Read სბს–სტოკჰოლმი 2001 მარკოზის სახარება 11 Bible Online

მარკოზის სახარება 11 - სბს–სტოკჰოლმი 2001 bible

მარკოზის სახარება 11

¹როცა მიუახლოვდნენ იერუსალიმს, ბეთბაგეს და ბეთანიას, ზეთისხილის მთასთან, გააგზავნა ორი თავისი მოწაფეთაგანი.

²უთხრა მათ: “წადით სოფელში, თქვენს წინ რომ არის. როგორც კი შიგ შეხვალთ, მაშინვე იპოვით დაბმულ ჩოჩორს, რომელზეც ჯერ კაცი არ შემჯდარა. ახსენით და მომიყვანეთ.

³თუ ვინმემ გითხრათ: ამას რას შვრებითო? უთხარით, რომ უფალს სჭირდება და უმალ დაგიბრუნებს-თქო.”

⁴წავიდნენ და იპოვეს ქუჩაში კართან დაბმული ჩოჩორი, და აუშვეს იგი.

⁵იქ მდგომთაგან ზოგიერთმა უთხრა მათ: “რას შვრებით, რატომ ხსნით ჩოჩორს?”

⁶მათ უთხრეს, როგორც იესომ უთხრათ, და მოეშვნენ მათ.

⁷და მიჰგვარეს ჩოჩორი იესოს. ზედ თავიანთი ტანისამოსი დაუფინეს და შეჯდა მასზე.

⁸ბევრმა დაუფინა გზაზე მას თავისი ტანისამოსი, ზოგმა კი მინდორში მოჭრილი ტოტები.

⁹წინ მიმავალნი და უკან მიმყოლნიც ღაღადებდნენ: “ოსანა! კურთხეულ არს უფლის სახელით მომავალი!

¹⁰კურთხეულ არს ჩვენი მამის, დავითის მომავალი სამეფო! ოსანა, მაღალთა შინა!”

¹¹და შევიდა იესო იერუსალიმში, ტაძარში, და დაათვალიერა ყველაფერი. უკვე გვიანი იყო და თორმეტთან ერთად გავიდა ბეთანიისაკენ.

¹²მეორე დღეს, ბეთანიიდან რომ გავიდნენ, მოშივდა.

¹³შორიდან დაინახა გაფოთლილი ლეღვის ხე და წავიდა, რომ ზედ რამე ეპოვა. რომ მივიდა, ვერაფერი იპოვა ფოთლების მეტი. არ იყო ლეღვობის დრო.

¹⁴მიუბრუნდა და უთხრა მას: “ნუღარავინ ჭამოს უკუნისამდე ნაყოფი შენი!” და გაიგონეს მისმა მოწაფეებმა.

¹⁵და მივიდნენ იერუსალიმში და შევიდა ტაძარში იესო, და დაიწყო გამყიდველთა და მყიდველთა გამორეკვა. მეკერმეთა დახლები და მტრედების გამყიდველთა მერხები ააყირავა.

¹⁶არ ანებებდა, რაიმე გაეტარ-გამოეტარებინათ ტაძარზე.

¹⁷და ასწავლიდა მათ და ეუბნებოდა: “არ სწერია, ჩემი სახლი ყველა ხალხის სამლოცველო სახლად იწოდებაო? თქვენ კი ავაზაკთა ბუნაგად აქციეთ.”

¹⁸გაიგონეს მღვდელმთავრებმა და ეძებდნენ, როგორ დაეღუპათ იგი, რადგან ეშინოდათ მისი, რაკი მთელი ხალხი გაოცებული იყო მისი მოძღვრებით.

¹⁹როცა მოსაღამოვდა, გავიდნენ ქალაქიდან.

²⁰დილით ჩაიარეს და დაინახეს, რომ ლეღვი ფესვებამდე გამხმარიყო.

²¹და გაახსენდა პეტრეს და უთხრა მას: “რაბი, აჰა, ის ლეღვი, შენ რომ დასწყევლე, გამხმარა.”

²²მიუგო იესომ და უთხრა მათ:

²³“იქონიეთ ღვთის რწმენა. ჭეშმარიტად გეტყვით, რომ ვინც ეტყვის ამ მთას: აიწიე და ზღვაში ჩავარდიო, და გულში არ შეეჭვდება, არამედ ირწმუნებს, რომ მისი სიტყვისამებრ მოხდება, აუსრულდება მას.

²⁴ამიტომ გეუბნებით: ყველაფერს, რასაც ლოცვაში ითხოვთ, გწამდეთ, რომ მიიღებთ და თქვენი იქნება.

²⁵როცა ლოცვად დგახართ, მიუტევეთ, თუ რაიმე გაქვთ ვინმეს წინააღმდეგ, რათა თქვენმა მამამაც ზეცაში მოგიტეოთ თქვენი შეცოდებანი.

²⁶ხოლო თუ თქვენ არ მიუტევებთ, არც თქვენი მამა, რომელიც ზეცაშია, მოგიტევებთ თქვენს შეცოდებებს.”

²⁷კვლავ მივიდნენ იერუსალიმში და, როცა იგი ტაძარში მიმოდიოდა, მღვდელმთავარნი, მწიგნობარნი და უხუცესნი მივიდნენ მასთან.

²⁸და უთხრეს მას: “რომელი ხელმწიფებით აკეთებ ამას? ან ვინ მოგცა შენ ეს ხელმწიფება?”

²⁹იესომ უთხრა მათ: “მეც გკითხავთ ერთ სიტყვას; მიპასუხეთ და მეც გეტყვით, რომელი ხელმწიფებით ვაკეთებ ამას.

³⁰იოანეს ნათლისცემა ზეციდან იყო თუ კაცთაგან? აბა, მიპასუხეთ.”

³¹ისინი ერთმანეთში ბჭობდნენ: თუ ვიტყვით, რომ ზეციდანო, გვეტყვის: მაშ რაღატომ არ იწამეთო მისი?

³²ხოლო თუ იტყოდნენ: კაცთაგანო, ხალხისა ეშინოდათ, ვინაიდან ყველას მიაჩნდა, რომ იოანე ნამდვილად წინასწარმეტყველი იყო.

³³და მიუგეს იესოს და უთხრეს: “არ ვიცით.” იესომ უთხრა მათ: “არც მე გეტყვით, რომელი ხელმწიფებით ვაკეთებ ამას.”