Read სბს–სტოკჰოლმი 2001 მათეს სახარება 4 Bible Online

მათეს სახარება 4 - სბს–სტოკჰოლმი 2001 bible

მათეს სახარება 4

¹მაშინ სულმა წაიყვანა იესო უდაბნოში ეშმაკისაგან გამოსაცდელად.

²ორმოც დღეს და ორმოც ღამეს იმარხულა და ბოლოს მოშივდა.

³მიუახლოვდა მას მაცდური და უთხრა: “თუ შენ ღვთის ძე ხარ, თქვი, რომ ეს ქვები პურებად იქცნენ.”

⁴ხოლო მან მიუგო და უთხრა: “დაწერილია, რომ ‘არა მხოლოდ პურით ცოცხლობს კაცი, არამედ ღვთის პირიდან გამომავალი ყოველი სიტყვით.’”

⁵მაშინ წაიყვანა იგი ეშმაკმა წმიდა ქალაქში და დააყენა ტაძრის ქიმზე.

⁶უთხრა მას: “თუ ღვთის ძე ხარ, გადაიგდე თავი ძირს, ვინაიდან დაწერილია: “თავის ანგელოზებს უბრძანებს შენზე და ისინი ხელში აყვანილს გატარებენ, რათა ქვას ფეხი არ წამოჰკრა.”

⁷უთხრა მას: “ასევე დაწერილია: ‘არ გამოსცადო უფალი, ღმერთი შენი.’”

⁸ისევ წაიყვანა იგი ეშმაკმა ძალიან მაღალ მთაზე, უჩვენა სოფლის ყველა სამეფო და მათი დიდება.

⁹უთხრა მას: “ყოველივე ამას შენ მოგცემ, თუ დამხობილი თაყვანს მცემ.”

¹⁰მაშინ იესომ უთხრა: “განვედ, სატანავ, ვინაიდან დაწერილია: ‘უფალს, შენს ღმერთს ეცი თაყვანი და მხოლოდ მას ემსახურე.’”

¹¹მაშინ მიატოვა იგი ეშმაკმა და აჰა, ანგელოზები მიეახლნენ და ემსახურებოდნენ მას.

¹²გაიგო იესომ, რომ იოანე გაცემულია და წავიდა გალილეას.

¹³მიატოვა ნაზარეთი, მივიდა და დასახლდა ზღვის პირას მდებარე კაპერნაუმში, ზებულუნისა და ნეფთალის საზღვრებში,

¹⁴რათა აღსრულებულიყო ნათქვამი ესაია წინასწარმეტყველის, რომელიც ამბობს:

¹⁵“ზებულუნის მიწა და ნეფთალის მიწა, ზღვისპირა გზა იორდანეს გაღმით, წარმართთა გალილეა.

¹⁶ხალხმა, რომელიც ბნელში ისხდა, იხილა დიდი ნათელი, ჩრდილის ქვეყანაში მსხდომთ ნათელი ამოუბრწყინდათ.”

¹⁷იმ დროიდან მოყოლებული დაიწყო იესომ ქადაგება და ამბობდა: “მოინანიეთ, ვინაიდან მოახლოებულია ცათა სასუფეველი.”

¹⁸როცა გალილეის ზღვის ნაპირას მიდიოდა, მან დაინახა ორი ძმა: სიმონი, პეტრედ წოდებული, და ანდრია, მისი ძმა. ბადეებს ისროდნენ ზღვაში, ვინაიდან მებადურები იყვნენ.

¹⁹უთხრა მათ: “მომყევით მე და ადამიანთა მებადურებად გაგხდით.”

²⁰მათ მყისვე მიატოვეს ბადეები და გაჰყვნენ მას.

²¹იქიდან წავიდა და დაინახა სხვა ორი ძმა: იაკობი, ზებედეს ძე და იოანე, მისი ძმა, რომელნიც თავიანთ მამასთან, ზებედესთან ერთად ნავში ბადეებს ამზადებდნენ, და მოუხმო მათ.

²²მათ მყისვე მიატოვეს ნავიც და მამაც და გაჰყვნენ მას.

²³და მიმოდიოდა იესო მთელ გალილეაში, ასწავლიდა მათ სინაგოგებში, ქადაგებდა სასუფევლის სახარებას და კურნავდა ყოველგვარ სენს, ყოველნაირ უძლურებას ადამიანებში.

²⁴მოედო მისი ამბავი მთელ სირიას. და მოჰყავდათ მასთან ყველა უძლური, სხვადასხვა სნეულებით და სატანჯველით შეპყრობილნი, ეშმაკეულნი, მთვარეულნი, დავრდომილნი და ის კურნავდა მათ.

²⁵დიდძალი ხალხი მისდევდა მას გალილეიდან და დეკაპოლისიდან, იერუსალიმიდან და იუდეადან და იორდანეს გაღმიდან.