Read სბს–სტოკჰოლმი 2001 ლუკას სახარება 3 Bible Online

ლუკას სახარება 3 - სბს–სტოკჰოლმი 2001 bible

ლუკას სახარება 3

¹ტიბერიოს კეისრის მთავრობის მეთხუთმეტე წელს, პონტოელი პილატეს განმგებლობისას იუდეაში, და ჰეროდეს ტეტრარქობისას გალილეაში, მისი ძმის, ფილიპეს, ტეტრარქობისას იტურეასა და ტრახონიტის მხარეში, და ლისანიასის ტეტრარქობისას აბილენეში,

²ანას და კაიაფას მღვდელმთავრობის დროს იყო სიტყვა ღვთისა იოანესადმი, ზაქარიას ძისადმი, უდაბნოში.

³დადიოდა იგი იორდანეს მთელს არემარეში და ქადაგებდა სინანულის ნათლისღებას ცოდვათა მისატევებლად,

⁴როგორც სწერია ესაია წინასწარმეტყველის სიტყვათა წიგნში: “ხმა მღაღადებლისა უდაბნოში: განუმზადეთ გზა უფალს, მოასწორეთ მისი ბილიკები.

⁵ყოველი ხევი ამოივსება, ყოველი მთა და ბორცვი დადაბლდება, მრუდე გასწორდება და ოღროჩოღრო გზა გავაკდება.

⁶და ყოველი ხორციელი იხილავს ხსნას ღვთისაგან.”

⁷მოსანათლავად მისულ ხალხს იოანე ეუბნებოდა: “იქედნეთა ნაშობნო, ვინ გაგაფრთხილათ, რომ გაექცეთ მომავალ რისხვას?

⁸მაშ, გამოიღეთ მონანიების ღირსი ნაყოფნი და ნუ მოჰყვებით ერთმანეთში ლაპარაკს: მამად აბრაამი გვყავსო. ვინაიდან, გეუბნებით თქვენ, რომ ღმერთს შეუძლია ამ ქვებიდან აღუდგინოს აბრაამს შვილები.

⁹ცულიც უკვე დევს ხეთა ფესვთან. ყოველ ხეს, რომელიც კეთილ ნაყოფს არ გამოიღებს, ჭრიან და ცეცხლში აგდებენ.”

¹⁰ეკითხებოდა მას ხალხი და ეუბნებოდა: აბა, რაღა ვქნათო?

¹¹მიუგებდა და ეტყოდა მათ: “ვისაც ორი მოსასხამი აქვს, მისცეს უქონელს. ვისაც საზრდო აქვს, ისიც ასე მოიქცეს.”

¹²მოვიდნენ მებაჟენიც მოსანათლავად და უთხრეს მას: “მოძღვარო, რა ვქნათ?”

¹³მან უთხრა მათ: “თქვენთვის დაწესებულის მეტს ნურაფერს მოითხოვთ.”

¹⁴ჯარისკაცებიც ეკითხებოდნენ: “ჩვენ რაღა ვქნათ?” უთხრა მათ: “ნურავის შეავიწროვებთ, ცილს ნუ დასწამებთ და თქვენს ჯამაგირს დასჯერდით.”

¹⁵როცა ხალხი მოლოდინში იყო და ყველა თავის გულში ფიქრობდა იოანეზე, ქრისტე ხომ არ არისო,

¹⁶მიუგებდა და ეტყოდა ყველას იოანე: “მე წყლით გნათლავთ, მაგრამ მოდის ჩემზე ძლიერი, რომლის სანდლის თასმის გახსნის ღირსიც არა ვარ. ის მოგნათლავთ თქვენ სულიწმიდით და ცეცხლით,

¹⁷რომლის ხელშია ნიჩაბი, რათა გაწმიდოს თავისი კალო და თავის ბეღელში მოაგროვოს ხორბალი, ბზე კი დაწვას ჩაუქრობელი ცეცხლით.”

¹⁸კიდევ ბევრ სხვა რამესაც ახარებდა და შეაგონებდა ხალხს.

¹⁹ხოლო ჰეროდემ, ტეტრარქმა, რომელსაც იგი ამხილებდა მისი ძმის ცოლის ჰეროდიას გამო და ყოველივე იმის გამო, რა ბოროტებაც ჩაედინა,

²⁰ყველაფერს ამას ისიც მიუმატა, რომ იოანე საპყრობილეში ჩასვა.

²¹როცა მთელი ხალხი ინათლებოდა და იესოც მოინათლა და ლოცულობდა, გაიხსნა ცა

²²და გადმოვიდა მასზე სულიწმიდა ხორციელი სახით, როგორც მტრედი, და გაისმა ზეცით ხმა: “შენ ხარ ჩემი საყვარელი ძე, რომელიც მოვიწონე მე.”

²³თვით იესო, როცა იწყებდა, იქნებოდა ოცდაათი წლისა და, როგორც ფიქრობდნენ, იყო ძე იოსებისა, ყელისა,

²⁴მათათისა, ლევისა, მალქისა, იანაისა, იოსებისა,

²⁵მათითიასი, ამოცისა, ნახუმისა, ხესლისა, ნაგაისა,

²⁶მახათისა, მათითიასი, შიმყისა, იოსებისა, იოდასი,

²⁷იოხანანისა, რეშასი, ზერუბაბელისა, შეალთიელისა, ნერისა,

²⁸მალქისა, ადისა, კოსამისა, ელმადამისა, ყერისა,

²⁹იესოსი, ელეაზარისა, იორიმისა, მათათისა, ლევისა,

³⁰სიმონისა, იუდასი, იოსებისა, იონამისა, ელიაკიმისა,

³¹მალეასი, მინასი, მათათასი, ნათანისა, დავითისა,

³²იესესი, ყობედისა, ბოყაზისა, სალმონისა, ნახშონისა,

³³ყამინადაბისა, ადმინისა, არნისა, ხეცრონისა, ფერეცისა, იუდასი,

³⁴იაკობისა, ისაკისა, აბრაამისა, თერახისა, ნახორისა,

³⁵სერუგისა, რეყუსი, ფელეგისა, ყებერისა, შალახისა,

³⁶კენანისა, არფაქშადისა, სემისა, ნოესი, ლამექისა,

³⁷მეთუშელახისა, ხანოქისა, იერედისა, მაჰალალელისა, კენანისა,

³⁸ენოშისა, შეთისა, ადამისა, ღვთისა.