Read სბს–სტოკჰოლმი 2001 მეორე რჯული 24 Bible Online

მეორე რჯული 24 - სბს–სტოკჰოლმი 2001 bible

მეორე რჯული 24

¹თუ კაცი ცოლს შეირთავს, მაგრამ ქალი მადლს ვერ ჰპოვებს მის თვალში, რადგან სამარცხვინოს რასმე უპოვნის კაცი, დაუწეროს გაყრილობის წერილი და მისცეს ხელში და გაუშვას თავისი სახლიდან.

²და გავა ქალი მისი სახლიდან, და წავა და გათხოვდება სხვა კაცზე.

³და თუ შეიძულა იგი ამ ბოლო ქმარმაც, და დაუწერა მას განქორწინების წერილი, და მისცა მას, და გაუშვა იგი თავისი სახლიდან, ან თუ მოკვდება ეს უკანასკნელი ქმარი, რომელმაც იგი მოიყვანა ცოლად,

⁴არ შეუძლია მის პირველ ქმარს, რომელმაც გაუშვა იგი, კვლავ მიიყვანოს იგი ცოლად, მას შემდეგ, რაც წაიბილწა, რადგან სისაძაგლეა ეს უფლის წინაშე. და ნუ გარყვნი ქვეყანას, რომელსაც უფალი, შენი ღმერთი, გაძლევს სამკვიდროდ.

⁵თუ კაცს ახლად შერთული ცოლი ჰყავს, ნუ გავა ლაშქარში და ნუ დაევალება მას ნურაფერი. ერთი წელი თავისუფალი იყოს თავის სახლში და გაახაროს თავისი ცოლი, რომელიც შეირთო.

⁶არავინ აიღოს გირაოდ დოლაბები. სულის დამგირავებელი იქნება იგი.

⁷თუ აღმოჩნდება კაცი, რომელმაც მოიპარა თავისი მოძმე, ისრაელის ძე, დაიმორჩილა და გაყიდა იგი, მოკვდეს ის ქურდი. და აღმოფხვრი ბოროტებას შენი წიაღიდან.

⁸უფრთხილდი კეთრის წყლულს, რათა ზუსტად დაიცვა და შეასრულო ყველაფერი დასაცავად, და რასაც თქვენ გასწავლიან ლევიანი მღვდლები. რაც მე ვუბრძანე მათ, დაიცავით შესასრულებლად.

⁹გაიხსენე, თუ რა უყო უფალმა, შენმა ღმერთმა, მირიამს გზაზე, როცა ეგვიპტიდან გამოდიოდით.

¹⁰თუ შენს მოყვასს რაიმეს ასესხებ, არ შეხვიდე მის სახლში მისგან გირაოს წამოსაღებად:

¹¹გარეთ დადექი და კაცი, ვისაც შენ ასესხე, გარეთ გამოგიტანს გირაოს.

¹²და თუ იგი ღარიბი კაცია, მისი გირაოთი ნუ დაიძინებ;

¹³უნდა დაუბრუნო მას გირაო მზის ჩასვლისას, რათა დაიძინოს თავისი სამოსლით და დაგლოცოს, და სიმართლედ ჩაგეთვლება უფლის, შენი ღმერთის, წინაშე.

¹⁴ნუ შეავიწროებ მოჯამაგირეს, ღარიბს და გლახაკს, შენი მოძმეთაგანი იქნება იგი თუ შენი ხიზანთაგანი, რომელიც შენს ქვეყანაშია, შენს კარიბჭეებში;

¹⁵იმავე დღეს მიეცი თავისი გასამრჯელო, ვიდრე მზე ჩავა, რადგან ღარიბია და ნატრობს მისი სული მას. არ შეჰღაღადოს უფალს შენზე და შენზე არ იყოს ცოდვა.

¹⁶მამები არ უნდა მოიკლან შვილების ცოდვებისათვის, და შვილები არ უნდა მოიკლან მამებისათვის. არამედ თითოეული თავისი ცოდვის გამო მოიკლას.

¹⁷ნუ გაამრუდებ ხიზნისა და ობლის სამართალს, და ნუ აიღებ გირაოდ ქვრივის სამოსელს.

¹⁸გახსოვდეს, რომ მონა იყავი ეგვიპტეში და გიხსნა უფალმა, შენმა ღმერთმა, იქიდან. ამიტომ გიბრძანებ ამის აღსრულებას.

¹⁹როცა მომკი სამკალს ყანაში და ძნა დაგავიწყდება ყანაში, ნუღარ გაბრუნდები მის ასაღებად. ხიზნისთვის, ობლისა და ქვრივისათვის იყოს ის, რათა გაკურთხოს უფალმა, შენმა ღმერთმა, მთელ შენს ნაამაგარში.

²⁰როცა ჩამობერტყავ ზეთისხილს, ნუღა მიუბრუნდები ტოტებს: ხიზნის, ობლისა და ქვრივისათვის იყოს.

²¹როცა აიღებ ვენახის მოსავალს, ნუღა მოიმცვრევ დარჩენილ ნაყოფს: ხიზნის, ობლისა და ქვრივისათვის იყოს.

²²და გახსოვდეს, რომ მონა იყავი ეგვიპტის ქვეყანაში. ამიტომ გიბრძანებ ამ სიტყვის აღსრულებას.