Read სბს–სტოკჰოლმი 2001 მეორე რჯული 27 Bible Online

მეორე რჯული 27 - სბს–სტოკჰოლმი 2001 bible

მეორე რჯული 27

¹და უბრძანა მოსემ და ისრაელის უხუცესებმა ერს: “დაიცავი ყოველი მცნება, რომელსაც მე გიბრძანებ დღეს.

²და იმ დღეს, როდესაც გადახვალთ იორდანეზე იმ ქვეყანაში, რომელსაც უფალი, შენი ღმერთი, გაძლევს შენ, დაიდგი დიდი ქვები და კირით შემოლესე.

³და დაწერე მათზე ყველა სიტყვა ამ რჯულისა, როცა გადახვალ იორდანეს, რათა შეხვიდეთ იმ ქვეყანაში, რომელსაც უფალი, შენი ღმერთი, გაძლევს, ქვეყანაში, სადაც მოედინება რძე და თაფლი, როგორც თქვა უფალმა, შენი მამების ღმერთმა.

⁴და როცა გადახვალთ იორდანეს, დადგი ის ქვები, რომლებზეც გიბრძანებ დღეს, ღებალის მთაზე და კირით შემოლესე ისინი.

⁵და აუგე იქ სამსხვერპლო უფალს, შენს ღმერთს, ქვის სამსხვერპლო, ნუ შემართავ მათზე რკინას.

⁶მთელ-მთელი ქვებით ააგე უფლის, შენი ღმერთის, სამსხვერპლო და აღუვლინე მასზე სრულადდასაწველები უფალს, შენს ღმერთს.

⁷და შესწირე სამშვიდობო მსხვერპლები, და ჭამე იქ, და გაიხარე უფლის, შენი ღმერთის, წინაშე.

⁸და დაწერე ქვებზე ამ რჯულის ყველა სიტყვა ძალიან მკაფიოდ.”

⁹და უთხრეს მოსემ და ლევიანმა მღვდლებმა მთელ ისრაელს: “გაიგონე და ისმინე, ისრაელ! ამ დღეს გახდი უფლის, შენი ღმერთის, ერი.

¹⁰და ისმინე უფლის, შენი ღმერთის, ხმა და შეასრულე მისი მცნებანი და მისი წესები, რომელთაც მე გიბრძანებ დღეს.”

¹¹და უბრძანა მოსემ ხალხს იმ დღეს და უთხრა:

¹²“ესენი იდგნენ გერიზიმის მთაზე ხალხის საკურთხებლად, როცა გადახვალ იორდანეს: სიმონი, ლევი, იუდა, ისაქარი, იოსები და ბენიამინი.

¹³და ესენი იდგნენ ღებალის მთაზე დასაწყევლად: რეუბენი, გადი, აშერი, ზებულუნი, დანი და ნაფთალი.

¹⁴და ლევიანები მიუგებენ და ეტყვიან მთელ ისრაელს ხმამაღლა:

¹⁵‘წყეულიმც იყოს ის კაცი, ვინც გააკეთოს ქანდაკი ან ჩამოსხმული კერპი, ხელოსნის ხელით ნაკეთები, და დადგას ფარულად!’ და მიუგებს მთელი ერი და იტყვის: ‘ამინ!’

¹⁶‘წყეულიმც იყოს შეურაცხმყოფელი თავისი მამისა და თავისი დედისა!’ და იტყვის მთელი ერი: ‘ამინ!’

¹⁷‘წყეულიმც იყოს მოყვასის სამანის გადამწევი!’ და იტყვის მთელი ერი: ‘ამინ!’

¹⁸‘წყეულიმც იყოს ბრმის გზიდან ამცდენი!’ და იტყვის მთელი ერი: ‘ამინ!’

¹⁹‘წყეულიმც იყოს, ვინც გაამრუდოს სამართალი ხიზნისა, ობლისა და ქვრივისა!’ და იტყვის მთელი ერი: ‘ამინ!’

²⁰‘წყეულიმც იყოს თავის მამის ცოლთან დამწოლი, რადგან მან მამას კალთა გადაუწია!’ და იტყვის მთელი ერი: ‘ამინ!’

²¹‘წყეულიმც იყოს რომელიმე პირუტყვთან დამწოლი!’ და იტყვის მთელი ერი: ‘ამინ!’

²²‘წყეულიმც იყოს თავის დასთან, თავისი მამის ასულთან ან თავისი დედის ასულთან დამწოლი!’ და იტყვის მთელი ერი: ‘ამინ!’

²³‘წყეულიმც იყოს თავის სიდედრთან დამწოლი!’ და იტყვის მთელი ერი: ‘ამინ!’

²⁴‘წყეულიმც იყოს თავისი მოყვასის ფარულად მკვლელი!’ და იტყვის მთელი ერი: ‘ამინ!’

²⁵‘წყეულიმც იყოს ქრთამის ამღები კაცის მოსაკლავად და უბრალო სისხლის დასაღვრელად!’ და იტყვის მთელი ერი: ‘ამინ!’

²⁶‘წყეულიმც იყოს, ვინც არ დაუდგება ამ რჯულის სიტყვებს მათ შესასრულებლად!’ და იტყვის მთელი ერი: ‘ამინ!’”