისათვის დარიგება.

¹⁰ხოლო იესო მიუხვდა და უთხრა მათ: “რატომ აწბილებთ ამ დედაკაცს? მან ხომ კეთილი საქმე გამიკეთა?

¹¹ვინაიდან ღარიბნი მუდამ თქვენთანა გყავთ, მე კი მუდამ არ გეყოლებით.

¹²ეს ნელსაცხებელი რომ დაასხა ჩემს სხეულს, მე მომამზადა დასამარხად.

¹³ჭეშმარიტად გეუბნებით თქვენ: სადაც კი იქადაგებენ ამ სახარებას მთელ ქვეყნიერებაზე, იტყვიან, რაც ამან გააკეთა, მისსავე მოსაგონებლად.”

¹⁴მაშინ ერთი იმ თორმეტთაგანი, იუდა ისკარიოტელად წოდებული, წავიდა მღვდელმთავრებთან

¹⁵და უთხრა: “რას მომცემთ, რომ გადმოგცეთ იგი?” და მიუწონეს მას ოცდაათი ვერცხლი.

¹⁶მას აქეთ ეძებდა მარჯვე შემთხვევას, რომ გაეცა იგი.

¹⁷უფუარობის პირველ დღესვე მივიდნენ მოწაფეები იესოსთან და უთხრეს მას: “სად გინდა, რომ მოგიმზადოთ საჭმელად პასექი?”

¹⁸მან უთხრა: “წადით ქალაქში ამა და ამ კაცთან და უთხარით, ასე ამბობს-თქო მოძღვარი: ჩემი ჟამი მოახლოებულია, შენთან დავიყენებ პასექს ჩემს მოწაფეებთან ერთად.”

¹⁹მოწაფეებმაც ისე გააკეთეს, როგორც იესომ უბრძანა, და მოამზადეს პასექი.

²⁰რომ მოსაღამოვდა, დაჯდა თორმეტ მოწაფესთან ერთად.

²¹და როცა ჭამდნენ, თქვა: “ჭეშმარიტად გეუბნებით თქვენ: ერთი თქვენგანი გამცემს.”

²²ისინი ძალიან შეწუხდნენ და ყველამ სათითაოდ დაუწყო კითხვა: “მე ხომ არა, უფალო?”

²³მან მიუგო და უთხრა: “ვინც ჩემთან ერთად ხელს ჩამოაწობს ჯამში, ის გამცემს.

²⁴კაცის ძე კი მიდის, როგორც დაწერილია მასზე. მაგრამ ვაი იმ კაცს, ვის მიერაც გაიცემა ძე კაცისა, უჯობდა იმ კაცს, არ დაბადებულიყო.”

²⁵მიუგო იუდამ, მისმა გამცემმა, და უთხრა: “ნუთუ მე ვარ, რაბი?” “შენ თქვი!” - უთხრა მას.

²⁶როცა ჭამდნენ, აიღო იესომ პური, აკურთხა და გატეხა, მისცა მოწაფეებს და თქვა: “აიღეთ, ჭამეთ. ეს ჩემი სხეულია.”

²⁷აიღო სასმისი, მადლი შესწირა, მისცა მათ და უთხრა: “ყველამ შესვით აქედან,

²⁸ვინაიდან ეს არის ჩემი სისხლი ახალი აღთქმისა, მრავალთათვის დაღვრილი ცოდვათა მისატევებლად.

²⁹მე გეუბნებით: ამიერიდან აღარ შევსვამ ამ ვაზის ნაყოფისაგან იმ დღემდე, როცა თქვენთან ერთად შევსვამ ახალს მამაჩემის სასუფეველში.”

³⁰იგალობეს და გასწიეს ზეთისხილის მთისაკენ.

³¹მაშინ უთხრა მათ იესომ: “თქვენ ყველანი ცდუნდებით ამაღამ ჩემს გამო, ვინაიდან დაწერილია: ‘დავცემ მწყემსს და გაიფანტებიან სამწყსოს ცხვრები.’

³²ხოლო ჩემი აღდგომის შემდეგ გაგიძღვებით წინ გალილეისაკენ.”

³³მიუგო პეტრემ და უთხრა მას: “ყველანი რომ ცდუნდნენ შენს გამო, მე არასოდეს ვცდუნდები.”

³⁴უთხრა მას იესომ: ჭეშმარიტად გეუბნები შენ: “ამაღამ, სანამ მამალი იყივლებდეს, სამჯერ უარმყოფ მე.”

³⁵უთხრა მას პეტრემ: “მოვკვდები შენთან ერთად და არ უარგყოფ.” ასევე ამბობდა ყველა მოწაფე.

³⁶მაშინ იესო მივიდა მათთან იმ ადგილზე, რომელსაც გეთსიმანია ჰქვია, და უთხრა მოწაფეებს: “აქ ისხედით, ვიდრე იქ წავიდოდე და ვილოცებდე.”

³⁷თან წაიყვანა პეტრე და ზებედეს ორივე ძე, და იწყო წუხილი და ურვა.

³⁸მაშინ უთხრა მათ: “დამწუხრებულია ჩემი სული სასიკვდილოდ. იყავით აქ და იფხიზლეთ ჩემთან ერთად.”

³⁹და ცოტა რომ გაიარა, პირქვე დაემხო, ლოცულობდა და ამბობდა: “მამაო ჩემო, თუ შესაძლოა, ამარიდე ეს სასმისი; მაგრამ არა როგორც მე მსურს, არამედ როგორც შენ.”

⁴⁰მივიდა მოწაფეებთან და ჰპოვა ისინი მძინარენი და უთხრა პეტრეს: “ნუთუ ვერ შესძელით, ერთ საათს გეფხიზლათ ჩემთან ერთად?

⁴¹იფხიზლეთ და ილოცეთ, რომ არ ჩავარდეთ განსაცდელში. სული მხნეა, ხორცი კი უძლური.”

⁴²მეორედაც წავიდა, ლოცულობდა და ამბობდა: “მამაო ჩემო, თუ შეუძლებელია ამარიდო ეს სასმისი, რომ არ შევსვა იგი, იყოს ნება შენი.”

⁴³კვლავ მივიდა და ისევ მძინარენი ჰპოვა ისინი, ვინაიდან თვალები დამძიმებოდათ.

⁴⁴მიატოვა ისინი, კვლავ წავიდა და მესამედ ილოცა, კვლავ იგივე სიტყვები წარმოთქვა.

⁴⁵მაშინ მივიდა მოწაფეებთან და უთხრა მათ: “თქვენ ისევ გძინავთ და ისვენებთ? აჰა, მოახლოვდა ჟამი და კაცის ძე მიეცემა ცოდვილებს ხელში.

⁴⁶ადექით, წავიდეთ, აჰა, მოახლოვდა ჩემი გამცემი.”

⁴⁷ჯერ სიტყვა არ დაემთავრებინა, რომ აჰა, მოვიდა იუდა, ერთი თორმეტთაგანი, და მასთან ერთად დიდძალი ხალხი მახვილებით და კეტებით - მღვდელმთავართაგან და ხალხის უხუცესთაგან.

⁴⁸ხოლო მისმა გამცემმა მისცა მათ ნიშანი და უთხრა: “ვისაც მე ვეამბორები, ის არის და შეიპყარით!”

⁴⁹მყისვე მივიდა იესოსთან და უთხრა: “გიხაროდეს, რაბი!” და ეამბორა.

⁵⁰ხოლო იესომ უთხრა მას: “რისთვის მოსულხარ, მეგობარო?” მაშინ მივიდნენ, ხელი სტაცეს იესოს და შეიპყრეს.

⁵¹და აჰა, ერთ-ერთმა იესოსთან მყოფმა ხელი მიჰყო, იშიშვლა მახვილი, დაჰკრა მღვდელმთავრის მონას და ყური ჩამოათალა.

⁵²მაშინ იესომ უთხრა მას: “თავის ადგილას ჩააბრუნე მახვილი, ვინაიდან ყველა მახვილის ამღები, მახვილითვე დაიღუპება.

⁵³იქნებ გგონია, არ შემეძლოს შევევედრო მამაჩემს, რომ ახლავე წარმომიდგინოს ანგელოზთა თორმეტი ლეგიონი და მეტიც?

⁵⁴აბა, როგორ აღსრულდება წერილი, ეს რომ არ მოხდეს?”

⁵⁵იმ ჟამს უთხრა იესომ ხალხს: “თითქოს ავაზაკის წინააღმდეგ, მახვილებით და კეტებით გამოხვედით ჩემს შესაპყრობად. ყოველდღე ტაძარში ვიჯექი და ვასწავლიდი, და არ შეგიპყრივართ მე.

⁵⁶მაგრამ ყოველივე ეს მოხდა იმიტომ, რომ აღსრულებულიყო წინასწარმეტყველთა წერილები.” მაშინ ყველა მოწაფემ მიატოვა იგი და გაიქცა.

⁵⁷იესოს შემპყრობლებმა კი წაიყვანეს იგი მღვდელმთავარ კაიაფასთან, სადაც თავი მოეყარათ მწიგნობრებსა და უხუცესებს.

⁵⁸ხოლო პეტრე მოშორებით მიჰყვებოდა მას მღვდელმთავრის ეზომდე. შევიდა შიგნით და მსახურებთან დაჯდა, რათა ენახა აღსასრული.

⁵⁹მღვდელმთავარნი და მთელი სინედრიონი ეძებდნენ ცრუმოწმობას იესოს წინააღმდეგ, რათა სიკვდილით დაესაჯათ იგი,

⁶⁰და ვერ პოულობდნენ, თუმცა ბევრი ცრუმოწმე მოდიოდა. ბოლოს მოვიდნენ ორნი

⁶¹და თქვეს: “ეს ამბობდა: შემიძლია ღვთის ტაძარი დავანგრიო და სამ დღეში ავაშენოო.”

⁶²მაშინ წამოდგა მღვდელმთავარი და უთხრა მას: “არაფერს უპასუხებ, რასაც ესენი შენს წინააღმდეგ მოწმობენ?”

⁶³იესო დუმდა. მაშინ მღვდელმთავრმა უთხრა მას: “ცოცხალ ღმერთს გაფიცებ, გვითხარი, შენა ხარ ქრისტე, ძე ღვთისა?”

⁶⁴უთხრა მას იესომ: “შენ თქვი. მაგრამ მე გეუბნებით თქვენ: ამიერიდან იხილავთ კაცის ძეს ძალის მარჯვნივ მჯდომარეს და ცის ღრუბლებზე მომავალს.”

⁶⁵მაშინ მღვდელმთავარმა შემოიხია სამოსელი და თქვა: “მან ჰგმო. რაღად გვინდა მოწმენი? აჰა, ახლა გაიგონეთ გმობა.

⁶⁶რას ფიქრობთ?” ხოლო მათ მიუგეს და უთხრეს: “სიკვდილის ღირსია.”

⁶⁷მაშინ დაუწყეს ფურთხება სახეში და ცემა, ზოგიერთნი სილას აწნავდნენ

⁶⁸და ეუბნებოდნენ: “გვიწინასწარმეტყველე, ქრისტე, ვინ დაგარტყა?”

⁶⁹პეტრე კი იჯდა გარეთ, ეზოში. მივიდა მასთან ერთი მხევალი და უთხრა: “შენც იესო გალილეველთან იყავი.”

⁷⁰მან კი უარყო ყველას წინაშე და თქვა: “არ ვიცი, რას ლაპარაკობ.”

⁷¹როცა კარიბჭიდან გამოდიოდა, სხვამ დაინახა და უთხრა იქ მყოფთ: “ესეც იესო ნაზარეველთან იყო.”

⁷²მან კვლავ უარყო ფიცით: არ ვიცნობო ამ კაცს.

⁷³ცოტა ხნის შემდეგ მიუახლოვდნენ იქ მდგომნი და უთხრეს პეტრეს: “ნამდვილად შენც მათგანი ხარ, ვინაიდან შენი კილო გამხილებს შენ.”

⁷⁴მაშინ იწყო წყევლა და ფიცილი: არ ვიცნობო ამ კაცს. და მყისვე იყივლა მამალმა.

⁷⁵და გაახსენდა პეტრეს იესოს ნათქვამი სიტყვა: სანამ მამალი იყივლებდეს, სამჯერ უარმყოფო. და გამოვიდა გარეთ და მწარედ ატირდა.